പാരസെറ്റമോള്‍ കുട്ടികളില്‍ ആസ്ത്മയുണ്ടാക്കും!

വേദനയ്ക്കും പനിയ്ക്കും സാധാരണ നാം ഉപയോഗിക്കുന്ന മരുന്നാണ് ക്രോസിന്‍, കാലിപ്പോള്‍ തുടങ്ങിയവ. ഇവയില്‍ അടങ്ങിയിരിക്കുന്നത് പാരസെറ്റമോള്‍ [പാര അസെറ്റൈല്‍ അമിനോ ഫിനോള്‍] എന്ന് വിളിക്കുന്ന രാസവസ്തുവും.

ആസ്പരിന്‍ എന്ന മരുന്നായിരുന്നു അതിന് മുന്‍പ് ഉപയോഗിച്ചിരുന്നത്. എന്നാല്‍ അത് തലച്ചോറിന് ക്ഷതമേല്‍പ്പിക്കുകയും, കരളിന്റെ പ്രവര്‍ത്തനത്തെ ബാധിക്കും എന്ന് കണ്ടതിനാല്‍ പാരസറ്റമോളിലേയ്ക്ക് തിരിയുകയായിരുന്നു. എന്നാല്‍ പാരസെറ്റമോള്‍ ആസ്ത്മയ്ക്ക് കാരണമാകുമെന്ന കണ്ടെത്തല്‍ കൂടുതല്‍ പഠനങ്ങള്‍ക്ക് വിധേയമാക്കുവാന്‍ കാരണമായി.

ഇന്റര്‍നാഷണല്‍ സ്റ്റഡി ഓഫ് ആസ്ത്മ ആന്റ് അലര്‍ജീസ് ഇന്‍ ചൈല്‍ഡ് ഹുഡ് (ഐ.എസ്സ്.എ.എ.സി.) കുട്ടികളിലെ ആസ്ത്മയെ പറ്റി പഠനം നടത്തുന്നുണ്ട്. ഇന്ത്യ ഉള്‍പ്പെടെ ഏകദേശം 100 രാജ്യങ്ങളില്‍ ഇവര്‍ നിരീക്ഷണം നടത്തുന്നു. ഈ നിരീക്ഷണത്തിന്റെ ഏറ്റവും പുതിയ റിപ്പോര്‍ട്ട് കഴിഞ്ഞ അഴ്ച പുറത്ത് വന്നു.

ഈ പ്രബന്ധത്തില്‍ പാരസെറ്റമോളിന്റെ ഉപയോഗം 13-14 വയസ്സുള്ള കുട്ടികളില്‍ ആസ്ത്മയ്ക്ക് വഴി തെളിക്കുമെന്ന് പറയുന്നു.

ഗര്‍ഭിണികള്‍ പാരസെറ്റമോള്‍ കഴിക്കുന്നത് പിന്നീട് കുട്ടികളില്‍ ആസ്ത്മയുണ്ടാകുവാന്‍ കാരണമാകുമെന്ന് നേരത്തെ തന്നെ പഠന റിപ്പോര്‍ട്ടുകളുണ്ട്. കുട്ടികള്‍ ജനിച്ച്  6 മാസത്തിനുള്ളില്‍ പാരസെറ്റമോള്‍ ഉപയോഗിച്ചിട്ടുണ്ടെങ്കില്‍ അവര്‍ക്ക് പിന്നീട് (3 വയസ്സിനുള്ളില്‍ അല്ലെങ്കില്‍ 6-7 വയസ്സില്‍‍) ആസ്ത്മയുണ്ടാകുവാനുള്ള സാധ്യത കൂടുതലാണ്.


1991 മുതല്‍ നടത്തിയ ക്ലിനിക്കല്‍ നിരീക്ഷണത്തില്‍ നിന്ന് മനസ്സിലാകുന്നത് ഗര്‍ഭിണികള്‍, കുഞ്ഞുങ്ങള്‍, കുട്ടികള്‍, ടീനേജ്, മുതിര്‍ന്നവര്‍ എന്നിവര്‍ പാരസെറ്റമോള്‍ ഉപയോഗിക്കുമ്പോള്‍ ആസ്ത്മ ഉണ്ടാകുവാനുള്ള സാധ്യത കൂടുന്നു എന്നാണ്.

എന്താണ് ഇതിന് കാരണം.

അതിന് മുന്‍പ് ആസ്ത്മ എന്നത് എന്ത് എന്ന് നോക്കാം. ലോകത്ത് 300 മില്ല്യണ്‍ ജനങ്ങള്‍ ആസ്ത്മയാല്‍ കഷ്ടപ്പെടുന്നു എന്നാണ് കണക്കുകള്‍ പറയുന്നത്. രണ്ടര ലക്ഷം പേരെങ്കിലും ഓരോ കൊല്ലവും മരണമടയുന്നു. മുതിര്‍ന്നവരില്‍ പെണ്ണുങ്ങളിലാണ് ആസ്ത്മ കൂടുതലായി കണ്ട് വരുന്നത്. എന്നാല്‍ കുട്ടികളില്‍ ആണ്‍കുട്ടികളിലാണ് ആസ്ത്മ കൂടുതലായി കണ്ട് വരുന്നത്. 70% ആസ്ത്മക്കാരിലും അലര്‍ജി ഒരു പ്രധാന പ്രശ്നമാണ്.

 ചിത്രത്തിന് കടപ്പാട് എന്‍.എച്ച്.എല്‍.ബി.ഐ.

ശ്വാസകോശ നാളികളില്‍ നീര്‍ക്കെട്ട് വരുന്നതിനാല്‍ വായു സഞ്ചാരം കുറയുന്നു. ശ്വസിക്കുവാന്‍ ബുദ്ധിമുട്ടുണ്ടാകുകയും വായുവിന്റെ അളവ് കുറയുകയും ചെയ്യുന്നു. ഈ അവസ്ഥയെ ആസ്ത്മ എന്ന് വിളിക്കാം. ഏതെങ്കിലും തരത്തിലുള്ള അലര്‍ജി വസ്തുവുമായി (പൂമ്പൊടി, പാറ്റയുടെ ഗന്ധം, മൃഗങ്ങളുടെ സാന്നിദ്ധ്യം, പൊടി, തണുപ്പ്...) സമ്പര്‍ക്കത്തില്‍ വരുമ്പോള്‍ ആസ്ത്മ പ്രത്യക്ഷപ്പെടും. അല്ലാത്തപ്പോള്‍ പ്രശ്നങ്ങള്‍ ഉണ്ടാകാതെയും ഇരിക്കുന്നു.

ഇതിന് പുറകിലുള്ള മെക്കാനിസത്തെ പറ്റി പറയുകയാണെങ്കില്‍.... അന്യവസ്തുക്കള്‍ ശ്വാസകോശത്തില്‍ പ്രവേശിക്കുമ്പോള്‍ നമ്മുടെ ശരീരം അതിനെതിരെ പ്രവര്‍ത്തിക്കുന്നു. സാധാരണ ഗതിയില്‍ വെളുത്ത രക്താണുക്കളില്‍ പെടുന്ന “ടി ഹെല്‍പ്പര്‍” കോശങ്ങള്‍ മറ്റ് പ്രശ്നമൊന്നുമുണ്ടാകാതെ അവയെ നശിപ്പിക്കുന്നു. എന്നാല്‍ ആസ്ത്മ/അലര്‍ജിക്ക് സെന്‍സിറ്റീവ് ആയവരില്‍  “ടി ഹെല്‍പ്പര്‍” കോശങ്ങള്‍ “ടി എച്ച് 2” എന്ന കോശങ്ങള്‍ക്ക് വഴി തെളിക്കുന്നു. ഇവ ശരീരത്തില്‍ കൂടുമ്പോള്‍ അത് നീര്‍കെട്ട് കൂടുതലാക്കുകയും ശ്വാസകോശ നാളികള്‍ ചുരുങ്ങുകയും അങ്ങിനെ ആസ്ത്മയിലേയ്ക്ക് നയിക്കുന്നു.

നമ്മുടെ ശരീരത്തില്‍ മറ്റൊരു പ്രശ്നക്കാരനാണ് “ഫ്രീ റാഡിക്കളുകള്‍”‍. ഇവ പുറത്ത് നിന്ന് വരുന്ന “നുഴഞ്ഞ് കയറ്റക്കാര്‍ക്കെതിരെ” പ്രവര്‍ത്തിക്കുവാന്‍ അത്യാവശ്യമാണ്. എന്നാല്‍ ചില അവസരങ്ങളില്‍ ഇവയുടെ ഉല്‍പ്പാദനം കൂടുന്നു. അങ്ങിനെ ആയാല്‍ ആ റാഡിക്കലുകള്‍ ശരീരത്തിലെ പ്രോട്ടീനുകളെയും, ഡി.എന്‍.എ. തുടങ്ങിയവയെ ബാധിക്കുകയും അവയെ നശിപ്പിക്കുകയും ചെയ്യും. എന്നാല്‍ ശരീരത്തില്‍ തന്നെ ഇവയെ നശിപ്പിക്കുവാനുള്ള രാസവസ്തുക്കള്‍ ഉണ്ട്. അതിനൊരുദാഹരണമാണ് ഗ്ലൂട്ടാതയോണ്‍ എന്ന രാസവസ്തു. ഇവ ഫ്രീ റാഡിക്കലുകളെ നശിപ്പിച്ച് ശരീരത്തെ രക്ഷിക്കുന്നു. എന്നാല്‍ ആസ്ത്മ രോഗികളില്‍ ഗ്ലൂട്ടാതയോണ്‍ നശിപ്പിക്കപ്പെടുകയും അങ്ങിനെ “ഫ്രീ റാഡിക്കളുകളുടെ” സാന്ദ്രത കൂടുകയും ചെയ്യും. അത് നീര്‍കെട്ടിന് കാരണമാകുകയും “ടി എച്ച് 2” കോശങ്ങളുടെ ഉല്‍പ്പാദനം കൂട്ടുവാനും ഇടയാക്കുന്നു.

പാരസെറ്റമോള്‍ ഗ്ലുട്ടാതയോണിനെ വിഘടിപ്പിക്കുവാന്‍ ഇടയാക്കുകയും മുകളില്‍ പറഞ്ഞപോലെ നീര്‍ക്കെട്ടിലേയ്ക്ക് വഴി തെളിക്കുകയും ചെയ്യുമെന്ന് പരീക്ഷണങ്ങള്‍ തെളിയിക്കുന്നു.

ഇക്കൊല്ലം ജനുവരിയില്‍ പുറത്ത് വന്ന മറ്റൊരു പഠന റിപ്പോര്‍ട്ടില്‍ പറയുന്നത് ഗര്‍ഭിണികള്‍ ശക്തികുറഞ്ഞ വേദന സംഹാരികള്‍ കഴിക്കുന്നത് പോലും ജനിക്കുന്ന ആണ്‍കുട്ടികളില്‍ ലൈംഗിക പ്രശ്നങ്ങള്‍ക്ക് കാരണമാകുമെന്നാണ്. വൃക്ഷണം സഞ്ചിയിലേയ്ക്ക് ഇറങ്ങാതിരിക്കുക, ബീജത്തിന്റെ കൌണ്ട് കുറയുക തുടങ്ങിയവയ്ക്ക് വഴി വെയ്ക്കും പോലും. ഗര്‍ഭകാലത്തിന്റെ 8-14 ആഴ്ചകളിലാണ് ആണ്‍കുട്ടികളുടെ ലൈംഗിക വേര്‍തിരിവ് നടക്കുന്നത്. ഇതിനെ സഹായിക്കുന്നത് ആന്‍ഡ്രൊജന്‍ എന്ന രാസ വസ്തുവും. എന്നാല്‍ വേദന സംഹാരികള്‍ ഈ രാസവസ്തുവിന്റെ ഉല്‍പ്പാദനത്തെ ബാധിക്കുകയും അങ്ങിനെ അത് ആണ്‍കുഞ്ഞുങ്ങളുടെ പ്രദ്യുല്‍പ്പാദനത്തിന് പ്രതികൂലമാകുകയും ചെയ്യുന്നു എന്ന് വിലയിരുത്തൂന്നു.  

ആസ്ത്മ മാത്രമല്ല ശരീരത്തിലെ തൊലി ഇളകി പോകുന്ന അവസ്ഥയ്ക്കും പാരസെറ്റമോളിന്റെ ഉപയോഗം കാരണമാകുന്നു എന്ന് കണ്ടെത്തിയിരിക്കുന്നു.


പ്രത്യേക അറിയിപ്പ്:
ഇതില്‍ പറഞ്ഞിരിക്കുന്ന കാര്യങ്ങള്‍ ശാസ്ത്ര ജേര്‍ണലുകളില്‍ വന്ന വിവരങ്ങളാണ്. അതിനാല്‍ തന്നെ ഇതിലെ വിവരങ്ങള്‍ക്ക് കടപ്പാട് ലിങ്കിലുള്ള അതാത് പ്രബന്ധ രചിയതാക്കള്‍ക്ക് കൊടുക്കുന്നു.