“കണ്ണുണ്ടായാല് പോരാ കാണണം”.. അതെ ഇനിയെങ്കിലും കേരളിയര് കണ്ണ് തുറക്കണം. “സ്വാമി/നി“ മാര് ഇല്ലായ്മയില് നിന്നും കോടികള് ആസ്തികളുള്ളവരായി മാറിയതെങ്ങിനെയെന്ന് തിരിച്ചറിയണം.ഇന്ന് പിടിക്കപ്പെടുന്ന “സ്വാമി“മാര് ഒരു അഞ്ച് വര്ഷം കഴിഞ്ഞാല് എവിടെയാകുമായിരുന്നെന്ന് ചിന്തിക്കണം. അന്ന് അവര് ഒരു പക്ഷേ യു.എന്നിന്റെയും മറ്റും അകത്തളങ്ങളിലെ സിംഹാസനങ്ങളില് കഴിയുമായിരുന്നു. ഒന്നുമില്ലെങ്കില് ക്രിസ്ത്യന് സഭാ മേലധ്യക്ഷന്മാരെയും, ലേഖകന്റെ “ആശ്രമാധിപ” യെയും പോലെ വിദ്യാഭ്യാസ കച്ചവടം നടത്തുവാനുള്ള വിദ്യാഭ്യാസ സ്ഥാപനങ്ങളും, ആശുപത്രികളും പണിയുമായിരുന്നു. അതിനുള്ള ഭാഗ്യം അവര്ക്കില്ലാതെ പോയി. ഇപ്പോള് പിടിക്കപ്പെട്ട “സ്വാമി/നി“ മാരില് ഭൂരിപക്ഷവും സാമൂഹിക പ്രവര്ത്തനം നടത്തുന്നവര് തന്നെയായിരുന്നു. എറണാകുളത്ത് നിന്ന് അറസ്റ്റിലായ സന്തോഷ് അവിടെ ഒരു അഭയ കേന്ദ്രം നടത്തുകയായിരുന്നില്ലേ. ഒരു 5-10 വര്ഷം കഴിഞ്ഞിരുന്നുവെങ്കില് രാഷ്ട്രപതിയും കേന്ദ്രമന്ത്രിമാരും ഉള്പ്പെടെയുള്ള വിശിഷ്ട വ്യക്തികള് അയാളുടെ അടുത്ത് ഭയഭക്തിയോടെ നില്ക്കുമായിരുന്നില്ലേ. അയാള്ക്കും ദാനമായിട്ടാണ് വിദേശികള് ഉള്പ്പെടെയുള്ളവര് പണം നല്കിയതെന്ന് അവകാശപ്പെടുന്നത്.
പിന്നെ ലേഖകന് വിശ്വസിക്കുന്ന “ആശ്രമാധിപ” ഓരോ നയാ പൈസ കണക്ക് സര്ക്കാരിനെ ബോധിപ്പിക്കുന്നുണ്ടെന്ന് പറയേണ്ടത് സര്ക്കാരാണ്. അത് സര്ക്കാര് പറയുവാന് തയ്യാറാകുമോ? ലേഖകന് അവകാശപ്പെടുന്നത് പോലെ കോടിക്കണക്കിന് ഭക്തജനങ്ങളുള്ളപ്പോള്......
എന്തായാലും 10 പൈസ 10 രൂപയാക്കി മാറ്റുന്ന വിദ്യ സര്ക്കാരിന് കൂടി പകര്ന്ന് കൊടുക്കുന്നത് നല്ലതാണ്.
സുനാമിയും, വെള്ളപ്പൊക്കവും, ഉരുള്പൊട്ടലും ഉണ്ടായപ്പോള് ഇന്ന് “സ്വാമി”മാര്ക്കെതിരെ ശബ്ദമുയര്ത്തിയവര് എവിടെയായിരുന്നൂ എന്നാണ് പുള്ളിയുടെ മറ്റൊരു ചോദ്യം.. ഒന്ന് മനസ്സിലാക്കുക ഇവര്ക്കൊന്നും കോടിക്കണക്കിന് അനുയായികളില്ല. വിദേശത്ത് നിന്നും പണവും കിട്ടുവാനുള്ള വഴിയില്ല... എങ്കിലും പലരും നുള്ളിപ്പെറുക്കി കൊടുത്തിരുന്നു എന്ന കാര്യം മറക്കരുത്. ഞാനും എന്റെ “അമ്മ”യും മാത്രമേ ഈ കേരളിയരെ സഹായിക്കുവാനുള്ളൂ എന്ന ജല്പനങ്ങള് ജനങ്ങള് ശ്രദ്ധിക്കുന്നുണ്ടെന്ന് തിരിച്ചറിയുക.
തെറ്റ് ചെയ്യുന്നില്ലെങ്കില് പിന്നെ വിമര്ശനങ്ങളെ ഭയപ്പെടുന്നത് എന്തിനാണ്? തലയില് കോഴിത്തൂവല് എന്ന് പറയുമ്പോള് സ്വന്തം തല തപ്പി നോക്കുന്നത് പോലെയായി ഈ ലേഖനം. എന്തായാലും യുവജന സംഘങ്ങള് മുടിയും താടിയും വടിക്കില്ല എന്ന് ഇദ്ദേഹത്തിന് ആശ്വസിക്കാം.... തൊടുവാന് ധൈര്യമില്ലാഞ്ഞിട്ടു തന്നെ...
പിന്നെ “സ്വാമി” തന്നെ പറയുന്നത് പോലെ “ചിന്തയിലും പ്രവര്ത്തിയിലും പക്വത വേണ്ട“ ഒരാളുടെ വാക്കുകളാണോ ഈ ലേഖനം വായിക്കുന്നവര്ക്ക് കിട്ടുന്നത്? തങ്ങളെ വിമര്ശിക്കുന്നവരോടുള്ള ഒരു സാധാരണക്കാരന്റെ രോഷ പ്രകടനം മാത്രമായി ഈ ലേഖനം അധപതിപ്പിച്ചത് വളരെ ദയനിയമായി പോയി. പിന്നെ സന്യാസി വര്യന്മാര്ക്കൊപ്പം തന്റെ “മഠാധിപയെ” കൂട്ടിയതിലൂടെ, അവരേക്കാള് ഒക്കെ മുന്നിലാണ് തന്റെ “മഠാധിപ” എന്ന് സമര്ത്ഥിക്കുവാന് ശ്രമിക്കുന്നതിലൂടെ ഈ “സ്വാമി” എവിടെ നില്ക്കുന്നു എന്ന് മനസ്സിലാക്കാം.
