ലോക സാമ്പത്തിക മാന്ദ്യം 2008ലെ അവസാന ആഴ്ച

ഈ ആഴ്ച 2008 അവസാനിക്കുകയും 2009 തുടങ്ങുകയും ചെയ്തു. കഴിഞ്ഞ വര്‍ഷങ്ങളിലെ പോലെ പുതു വര്‍ഷത്തെ പണക്കൊഴുപ്പിലൂടേ വരവേല്‍ക്കാന്‍ ലോക ജനതയ്ക്ക് കഴിഞ്ഞില്ല. സാമ്പത്തിക മാന്ദ്യമെന്ന ഭീകരന്‍ ലവലേശം ബാധിക്കില്ലെന്ന് കരുതിയിരുന്ന ഇന്ത്യ, ബ്രസീല്‍, ചൈന, റഷ്യ തുടങ്ങിയ രാജ്യങ്ങളെ സാവധാനത്തില്‍ വിഴുങ്ങുന്നത് കണ്ട് കൊണ്ടാണ് 2009 തുടങ്ങുന്നത്.

ഈ രാജ്യങ്ങളിലെല്ലാം തന്നെ- പ്രത്യേകിച്ച് ഇന്ത്യയിലും, ചൈനയിലും- കയറ്റുമതി മേഖല തകര്‍ന്നടിയുന്ന കാഴ്ചയാണ് 2008ന്റെ അവസാന മാസം ദൃശ്യമായത്. മറ്റ് രാജ്യങ്ങളിലെ പോലെ ഇവിടെയും ജോലികള്‍ നഷ്ടപ്പെടുവാന്‍ തുടങ്ങിയിരിക്കുന്നു. ആദ്യം കയറ്റുമതി മേഖലയിലാണ് ഇത് ദൃശ്യമായത്. ഇപ്പോള്‍ അത് നിര്‍മ്മാണ മേഖലയിലേയ്ക്കും കടന്നിരിക്കുന്നു.

അംബാനിമാര്‍ക്കും, മിത്തല്‍മാര്‍ക്കും ഇന്ത്യയില്‍ തകര്‍ച്ച നേരിടുന്നത് തടയാന്‍ പൊതു വിപണിയില്‍ പെട്രോളിന് വില കുറയ്ക്കാതെയും, ഇന്‍ഷ്യുറന്‍സ് മേഖലയില്‍ വിദേശ പങ്കാളിത്തം അനുവദിച്ചും മറ്റ് രാജ്യങ്ങളിലെ പോലെ ഇന്ത്യന്‍ ഗവണ്മെന്റും കഷ്ടപ്പെടുന്നു. ഇതും പോരാതെ ജനുവരി 2ആം തിയതി ഗവണ്മെന്റ് വിപണിയില്‍ രണ്ടാമത്തെ ഇടപെടല്‍ വെളിപ്പെടുത്തി. സംസ്ഥാനങ്ങള്‍ക്ക് 30,000 കോടി രൂപ വരെ വിദേശ കടം മേടിക്കുവാനുള്ള അവസരം നല്‍കിയിരിക്കുന്നു! റിസര്‍വ് ബാങ്ക് ആകട്ടെ റിപ്പോ, റിവേഴ്സ് റിപ്പോ, സി.ആര്‍.ആര്‍. എന്നിവ വെട്ടി കുറച്ചു. മുന്‍പ് വെട്ടി കുറച്ചതിന്റെ ഫലം ബാങ്കുകള്‍ ജനങ്ങളിലേയ്ക്ക് എത്തിച്ചിട്ടില്ല എന്ന പരാതി നിലനില്‍ക്കേ ഈ പുതിയ ഇടപെടല്‍ സാധാരണ ജനങ്ങള്‍ക്ക് എത്രമാത്രം ഉപകാരമാകുമെന്ന് കാണേണ്ടിയിരിക്കുന്നു. അവസാന ക്വാര്‍ട്ടറില്‍ ഒരു മുന്നേറ്റം കാഴ്ച വെച്ച് വളര്‍ച്ച 7%ത്തിലെങ്കിലും പിടിച്ചു നിര്‍ത്തുവാനുള്ള ഈ ശ്രമങ്ങള്‍ വരാനിരിക്കുന്ന തിരഞ്ഞെടുപ്പില്‍ മുഖം രക്ഷിക്കുവാനുള്ള അവസാന ശ്രമം മാത്രമായി പോകുന്നു എന്നതാണ് ഇന്ത്യക്കാരുടെ ഗതികേട്.

മറ്റ് രാജ്യങ്ങളിലും പതിവ് പോലെ തൊഴിലുകള്‍ നഷ്ടപ്പെട്ടു കൊണ്ടിരിക്കുന്നു. കയറ്റ്മതി മേഖലയും ഊര്‍ദ്ധശ്വാസം വലിക്കുന്നു. അമേരിക്കയില്‍ സാമ്പത്തിക മാന്ദ്യത്തില്‍ നിന്ന് കരകയറാന്‍ പല മേയര്‍മാരും ഗവണ്മെന്റ് പുതുവത്സര പരിപാടികള്‍ ഉപേക്ഷിച്ചു. പുതുവത്സരത്തോടനുബന്ധിച്ച് തിരക്ക് കൂടുന്ന ഹവായ്, ലാസ് വേഗസ്സ് എന്നിവിടങ്ങളില്‍ കഴിഞ്ഞ വര്‍ഷങ്ങളേക്കാള്‍ തിരക്ക് തീരെ കുറഞ്ഞിരിക്കുന്നത് സാമ്പത്തിക മാന്ദ്യം ഇവിടത്തെ ജനങ്ങളെ എത്രമാത്രം ബാധിച്ചിരിക്കുന്നു എന്നതിന് തെളിവാണ്. കടകള്‍ ഇപ്പോഴും കുറഞ്ഞ വിലകള്‍ പരസ്യപ്പെടുത്തി ആളുകളെ ആകര്‍ഷിക്കുവാന്‍ ശ്രമിക്കുന്നു. തൊഴിലില്ലായ്മ വേതനം മേടിക്കുന്നവര്‍ 4.5 മില്ല്യണ്‍ ആയി. കഴിഞ്ഞ കൊല്ലം ഇത് 2.7 മില്ല്യണായിരുന്നു. ജനുവരിയില്‍ ഇത് 5.5 മില്ല്യണ്‍ ആകുമെന്നാണ് കണക്കാക്കുന്നത്. തൊഴിലില്ലായ്മ നവമ്പറില്‍ 6.7 ആയിരുന്നത് 2009 അവസാനത്തോടേ 8-10% വരെയാകുമെന്ന് ഭയപ്പെടുന്നു. അറ്റ് ലാന്റ, ബ്രിസ്റ്റോള്‍, യുനിസിസ് തുടങ്ങിയവ ആളുകളെ പിരിച്ചു വിടുമെന്ന് അറിയിച്ചു കഴിഞ്ഞു. കാര്‍ കമ്പനികളെ തല്‍ക്കാലം രക്ഷിക്കുവാന്‍ കുറച്ച് പണം കൊടുത്തുവെങ്കിലും ദീര്‍ഘകാലം പിടിച്ച് നില്‍ക്കാനാകാതെ തകര്‍ന്നടിയും എന്ന് ഉറപ്പാണ്. തന്റെ കാലത്ത് ഇത് സംഭവിച്ചു എന്ന പേര് ദോഷം വരരുതെന്ന് തന്നെയാണ് ബുഷ് ആഗ്രഹിക്കുന്നതും.

ഇതൊക്കെയാണെങ്കിലും ഭൂരിപക്ഷം അമേരിക്കക്കാരും 2009 ജനുവരി 20 ആം തിയതിയില്‍ പ്രതീക്ഷ അര്‍പ്പിച്ചിരിക്കുന്നു. അന്നാണ് ഒബാമ പ്രസിഡന്റ് സ്ഥാനം ഏറ്റെടുക്കുന്നത്. താന്‍ അധികാരത്തില്‍ വന്നാല്‍ അമേരിക്കയില്‍ കൂടുതല്‍ തൊഴിലവസരങ്ങള്‍ സൃഷ്ടിക്കുമെന്നും, ടാക്സുകളില്‍ ഇളവ് വരുത്തുമെന്നുമുള്ള അദ്ദേഹത്തിന്റെ വാക്കുകളില്‍ പ്രതീക്ഷ അര്‍പ്പിച്ച് അവര്‍ 2009നെ വരവേല്‍ക്കുന്നു. പക്ഷേ ഇത് ഇന്ത്യയെ പ്രതികൂലമായി ബാധിക്കാം. ഔട്ട് സോഴ്സിങ്ങ് ഇല്ലാതാക്കിയാണ് ഒബാമ അമേരിക്കയില്‍ തൊഴില്‍ അവസരം സൃഷ്ടിക്കുവാന്‍ പോകുന്നത്.

ഈ സാമ്പത്തിക ഭൂതത്തില്‍ നിന്ന് ലോക രാജ്യങ്ങള്‍ക്ക് രക്ഷപ്പെടാനാകില്ല എന്ന് വ്യക്തമായി. പരസ്പര സഹരണമില്ലാതെ ഈ ഭൂതത്തെ കീഴടക്കുവാന്‍ ആര്‍ക്കും കഴിയില്ല എന്നും.

പുതു വര്‍ഷം കഴിഞ്ഞ വര്‍ഷത്തേക്കാള്‍ ഭീകരമായിരിക്കുമെന്നാണ് സാമ്പത്തിക വിദഗ്ദ്ധരുടെ അഭിപ്രായം. എന്തിനെയും നേരിടുമെന്ന പ്രഖ്യാപനത്തോടെ 2009ലേയ്ക്ക് കടക്കാം.