വ്യഥകള്‍‌...

കൊച്ചൌസേപ്പിന്റെ രംഗപ്രവേശനം എന്തിന്?

2012-01-10T22:18:00.001-05:00

ഡാമിന്റെ പല ഭാഗത്തും തുരന്ന് പരീശോധിക്കുമ്പോള്‍ സുര്‍ക്കി കാണാനേയില്ല എന്ന വാര്‍ത്ത പുറത്ത് വന്ന ഉടനെ ആ ഡാം ബലപ്പെടുത്തി എടുക്കാം എന്ന് പറഞ്ഞ് കൊച്ചൌസേപ്പ് രംഗ പ്രവേശം ചെയ്തിരിക്കുന്നു!!!

വര്‍ഷങ്ങള്‍ക്ക് മുന്‍പ് തമിഴ്നാട് കമ്പിയും കോണ്‍ഗ്രീറ്റും കൊണ്ട് ബലപ്പെടുത്തിയതാണ് എന്ന് അവകാശപ്പെടുന്ന ഡാമിനെ വീണ്ടും 55 കോടിയോളം മുടക്കി കമ്പിയും കോണ്‍ഗ്രീറ്റും കൊണ്ട് തങ്ങള്‍ ബലപ്പെടുത്തുമെന്ന് “വി ഗാര്‍ഡന്‍”!!!!!! 5.5 കോടി എറിഞ്ഞാണ് പുള്ളി രംഗപ്രവേശനം ചെയ്തിരിക്കുന്നത്!

എന്തിന് ആര്‍ക്ക് വേണ്ടി കൊച്ചൌസേപ്പ് ഇപ്പോള്‍ പ്രത്യക്ഷപ്പെട്ടിരിക്കുന്നത്? എവിടെയാണ് ചീഞ്ഞ് നാറുന്നത്?

കുറച്ച് നാള്‍ മുന്‍പ് ആരൊക്കയോ എന്തിനോ വേണ്ടി സോഷ്യല്‍ നെറ്റ് വര്‍ക്ക് ഉപയോഗിച്ച് ജനങ്ങളെ ഭയപ്പെടുത്തി. ആ ഓളത്തിലേയ്ക്ക് രാഷ്ട്രീയക്കാരും എടുത്ത് ചാടി തമിഴ്നാട്ടിലെ പാവം കൃഷിക്കാരെ (മലയാളികളും തമിഴരും) പട്ടിണിയിലാക്കി. ഒടുവില്‍ രാഷ്ട്രീയക്കാര്‍ തടി തപ്പി.

കാര്യങ്ങള്‍ കേരളത്തിന് അനുകൂലമായി വരുന്ന ഈ അവസരത്തില്‍ തന്നെ തമിഴ്നാട്ടില്‍ വ്യവസായ സ്ഥാപനങ്ങള്‍ ഉള്ള ഒരാള്‍ കേരള വികാരത്തിന് എതിരായി പെട്ടെന്ന് രംഗത്ത് വരുന്നത് എന്തിനായിരിക്കും? തമിഴ്നാട്ടിലുള്ള സ്വന്തം വ്യവസായ സ്ഥാപനങ്ങള്‍ അക്രമിക്കപ്പെടാതിരിക്കുവാന്‍ വേണ്ടിയാണോ?

ഇന്ത്യയും ചൈനയും തകര്‍ന്നടിയുന്നു?

2012-01-08T21:15:00.000-05:00

2012ല്‍ ഇന്ത്യയും ചൈനയും തകര്‍ന്നടിയുവാന്‍ തുടങ്ങുമോ? ഒട്ടേറെ അനിശ്ചിതത്വങ്ങളോടെ 2012 കടന്ന് വന്നിരിക്കുന്നു......

അമേരിക്കയുടെ ഔട്ട് സോര്‍ഴ്സിങ് എന്ന മുദ്രാവാക്യത്തില്‍ ഏറെ സന്തോഷിച്ചത് ഇന്ത്യ ഉള്‍പ്പെടെയുള്ള രാജ്യങ്ങള്‍ ആയിരുന്നു. അമേരിക്കയില്‍ ജോലിക്കാര്‍ക്ക് പണം നല്‍കി പിരിച്ച് വിട്ട് വില കുറഞ്ഞ ജോലിക്കാരെ തേടി അമേരിക്കന്‍ കമ്പനികള്‍ മൂന്നാം ലോക രാജ്യങ്ങളിലേയ്ക്ക് ചേക്കേറി. അതിന്റെ പിന്‍ബലത്തില്‍ മൂന്നാം ലോക രാജ്യങ്ങള്‍ വളര്‍ന്ന് തുടങ്ങി.

എന്നാല്‍ പിരിഞ്ഞ് പോന്നപ്പോള്‍ കിട്ടിയ പണം വാള്‍ സ്ട്രീറ്റിലെ ചൂത് കളിയിലും റിയല്‍ എസ്റ്റേറ്റിലുമായി നിക്ഷേപിച്ച് വിശ്രമിച്ച അമേരിക്കക്കാരെ ചൂതാട്ട തലവന്മാര്‍ പറ്റിച്ചു. കണ്ണടച്ച് തുറക്കും മുന്‍പ് സാമ്പത്തിക രംഗം തകര്‍ന്നടിഞ്ഞു. സ്വാഭാവികമായും ഉള്ള ജോലികളും ഇല്ലാതെയായി എന്ന് മാത്രമല്ല പിരിഞ്ഞ് കിട്ടിയപ്പോള്‍ ലഭിച്ച പണവും വെള്ളത്തിലായി. ഇതിനിടയില്‍ തിവ്രവാദികളെ കൊല്ലാന്‍ എന്ന പേരില്‍ കോടികള്‍ ഇറാക്കിലും അഫ്ഗാനിസ്ഥാനിലും മറ്റും വാരി എറിഞ്ഞു.

സാമ്പത്തിക രംഗം തകരുന്നു എന്ന് കണ്ടതോടെ വിദേശത്തുള്ള നിക്ഷേപകര്‍ ഇന്ത്യ, ചൈന പോലെയുള്ള സുരക്ഷിതമായ സ്ഥലങ്ങളിലെ ഷെയര്‍ മാര്‍ക്കറ്റുകളിലേയ്ക്ക് നിക്ഷേപങ്ങള്‍ മാറ്റി. ഇന്ത്യയും മറ്റും വെട്ടി തിളങ്ങുവാന്‍ തുടങ്ങി.

എന്നാല്‍ 2007ലെ സാമ്പത്തിക തകര്‍ച്ചയ്ക്ക് ശേഷം അമേരിക്കയില്‍ കാര്യങ്ങള്‍ കുഴഞ്ഞ് മറിയുകയായിരുന്നു. നഷ്ടം വരുത്തി വെച്ചവര്‍ക്ക് സര്‍ക്കാര്‍ വീണ്ടും പണം നല്‍കുകയും എന്നാല്‍ പണം നഷ്ടപ്പെട്ടവര്‍ക്ക് ഒന്നും ലഭിക്കാതെയുമുള്ള വിചിത്ര കാഴ്ച. ജനങ്ങള്‍ 99% എന്ന വാദവുമായി 2011ല്‍ സമര മുഖത്തേയ്ക്ക്.

2012ലെ റീ-ഇലക്ഷനില്‍ ജയിക്കണമെങ്കില്‍ ഒബാമയ്ക്ക് നന്നായി പണിപെടേണ്ട അവസ്ഥ. സുഖമായി ജയിക്കാമെന്ന് റിപ്പബ്ലിക്കന്മാരും. എന്നാല്‍ അവരുടെ പ്രതീക്ഷകളെ തകിടം മറിച്ച് അമേരിക്കക്കാരുടെ വിദേശ നിക്ഷേപങ്ങള്‍ പിന്വലിപ്പിച്ച് അമേരിക്കയില്‍ എത്തിക്കുവാന്‍ ഒബാമയ്ക്ക് കഴിഞ്ഞു കൊണ്ടിരിക്കുന്നു. അമേരിക്കയില്‍ ജോലികള്‍ വന്ന് തുടങ്ങി. നിരാശരായ തൊഴില്‍ തേടാത്തവരെ കണക്കുകളില്‍ പെടുത്താതിനാല്‍ ഔദ്യോഗികമായി തൊഴിലില്ലായ്മ കുറഞ്ഞുവെങ്കിലും യഥാര്‍ത്ഥത്തില്‍ കുറവൊന്നും സംഭവിച്ചില്ല. ബിരുദധാരികളുടെ തൊഴിലില്ലായ്മ 20%ത്തിനടുത്താണ്! എന്നാല്‍ ഇന്ത്യയില്‍ രൂപയുടെ മൂല്യം മാസങ്ങള്‍ക്കുള്ളില്‍ ഡോളറുമായി 10രൂപയോളം തകരുന്നതാണ് കണ്ടത്!

ഇന്ത്യയിലെ ബി.പി.ഒ.കള്‍ക്ക് പാരയായി അമേരിക്കയില്‍ പുതിയ ബില്‍ പാസ്സാക്കുവാനുള്ള ശ്രമങ്ങള്‍ ശക്തമാകുന്നു.

മെയ്ഡ് ഇന്‍ അമേരിക്ക എന്ന മുദ്രാവാക്യം പ്രചരിപ്പിക്കുവാന്‍ ശ്രമിച്ച് വിജയിച്ചു എന്നത് ചൈനയ്ക്കും തിരിച്ചടിയായിരിക്കുന്നു. കയറ്റ്മതിയെ ആശ്രയിച്ചിരുന്ന അവരുടെ സാമ്പത്തിക വളര്‍ച്ചയും കിതയ്ക്കുവാന്‍ തുടങ്ങിയിരിക്കുന്നു. കൂടെ ചൈനയിലെ ജോലിക്കാര്‍ ശമ്പളം കൂട്ടിയും ചോദിച്ച് തുടങ്ങി.

ഔട്ട്സോര്‍ഴ്സിങ്ങിലൂടെ പുറത്ത് പോയ ജോലികള്‍ തിരിച്ച് കൊണ്ടുവരുവാനാണ് ഇപ്പോള്‍ ഒബാമ ശ്രമിക്കുന്നത്. ഈ വരുന്ന ബുധനാഴ്ച വൈറ്റ് ഹൌസില്‍ പ്രമുഖരായ കമ്പനികളുമായി അതിന്റെ ചര്‍ച്ചയിലാണ്. ഇന്‍സോര്‍ഴ്സിങ് എന്ന മുദ്രാവാക്യം ഒബാമ ഉയര്‍ത്തി കഴിഞ്ഞു (വീഡിയോ). കോള്‍ സെന്ററുകളും, സോഫ്റ്റ്വെയറുകളും, രാസവസ്തു നിര്‍മ്മാണവും, ഫര്‍ണിച്ചര്‍ നിര്‍മ്മാണവും ഉള്‍പ്പെടെ എല്ലാം അമേരിക്കയിലേയ്ക്ക് തിരിച്ച് കൊണ്ടു വരുവാന്‍ ഒബാമ കിണഞ്ഞ് പരിശ്രമിക്കുന്നു.

ആവശ്യം ഒബാമയുടേതാണ്. നവമ്പറില്‍ നടക്കുവാനിരിക്കുന്ന റീ-ഇലക്ഷനില്‍ ജയിക്കേണ്ടതിനാല്‍ ലോക നന്മ എന്നതിനേക്കാള്‍ അമേരിക്കയുടെ നന്മ എന്നത് മാത്രമേ ലക്ഷ്യമുള്ളൂ.

ലോകം ചുരുങ്ങി ഒരു ഗ്രാമമാകുമെന്ന സങ്കല്പങ്ങള്‍ അസ്തമിച്ചു. മെയ്ഡ് ഇന്‍ അവനന്റെ രാജ്യമെന്ന മുദ്രാവാക്യത്തിലേയ്ക്ക് തിരിച്ച് പോകുന്നു. അമേരിക്കയില്‍ മാത്രമല്ല യൂറോപ്പിലും ഇത് തന്നെയാണ് നടപ്പിലായി കൊണ്ടിരിക്കുന്നത്. അതിനാല്‍ തന്നെ ഇനിയുള്ള ആഴ്ചകള്‍ ഇന്ത്യയുടെയും ചൈനയുടെയും മറ്റും വിധി എഴുതുന്ന നാളുകളായിരിക്കും. തിളങ്ങുന്നു എന്ന് ഇവിടങ്ങളിലെ സര്‍ക്കാരുകള്‍ വീമ്പിളക്കുമ്പോഴും സാധാരണക്കാര്‍ക്ക് ജീവിക്കുവാന്‍ ബുദ്ധിമുട്ടായി കൊണ്ടിരിക്കുകയായിരുന്നു. അടുത്ത് തന്നെ ഇതിലും ഭീകരമാകുമെന്ന അവസ്ഥയില്‍ വന്നാല്‍‌!

ഏഷ്യയിലാണ് ഇനി നോട്ടമിടേണ്ടതെന്ന് ഒബാമ പറഞ്ഞ് കഴിഞ്ഞു. അമേരിക്കന്‍ പട്ടാളം ഇനി ഏഷ്യയില്‍ തമ്പടിക്കും. അതിനായി അമേരിക്ക ലക്ഷ്യമിടുന്നത് ഇന്ത്യയെ ആണ്.

സാമ്പത്തിക തകര്‍ച്ചയിലേയ്ക്ക് വീണ് കൊണ്ടിരിക്കുന്ന ഇന്ത്യയ്ക്ക് അമേരിക്കയെ പിന്തുണയ്ക്കാതെ തരമില്ലാതാകുന്നു. ഇന്ത്യയെ അമേരിക്കന്‍ താവളമാക്കി മാറ്റുവാന്‍ ബ്രിട്ടീഷുകാരും പിന്നീട് സ്വതന്ത്ര ഇന്ത്യയുടെ രാഷ്ട്രീയവും സമ്മതിക്കാതിരുന്നത് മാറ്റി മറിക്കുവാന്‍ അമേരിക്കയെ മന്മോഹന്‍ സര്‍ക്കാര്‍ സഹായിക്കുമോ? ഇതിനെല്ലാം ഉത്തരം 2012 നല്‍കുമായിരിക്കും!

അറബ് വസന്തം കോഴിവസന്ത പോലെയാകുമോ?

2011-12-21T22:39:00.000-05:00

കൊട്ടി ഘോഷിക്കപ്പെട്ട അറബ് ഇന്റര്‍നെറ്റ് വിപ്ലവം ശരിക്കും ഉപദ്രവമായി മാറിയോ?

മിഡില്‍ ഈസ്റ്റിലുള്ള എണ്ണയുടെ മേലുള്ള പിടി അഴയാതിരിക്കുവാന്‍ അമേരിക്ക ഉള്‍പ്പെടെയുള്ള ലോക രാജ്യങ്ങള്‍ എന്തിനും തയ്യാറാകുമെന്ന് നാം കണ്ട് കൊണ്ടിരിക്കുന്നു. എന്നാല്‍ അമേരിക്കയ്ക്ക് കിട്ടിയ അടിയാണ് അറബ് വസന്തം അഥവാ മുല്ലപ്പൂ വിപ്ലവം. അവിടങ്ങളിലെ ഭരണകര്‍ത്താക്കള്‍ ഏകാധിപതികളും മറ്റും ആയിരുന്നുവെങ്കിലും അവിടെയുള്ള സ്ഥിരത അമേരിക്കയ്ക്കെന്ന പോലെ മറ്റ് ലോക രാജ്യങ്ങളും ആവശ്യമായിരുന്നു. എന്നാല്‍ ആ രാജ്യങ്ങളിലെ ജനങ്ങള്‍ നിശബ്ദമായി ഇതിനെ നേരിട്ട് കൊണ്ടിരുന്നത് ഗൌരവമായി അമേരിക്കയും മറ്റും കണ്ടില്ല എന്നതിന്റെ ബാക്കി പത്രമാണ് ചോര ചീന്താതെയുള്ള വിപ്ലവം.

വല്ല്യേട്ടന്‍ രാജ്യങ്ങള്‍ക്ക് എതിര്‍ക്കുവാന്‍ കഴിയുന്നില്ല എന്ന് കണ്ടതോടെ ആദ്യം അടുക്കുവാന്‍ മടിച്ച് നിന്ന ഇസ്ലാമിക എക്സ്ട്രിമിസ്റ്റുകള്‍ വിപ്ലവകാരികളുടെ കൂടെ കൂടി. ഇത് തന്നെയായിരുന്നു ലോക രാജ്യങ്ങളുടെയും പേടി. എന്നാല്‍ അറബ് വസന്തത്തിന്റെ പിടിയില്‍ നിന്ന് ബഹറൈന്‍ മുതലായവയെ സൌദിയെയും മറ്റും ഉപയോഗിച്ച് അടിച്ചമര്‍ത്തുവാന്‍ അമേരിക്ക ഉള്‍പ്പെടെയുള്ള രാജ്യങ്ങള്‍ക്ക് കഴിഞ്ഞു. ഇറാക്കില്‍ അമേരിക്ക പിന്മാറിയ അന്ന് തന്നെ ഷിയ-സുന്നി വിഭാഗങ്ങള്‍ അടി തുടങ്ങി. ഇതേ അടി മറ്റ് രാജ്യങ്ങളിലും വരുവാനിരിക്കുന്നു. ഇതിനിടയില്‍ എക്സ്ട്രിമിസ്റ്റുകള്‍ അധികാരം ഏറ്റെടുത്ത് കടുത്ത മത നിയമങ്ങല്‍ നടപ്പിലാക്കുവാന്‍ ഇറങ്ങി കഴിഞ്ഞു.

എതിര്‍ക്കുന്നവരെ എന്ത് ചെയ്യുമെന്ന് ഈജിപ്റ്റിലെ കാവല്‍ അധികാരികള്‍ കാട്ടി തരുന്നു. സമരമുഖത്ത് ഉണ്ടായിരുന്ന ഒരു വനിതയുടെ ഉടുതുണി പറിച്ചെടുത്ത് മാറിടത്തിന് നടുവില്‍ ബൂട്ടിട്ട കാലുകള്‍ കൊണ്ട് ആഞ്ഞ് ചവിട്ടുകയും കൂട്ടത്തോടെ തല്ലി ചതയ്ക്കുകയും ചെയ്യുന്ന ദയനീയ രംഗം ലോകം ഞെട്ടലോടെ കണ്ടിട്ട് ദിവസങ്ങള്‍ അധികമാകുന്നില്ല. ബ്ലൂ ബ്രാ ഗേള്‍ സംഭവം എന്ന് വിളി പേരില്‍ അറിയപ്പെട്ട ഇതിനെതിരെ വനിതകള്‍ രംഗത്തെത്തിറങ്ങി. എന്നാല്‍ വോട്ടെടുപ്പില്‍ ഇപ്പോള്‍ മുന്നിട്ട് നില്‍ക്കുന്ന മുസ്ലിം ബ്രദര്‍ ഹുഡുകാര്‍ ഈ സമരത്തെ അനുകൂലിച്ചില്ല എന്നത് ഗൌരവമേറിയതാണ്.

വനിതകള്‍ മുന്നിട്ടിറങ്ങിയ അറബ് വിപ്ലവത്തില്‍ ഇപ്പോള്‍ വനിതകള്‍ക്ക് കൂച്ച് വിലങ്ങിടുന്നത് കണ്ട് തുടങ്ങി. ഈജിപ്റ്റ് വിപ്ലവ സമയത്ത് അറസ്റ്റ് ചെയ്യപ്പെട്ട വനിതകളുടെ കന്യകാത്വം പരിശോധിച്ചതിനേക്കാള്‍ ഭീകരമായാണ് ഇപ്പോള്‍ അവിടെയുള്ള സമരമുഖത്തുള്ള വനിതകള്‍ നേരിടുന്നത്. ഈജിപ്റ്റില്‍ ഒരു വനിതയെ പട്ടാപകല്‍ തെരുവിലിട്ട് പട്ടാളക്കാര്‍ അപമാനിച്ചിട്ടും മുസ്ലീം ബ്രദര്‍ഹുഡ് അലപിക്കുന്നില്ല എന്നത് അവരുടെ എക്സ്ട്രിമിസം തുറന്ന് കാട്ടുന്നു!

അകത്തിരുന്നത് ഭീകരം എന്ന അവസ്ഥയിലേയ്ക്ക് കാര്യങ്ങള്‍ നീങ്ങുന്നു. സാമ്പത്തിക മാന്ദ്യത്തില്‍ നട്ടം തിരിയുന്ന വികസിത രാജ്യങ്ങള്‍ക്ക് അറബ് വസന്തം ശരിക്കും പുലി വാലായി മാറിയിരിക്കുന്നു!

വിലാസിനി ടീച്ചറുടെ റിയാലിറ്റി ഷോ!

2011-12-18T19:00:00.000-05:00

വിലാസിനി ടീച്ചര്‍ ഇന്ത്യാവിഷന്റെ താളത്തിന് നിന്ന് കൊടുത്ത് സ്വന്തം വില കളയരുതായിരുന്നു. എന്തിന് വേണ്ടിയായിരുന്നു ആശുപത്രിയില്‍ കിടക്കുന്ന അഴീക്കോടിനെ കാണുവാന്‍ വിലാസിനി ടീച്ചര്‍ ഈ റിയാലിറ്റി ഷോ നടത്തിയത്? (യൂ ട്യൂബ് ലിങ്ക്)

തനിക്ക് കാണണമെന്ന് പറഞ്ഞപ്പോള്‍ അതിന് അനുവദിച്ച അഴീക്കോടിനെ ടീച്ചര്‍ ഇങ്ങനെ അപമാനിക്കണമായിരുന്നോ?

മുല്ലപെരിയാര്‍ പെണ്‍കുട്ടികളുടെ എണ്ണം കൂട്ടുമോ?

2011-12-11T21:56:00.000-05:00

മുല്ലപെരിയാര്‍ ഡാമിനോട് അനുബന്ധിച്ച് ഉയര്‍ന്നിരിക്കുന്ന ബഹളം പെണ്‍കുട്ടികളുടെ എണ്ണം കൂട്ടുവാന്‍ സഹായിക്കുമോ?

കഴിഞ്ഞ ആഴ്ച പുറത്ത് വന്ന പുതിയ പഠനം അതിലേയ്ക്കാണ് വിരല്‍ ചൂണ്ടുന്നത്!

ഹ്യൂമണ്‍ റീപ്രൊഡക്ഷന്‍ ജേര്‍ണലിലൂടെ പുറത്ത് വന്ന പഠനം (ലിങ്ക്) ചിലിയില്‍ നടന്ന ഭൂകമ്പ സമയത്ത് (7.9 തീവ്രത) ആ പ്രദേശത്തുള്ള ഗര്‍ഭിണികളില്‍ അതുണ്ടാക്കിയ ഫലം പരിശോധിച്ചപ്പോള്‍ ഭൂകമ്പം ഉണ്ടായ സമയത്ത് രണ്ട്-മൂന്ന് മാസം ഗര്‍ഭിണി ആയിരുന്നവര്‍ നേരത്തെ പ്രസവിച്ചു എന്നും അവയില്‍ ഭൂരിപക്ഷം പെണ്‍കുട്ടികളും ആണെന്ന് തെളിഞ്ഞിരിക്കുന്നു. (പ്രെസ്സ് റിലീസ്)

സാധാരണ നേരത്തെ ജനിക്കുന്നവരില്‍ കൂടുതലായി ആണ്‍കുട്ടികളെയാണ് കണ്ട് വരിക. എന്നാല്‍ ചിലിയില്‍ ഈ സമയത്ത് നേരത്തെ ജനിക്കുന്ന പെണ്‍കുട്ടികളുടെ എണ്ണം സാധാരണയിലും കൂടുതലായി കണ്ടു. ആണ്‍ഭ്രൂണങ്ങള്‍ക്ക് പെണ്‍ഭ്രൂണങ്ങളെ അപേക്ഷിച്ച് വളരുവാന്‍ കൂടുതല്‍ ഊര്‍ജ്ജം വേണം. അതിനാല്‍ മാനസികമായ പിരിമുറുക്ക (സ്ട്രെസ്സ്) സമയത്ത് ആണ്‍ഭ്രൂണങ്ങള്‍ വളരാതെ അബോര്‍ട്ട് ആയി പോകുന്നു. ഇതാണ് ചിലിയില്‍ പെണ്‍കുട്ടികള്‍ കൂടുതല്‍ ഉണ്ടായതിന് കാരണമായി ഈ പഠനത്തില്‍ പറയുന്നു. പ്ലാസന്റയില്‍ ഉണ്ടാകുന്ന വ്യതിയാനങ്ങളാണ് ഇവയ്ക്ക് കാരണം എന്ന് പറഞ്ഞ് വെയ്ക്കുന്നു.

സ്ട്രെസ്സും, സെക്സും, അബോര്‍ഷനും, പ്രീടേം ജനനവും തമ്മിലുള്ള ബന്ധത്തെ കുറിച്ച് കൂടുതല്‍ പഠനം നടത്തേണ്ടിയിരിക്കുന്നു എന്ന് ഈ പഠനം വിലയിരുത്തുന്നു. മുല്ലപെരിയാര്‍ ഇഷ്യൂ മറ്റൊരു പഠനത്തിനുള്ള തുറുപ്പ് ചീട്ടാകുമോ?

999ന്റെ കാലക്കേട്!

2011-12-03T21:31:00.000-05:00

അങ്ങിനെ കേരളത്തിന് പുറകെ അമേരിക്കയിലും 999ന് കാലക്കേട്!

ഒബാമയ്ക്കെതിരെ 2012ല്‍ മത്സരിക്കുവാനുള്ള റിപ്പബ്ലിക്കന്‍ പ്രസിഡന്റ് സ്ഥാനാര്‍ത്ഥിക്ക് വേണ്ടി മത്സരിച്ചിരുന്ന 999 ഫെയിം ഹെര്‍മന്‍ കെയ്ന്‍ തല്‍ക്കാലം പ്രചരണം നിറുത്തി വെയ്ക്കുന്നു. അമേരിക്കയെ സാമ്പത്തിക കടത്തില്‍ നിന്ന് രക്ഷിക്കുവാന്‍ 9% നികുതി എന്ന ആശയവുമായി രംഗത്തെത്തി [9% business transaction tax; 9% personal income tax rate, and a 9% federal sales tax] റിപ്പബ്ലിക്കന്‍ പ്രസിഡന്റ് സ്ഥാനാര്‍ത്ഥിയാകുവാനുള്ള മത്സരത്തില്‍ മറ്റുള്ളവരെ പിന്തള്ളി മുന്നേറി കൊണ്ടിരുന്നപ്പോഴാണ് തുടര്‍ച്ചയായി വന്ന ലൈംഗിക ആരോപണങ്ങള്‍ കെയ്നിനെ ഉലച്ചത്.

ഏറ്റവും ഒടുവില്‍ 13 വര്‍ഷമായി തങ്ങള്‍ക്ക് ബന്ധമുണ്ടെന്ന് പറഞ്ഞ് ഒരു സ്ത്രീ രംഗത്തെത്തിയതോടെ ഗോഡ്ഫാദേര്‍ഴ്സ് പിസ മുന്‍ ചീഫ് എക്സിക്യൂട്ടീവ് ആയിരുന്ന ഹെര്‍മ്മന്‍ കെയ്ന്‍ താന്‍ മത്സരത്തില്‍ നിന്ന് തല്‍ക്കാലം വിട്ടുനില്‍ക്കുന്നു എന്ന് ശനിയാഴ്ച വെളിപ്പെടുത്തിയിരിക്കുന്നു.

ആരോപണങ്ങള്‍ ഉയര്‍ന്നതോടെ കെയ്നിന്റെ സ്പോണ്‍സര്‍മാര്‍ പിന്മാറുമെന്ന തിരിച്ചരിവായിരിക്കാം ഈ തീരുമാനത്തില്‍ എത്തിച്ചത്. പ്രൈമറി എന്നറിയപ്പെടുന്ന പാര്‍ട്ടി സ്ഥാനാര്‍ത്ഥി മോഹികളുടെ മത്സരത്തില്‍ പോലും ബില്ല്യണുകളാണ് ചെലവാക്കേണ്ടി വരിക. അത് സ്പോണ്‍സര്‍ ചെയ്യുന്നത് കേര്‍പ്പറേറ്റ് ഭീമന്മാര്‍ ഉള്‍പ്പെടെയുള്ളവരും. ലൈംഗിക ആരോപണം തുടര്‍ കഥയാകുമ്പോള്‍ അവയെല്ലാം നുണയാണെന്ന് പറയുമ്പോഴും സ്പോണ്‍സര്‍മാര്‍ക്ക് തങ്ങളുടെ കക്ഷിയുടെ വിജയത്തിലുള്ള വിശ്വാസം കുറയുമ്പോള്‍ സ്വാഭാവികമായും മറ്റൊരാളെ തിരയുമെന്നത് ബിസിനസ്സ്കാരനായ കെയ്നിന് മറ്റാരാളെക്കാളും അറിവുണ്ടാകും. അവരില്‍ നിന്ന് തുടര്‍ന്നും തനിക്ക് പിന്തുണ കിട്ടുമെന്ന് ഉറപ്പാകുവാന്‍ ഒരവസാന ശ്രമം നടത്തുകയായിരിക്കാം കെയ്ന്‍!

എന്തായാലും കേരളത്തില്‍ 999ല്‍ പിടിച്ച് പ്രശ്നങ്ങള്‍ ഉണ്ടാകുന്നതിന് പുറകെ അമേരിക്കയിലും 999 ഫെയിം ഹെര്‍മന്‍ കെയ്നിനും പ്രശ്നങ്ങള്‍ ഒഴിയുന്നില്ല.

ചെറുകിട കച്ചവടക്കാരെ പട്ടിണിയിലേയ്ക്ക്!

2011-11-24T18:53:00.001-05:00

അങ്ങിനെ ഒടുവില്‍ അത് സംഭവിച്ചു ട്രില്ല്യണ്‍ ഡോളര്‍ മൂല്യമുള്ള ഇന്ത്യയുടെ ചെറുകിട വിപണി വിദേശകുത്തകള്‍ക്ക് തുറന്ന് കൊടുത്തു!

സാമ്പത്തിക മാന്ദ്യത്തില്‍ നട്ടം തിരിയുന്ന കുത്തക കമ്പനികള്‍ക്ക് ആശ്വാസത്തിന്റെ പിടിവള്ളി ഒടുവില്‍ കോണ്‍ഗ്രസ്സ് സര്‍ക്കാര്‍ നല്‍കുന്നു. എന്നാല്‍ ലക്ഷക്കണക്കിന് വരുന്ന ഇന്ത്യന്‍ ചെറുകിട കച്ചവടക്കാരെയും അവരുടെ കുടുംബങ്ങളെയും പട്ടിണിക്കിട്ട് കൊണ്ടാണിത് എന്ന കാര്യം ജന വഞ്ചന നിത്യശീലമാക്കിയ കോണ്‍ഗ്രസ്സ് സര്‍ക്കാര്‍ മറക്കുന്നു!!!

അമേരിക്കയില്‍ വാള്‍മാര്‍ട്ടിനെതിരെ സമരം നടക്കുകയാണ്.* ലോക്കല്‍ ചെറുകിട കച്ചവടക്കാര്‍ക്ക് കച്ചവടം പോകുമെന്നും അമേരിക്കന്‍ ഉല്‍പ്പന്നങ്ങള്‍ക്ക് പകരം ചൈനയില്‍ നിന്നും സാധങ്ങള്‍ ഇറക്കുമതി ചെയ്ത് അമേരിക്കന്‍ നിര്‍മ്മാതാക്കളെ നശിപ്പിക്കുന്നു എന്നും പറഞ്ഞാണ് സമരം!

ആസിയന്‍ തുടങ്ങിയ കരാറുകള്‍ ഉണ്ടായതിന്റെ ഫലമാണ് നാം ഇന്ന് അനുഭവിക്കുന്ന വിലകയറ്റം എന്ന സത്യം സര്‍ക്കാരുകള്‍ സമ്മതിക്കില്ല. വിദേശത്ത് നിന്ന് കുറഞ്ഞ വിലയ്ക്ക് സാധനങ്ങള്‍ ഇറക്ക്മതി ചെയ്ത് തദ്ദേശീയ സാധനങ്ങളെ ഇല്ലാതാക്കി ഒടുവില്‍ വിപണി വിലയെ ഇറക്കുമതിക്കാര്‍ നിയന്ത്രിക്കുന്ന അവസ്ഥ ഇന്ന് ഇന്ത്യ നേരിട്ട് കൊണ്ടിരിക്കുന്നു. കുറഞ്ഞ വിലയ്ക്ക് ഇറക്ക്മതി ചെയ്ത് കൊള്ള ലാഭം ഉണ്ടാക്കുന്ന വമ്പന്മാര്‍ക്ക് ചൂട്ട് പിടിക്കാന്‍ നമ്മള്‍ തെരഞ്ഞെടുത്ത സര്‍ക്കാരും.

ഇതേ പ്രശ്നം തന്നെയാണ് റീട്ടെയില്‍ മേഖലയിലും ഉണ്ടാകുവാന്‍ പോകുന്നത്. തദ്ദേശീയ ഉല്പന്നങ്ങളെ കൊല ചെയ്ത് വിദേശീയ ഉല്പന്നങ്ങള്‍ ഇന്ത്യന്‍ വിപണിയില്‍ നിറച്ച് കൊള്ള ലാഭം കൊയ്യുക. ചൈനീസ് സാധനങ്ങള്‍ ഇനി വാള്‍മാര്‍ട്ടിന്റെ പാക്കില്‍‌ വില കൂടുതല്‍ നല്‍കി ജീവിക്കാം!!!

അഴിമതി കഥകള്‍ ഓരോന്നായി പുറത്ത് വന്ന് കൊണ്ടിരിക്കുന്നതിനടയില്‍ മറ്റൊരു ഭാവി കഥ ഇതില്‍ നിന്ന് ഉണ്ടാകുമോ?

*വാള്‍മാര്‍ട്ട് സമരം യു ട്യൂബ് ലിങ്ക് 99%ത്തിന്റെ പ്രതിഷേധം ഇവിടെ

വാല്‍കഷണം: അമേരിക്കയിലെ പോലെ മേടിച്ച സാധനങ്ങള്‍ 90 ദിവസത്തിനുള്ളില്‍ തിരിച്ച് കൊടുത്താല്‍ പണം തിരികെ തരുമെന്ന പോളിസി ഇന്ത്യയില്‍ എടുത്താല്‍ പാവം വാള്‍മാര്‍ട്ടിനെ മലയാളികള്‍ ഒറ്റയ്ക്ക് കുത്തു പാളയെടുപ്പിക്കും ;)

ഇപ്പോള്‍ കച്ചവടം നടത്തുന്നവര്‍ക്ക് ഭാവിയില്‍ വാള്‍മാര്‍ട്ടിന്റെ സെയിത്സ് വിഭാഗത്തില്‍ ജോലി ചെയ്ത് പട്ടിണി മാറ്റാമെന്ന് നമ്മട “ട്രിമ്പളങ്ങി” കെ.വി. തോമാസിന്റെ “വചനങ്ങള്‍‌” നാളെ മൊതല് കേള്‍ക്കാനുള്ള ഭാഗ്യം നമ്മക്ക് എണ്ടാക്വോ? എന്തോസള്‍ഫാനില് നമ്മ കേട്ടതാണല്ലാ....

സാമ്പത്തിക അസമത്വം അമേരിക്കയില്‍

2011-11-20T19:48:00.000-05:00

2009ല്‍ ടീ പാര്‍ട്ടി മൂവ്മെന്റ് എന്ന പ്രതിഷേധത്തിന് അമേരിക്ക സാക്ഷിയായി. രാഷ്ട്രീയമില്ലാതെ തുടങ്ങിയ ആ സമരം ഒടുവില്‍ റിപ്പബ്ലിക്കന്മാരുടെ അജണ്ട തുറന്ന് കാണിക്കപ്പെട്ടു. ഒബാമയുടെ ഭരണ രീതിയോട് റിപ്പബ്ലിക്കന്‍ പാര്‍ട്ടി “തണുപ്പന്‍” രീതി അവലംബിക്കുന്നതിനെ എതിര്‍ത്തവരായിരുന്നു ടീ പാര്‍ട്ടിയില്‍ ഭൂരിപക്ഷവും. റിപ്പബ്ലിക്കന്മാരുടെ കണ്ണിലുണ്ണിയായ കോച്ച് സഹോദരന്മാരാണ് ടീ പാര്‍ട്ടി സമരങ്ങള്‍ സ്പോണ്‍സര്‍ ചെയ്തിരുന്നതെന്ന ആരോപണങ്ങളും ഉയര്‍ന്നിരുന്നു.

പിന്നീട് വന്ന തെരഞ്ഞെടുപ്പുകളില്‍ റിപ്പബ്ലിക്കന്‍ ടീ പാര്‍ട്ടി സ്ഥാനാര്‍ത്ഥികള്‍ ഒഫീഷ്യല്‍ സ്ഥാനാര്‍ത്ഥികളെ കടത്തി വെട്ടി. എന്നാല്‍ ഈ കഴിഞ്ഞ തെരഞ്ഞെടുപ്പില്‍ വിചാരിച്ച വിജയം അവര്‍ക്ക് നേടുവാന്‍ കഴിഞ്ഞില്ല.

ഇന്ന് ലോകം നേരിടുന്ന സാമ്പത്തിക മാന്ദ്യത്തിന് തുടക്കമിട്ട കോര്‍പ്പറേറ്റ് ഭീമന്മാര്‍ പൊതുമുതല്‍ വാങ്ങി രക്ഷപ്പെട്ടു. എന്നാല്‍ മാന്ദ്യത്തിന്റെ ആഘാതം അനുഭവിക്കുന്നത് സാധാരണക്കാരും. മാന്ദ്യ സമയത്ത് സര്‍ക്കാര്‍ ആനുകൂല്യം വാങ്ങുവാന്‍ വന്‍ തുക മുടക്കി വാഷിങ്ടണ്‍ ഡി.സി.യില്‍ എത്തി തമ്പടിച്ചതും സാധാരണക്കാര്‍ക്ക് ജോലി നഷ്ടപ്പെടുമ്പോഴും കമ്പനി എക്സിക്യൂട്ടീവുകള്‍ വന്‍ തുക ചെലവാക്കി സുഖവാസ കേന്ദ്രങ്ങളില്‍ അര്‍മാദിച്ചിരുന്നതും പ്രസിഡന്റ് ഒബാമയുടെ വിമര്‍ശനങ്ങള്‍ക്ക് വരെ കാരണമായി.

സാധാരണക്കാര്‍ക്ക് ഉപകാരമാകുന്നതും എന്നാല്‍ ധനികരെ ബാധിക്കുന്നതുമായ നിയമങ്ങള്‍ ഒബാമ കൊണ്ടു വരുമ്പോഴെല്ലാം റിപ്പബ്ലിക്കന്മാര്‍ എതിര്‍പ്പ് പ്രകടിപ്പിച്ചു. തൊഴിലില്ലായ്മ രൂക്ഷമായി തന്നെ നില്‍ക്കുമ്പോഴും കോര്‍പ്പറേറ്റ് ഭീമന്മാര്‍ പൊതു സ്വത്ത് കൊണ്ട് തങ്ങളുടെ സ്വത്ത് കൂട്ടുന്നത് കണ്ട് സഹിക്ക വയ്യാതെയാണ് ഒടുവില്‍ മാസങ്ങള്‍ക്ക് മുന്‍പ് “ഒക്യുപ്പൈ വാള്‍സ്ട്രീറ്റ്” സമരം ആരംഭിക്കുന്നത്. പണം കടമെടുത്ത് പഠിക്കുന്നവര്‍ പ്രതീക്ഷയോടെ പുറത്തിറങ്ങുമ്പോള്‍ ജോലി കിട്ടാതിരിക്കുന്നത് തങ്ങളുടെ കടം കൂട്ടുന്നത് തിരിച്ചറിഞ്ഞവര്‍ക്ക് മറ്റ് മാര്‍ഗ്ഗങ്ങള്‍ ഇല്ലായിരുന്നു.

വാള്‍സ്ട്രീറ്റ് സമരക്കാര്‍ ഉയര്‍ത്തിയ മുദ്രാവാക്യം “വി ആര്‍ ദി 99%” എന്നതാണ്. അമേരിക്കയുടെ സമ്പത്ത് 1% ആളുകളാണ് കയ്യടക്കി വെച്ചിരിക്കുന്നതെന്ന സത്യം അവര്‍ വിളിച്ച് പറയുന്നു. സാമ്പത്തിക അസമത്വം മുന്‍പുള്ളതിനേക്കാള്‍ കൂടിയിരിക്കുന്നു.

ഈ പുതിയ പ്രതിഷേധ സമരത്തിലും രാഷ്ട്രീയ പാര്‍ട്ടികള്‍ ദൂരം പാലിച്ചു. റിപ്പബ്ലിക്കന്മാര്‍ക്ക് പഴയ പോലെ ഹൈജാക്ക് ചെയ്യുവാന്‍ കഴിയാത്ത അവസ്ഥയിലായിരുന്നു. കാരണം സമരം തങ്ങളുടെ കണ്ണിലുണ്ണികളായ വാള്‍സ്ട്രീറ്റിനെതിരെ ആണെന്നുള്ളത് തന്നെ. ഈ അവസരം മുതലെടുത്തത് തിരിച്ചടി നേരിട്ട് കൊണ്ടിരിക്കുന്ന യൂണിയന്‍ സംഘടനകളാണ്. തങ്ങളുടെ ആവശ്യങ്ങള്‍ കൂടി അനുക്കൂലിച്ചാല്‍ സഹായം നല്‍കാമെന്ന വ്യവസ്ഥയില്‍ സമരം അമേരിക്കയില്‍ പച്ച പിടിച്ചു. യൂണിയനുകള്‍ മൂലം സമരത്തെ നാനാ തുറയിലുള്ളവര്‍ പിന്തുണച്ച് തുടങ്ങി.

സമരത്തെ വമ്പന്മാര്‍ പലരും അവഗണിച്ചുവെങ്കിലും കോര്‍പ്പറേറ്റ് ബാങ്കുകളെ ഒഴിവാക്കി ക്രെഡിറ്റ് യൂണിയന്‍ ബാങ്കുകളിലേയ്ക്ക് പണം മാറ്റുവാന്‍ ബാങ്ക് ട്രാന്‍സ്ഫര്‍ ദിനം ഉപയോഗപ്പെടുത്തണം എന്ന സമരക്കാരുടെ ആഹ്വാനം ജനങ്ങള്‍ സ്വീകരിക്കുന്നു എന്ന് കണ്ടതോടെ വമ്പന്മാര്‍ രംഗത്തിറങ്ങി തുടങ്ങി. ബാങ്ക് സംഘടനകള്‍ “ഒക്യുപ്പൈ വാള്‍സ്ട്രീറ്റ്” സമരത്തെ തകര്‍ക്കുവാന്‍ രംഗത്ത് എത്തി കഴിഞ്ഞു. ഇതിന്റെ ആദ്യ പടിയായി $8.5 ലക്ഷം ചെലവഴിക്കുവാന്‍ അവര്‍ തീരുമാനിച്ച് കഴിഞ്ഞു. ആഴ്ചകള്‍ക്ക് ശേഷം ന്യൂയോര്‍ക്കില്‍ ഉള്‍പ്പെടെ പലയിടത്തും സമരക്കാരെ പൊതു സ്ഥലത്ത് നിന്ന് ബലമായി ഒഴിപ്പിച്ച് തുടങ്ങി.

ഇതിനിടയില്‍ ഞായറാഴ്ച ഫോര്‍ബ്സ് സൈറ്റില്‍ റോബര്‍ട്ട് ലെന്‍സ്നര്‍ എഴുതിയ ലേഖനം ഇന്നത്തെ അമേരിക്കയിലെ സ്വത്തിന്റെ അസമത്വത്തിന്റെ യാഥാര്‍ത്ഥ്യം തുറന്ന് കാട്ടുന്നു.

ധനികരായ 0.1% ആളുകളില്‍ സമ്പാദ്യം കൂടുന്നത് “ക്യാപ്പിറ്റല്‍ ഗെയിന്‍”ല്‍ (ഷെയര്‍‌, ബോണ്ട്, റിയല്‍ എസ്റ്റേറ്റ്) നിന്നും ആണ്. ഇത് ഫോര്‍ബ്സ് 400ല്‍ വരുന്ന ധനികരുടെ വരുമാനത്തിന്റെ 60% വരുമത്രേ. ഇതിന് കാരണം ഇങ്ങനെയുള്ള സമ്പാദ്യത്തിന് സര്‍ക്കാര്‍ നല്‍കി വരുന്ന വന്‍ നികുതി ഇളവുകളാണ്. സാധാരണക്കരുടെ വരുമാനം പ്രധാനമായും ആശ്രയിച്ചിരിക്കുന്നത് ശമ്പളത്തില്‍ നിന്നും ആണ്. അത് കാലത്തിന് അനുസരിച്ച് ഉയരുന്നില്ല എന്ന് മാത്രമല്ല നികുതി കൂടുന്നത് അനുസരിച്ച് കുറയുകയും ചെയ്യുന്നു. എന്നാല്‍ നികുതി ഇളവ് ലഭിക്കുന്നതിനാല്‍ 1% ധനികരുടെ സമ്പത്ത് കൂടി കൊണ്ടിരിക്കുന്നു. അവര്‍ക്ക് നഷ്ടം വരുമ്പോള്‍ ഗവണ്മെന്റ് പൊതുമുതലില്‍ നിന്ന് എടുത്ത് കൊടുക്കുന്നു! വരുമാനമുള്ള 300 മില്ല്യണ്‍ ജനങ്ങളില്‍ തന്നെ 0.1% വരുന്ന 3 ലക്ഷത്തിനടുത്ത് ജനങ്ങള്‍ക്കാണ് അമേരിക്കയുടെ സ്വത്തിന്റെ ഭൂരിഭാഗവും എന്നത് തന്നെ അമേരിക്കയില്‍ നടന്ന് വരുന്ന “ഒക്ക്യുപ്പൈ വാള്‍സ്ട്രീറ്റ്” സമരങ്ങള്‍ക്ക് പുതിയ മുഖം നല്‍കുന്നു.

രാജ്യത്തിന്റെ സ്വത്ത് ചെറിയ ഒരു കൂട്ടം ആളുകളുടെ കയ്യില്‍ കുമിഞ്ഞ് കൂടും അല്ലെങ്കില്‍ രാജ്യത്ത് ജനാധിപത്യം ഉണ്ടാകും എന്നാല്‍ ഇത് രണ്ടും ഒരുമിച്ച് നടക്കില്ല എന്ന മുന്‍ ജസ്റ്റിസ് ലൂയിസ് ഡി. ബ്രാന്‍ഡിസിന്റെ വാക്കുകള്‍ ചൂണ്ടി കാട്ടിയാണ് ലെന്‍സ്നര്‍ തന്റെ ലേഖനം അവസാനിപ്പിക്കുന്നത്. ലേഖനത്തിന്റെ അവസാനം പറയുന്നത് പോലെ “ക്യാപിറ്റല്‍ ഗെയിന്‍” നികുതി കൂട്ടി അസമത്വത്തിന്റെ തോത് കുറയ്ക്കുവാന്‍ ഇരു രാഷ്ട്രീയ പാര്‍ട്ടിക്കാരും തയ്യാറാകേണ്ടിയിരിക്കുന്നു.

തങ്ങളുടെ നികുതി കൂട്ടുക എന്ന് പറഞ്ഞ് ധനികരില്‍ പലരും മുന്നോട്ട് വന്നിരിക്കുന്നു. ഒബാമയുടെ നിര്‍ദ്ദേശം ഇത് തന്നെയാണ്. എന്നാല്‍ റിപ്പബ്ലിക്കന്മാര്‍ക്ക് ഇത് ദഹിക്കുകയില്ല. അവര്‍ക്ക് സാധാരണ ജനങ്ങളെ പിഴിഞ്ഞ്, ജനങ്ങള്‍ക്ക് കൊടുക്കുന്ന സര്‍ക്കാര്‍ ആനുകൂല്യങ്ങള്‍ വെട്ടി കുറച്ച് വേണം രാജ്യത്തിന്റെ കടം കുറയ്ക്കുവാന്‍!

ഇതിനിടയില്‍ സാധാരണക്കാര്‍ന് ലഭിക്കുന്ന നികുതി ഇളവ് ഈ കൊല്ലം അവസാനത്തോടെ പുതുക്കിയില്ലെങ്കില്‍ അടുത്ത കൊല്ലം ശമ്പളത്തിലും, തൊഴില്ലാത്തവര്‍ക്ക് ലഭിക്കുന്ന ആനുകൂല്യത്തിലും കുറവ് വരും.

വാള്‍സ്ട്രീറ്റ് സമരത്തിന് ഇനി എന്ത് സംഭവിക്കും? വന്നു ചേര്‍ന്നിരിക്കുന്ന തണുത്ത കാലാവസ്ഥ ഈ സമരത്തെ തണുപ്പിക്കുമോ അതോ കോര്‍പ്പറേറ്റ് ഭീമന്മാര്‍ നേരിട്ട് രംഗത്തിറങ്ങി ഈ സമരത്തെ ഇല്ലാതാക്കുമോ? അതോ കോര്‍പ്പറേറ്റുകള്‍ക്ക് കൂടുതല്‍ ആനുകൂല്യങ്ങള്‍ ലഭിക്കുമ്പോള്‍ തങ്ങളുടെ ഉള്ള വരുമാനം കുറയുകയും കൂട്ടത്തില്‍ അവശ്യ സാധനങ്ങള്‍ക്ക് വില കൂടുകയും ചെയ്യുന്നത് കാണുമ്പോള്‍ കൂടുതല്‍ ആളുകള്‍ സമര മുഖത്തേയ്ക്ക് വരുമോ? കാത്തിരുന്ന് കാണാണേണ്ടിയിരിക്കുന്നു.

സ്വയാശ്രയ പഠനം സാമൂഹിക പ്രശ്നമാകുമ്പോള്‍

2011-11-13T13:55:00.000-05:00

കൊട്ടിഘോഷിക്കപ്പെട്ട സ്വയാശ്രയ പ്രൊഫഷണല്‍ കോളേജുകളുടെ മറയ്ക്കപ്പെട്ട വികൃതമുഖം പുറത്തായി.

കഴിഞ്ഞ 5 വര്‍ഷമായിട്ട് വെറും 10% മാത്രമാണ് കേരളത്തിലെ സ്വയാശ്രയ എഞ്ജിനീയറിങ്ങ് കോളേജുകളുടെ വിജയ ശതമാനം! കഴിഞ്ഞ 5 വര്‍ഷത്തിനുള്ളില്‍ മെറിറ്റ് അടിസ്ഥാനത്തില്‍ പ്രവേശനം നടത്തുന്ന സര്‍ക്കാര്‍ കോളേജുകള്‍ 80% വിജയം നേടിയപ്പോള്‍ പണത്തിന്റെ പിന്‍ബലത്തില്‍ മാത്രം പ്രവേശനം നേടാന്‍ കഴിയുന്ന സ്വയാശ്രയ എഞ്ജിനീയറിങ്ങ് കോളേജുകളില്‍ പരാജയ ശതമാനം 60 മുതല്‍ 90% വരെ എന്നാണ് വിവരാവകാശ നിയമം വഴി ലഭിച്ച രേഖകകള്‍ വിളിച്ച് പറയുന്നത്!

സ്വയാശ്രയ കോളേജുകളിലെ പേയ്മെന്റ് സീറ്റുകളിലെ വിജയ ശതമാനം എത്ര എന്നത് നോക്കിയാലേ യഥാര്‍ത്ഥ വികൃതചിത്രം വ്യക്തമാവുകയുള്ളൂ.

എഞ്ജിനീയറിങ്ങ് മാത്രമല്ല മെഡിക്കല്‍ കോളേജുകളുടെ ഫലവും ഇത് തന്നെയായിരിക്കണം.

എം.ജി. സര്‍വ്വകലാശാലയിലെ ആദ്യ സ്വയാശ്രയ മെഡിക്കല്‍ ബാച്ചിലെ 90% പേര്‍ക്കും ആദ്യ സെമസ്റ്ററില്‍ പരീക്ഷയ്ക്കിരിക്കുവാന്‍ കട്ടൌട്ട് മാര്‍ക്ക് എടുത്ത് കളയുവാന്‍ സിന്തിക്കേറ്റ് തീരുമാനിച്ചതിനെതിരെ ശക്തമായ സമരം സര്‍വ്വകലാശാല ആസ്ഥാനം കണ്ടതാണ്. അന്ന് തന്നെ സ്വയാശ്രയ കോളേജുകള്‍ വിദ്യാര്‍ത്ഥികളെ വഞ്ചിക്കുകയാണെന്ന് അറിഞ്ഞിരുന്നുവെങ്കിലും മാധ്യമങ്ങള്‍ അതിലേയ്ക്ക് ശ്രദ്ധ കേന്ദ്രീകരിച്ചില്ല. എന്തിനേയും ഏതിനേയും വാര്‍ത്തയാക്കുന്ന മാധ്യമങ്ങള്‍ സ്വയാശ്രയ കോളേജുകളുടെ നിലവാരത്തെ പറ്റി അജ്ഞത നടിച്ചു.

എന്നാല്‍ ഇപ്പോള്‍ സേവ് എഡ്യുക്കേഷന്‍ കമ്മിറ്റി ചെയര്‍മാന്‍ ഷാജര്‍ഖാന്‍ എല്ലാവരും പ്രതീക്ഷിച്ചിരുന്ന ആ സത്യം വെളിയില്‍ കൊണ്ടു വന്നു.

ആര്‍‌.വി.ജി. മേനോന്റെ അഭിപ്രായത്തില്‍ ഇത് ഒരു സാമൂഹിക പ്രശ്നമായി മാറുകയാണ്. ജയിക്കുന്നതിനുള്ള 40% അറിവ് പോലുമില്ലാതെ പരാജിതരായി പുറത്തിറങ്ങുന്ന എഞ്ജിനീയറിങ്ങിന് പഠിക്കുവാന്‍ കയറിയവര്‍ ജോലിക്കായി +2 യോഗ്യതയുമായി അലയേണ്ട ഗതികേട്.

പണം കൊണ്ട് അഡ്മിഷന്‍ കിട്ടുമായിരിക്കും എന്നാല്‍ വിജയിക്കണമെങ്കില്‍ പണം മാത്രം പോര എന്നത് ഇനിയെങ്കിലും രക്ഷിതാക്കളും വിദ്യാര്‍ത്ഥികളും തിരിച്ചറിയേണ്ടിയിരിക്കുന്നു.

ഒരു പക്ഷേ എം.ജി.യില്‍ ഈ ഇടയ്ക്ക് കണ്ടത് പോലെ പണം കൊടുത്താല്‍ ഡിഗ്രിയും കിട്ടുമായിരിക്കും എന്നാല്‍ അതുമായി ജോലിക്ക് ശ്രമിക്കുമ്പോള്‍‌! പക്ഷേ ഭീകരമാവുക പണം കൊടുത്ത് മെഡിക്കല്‍ ഡിഗ്രി കിട്ടുന്നുവെങ്കിലാണ്. പാവം രോഗികള്‍‌! തമാശയായി പറയുന്നത് പോലെ ഡോക്റ്റര്‍മാര്‍ ഇനി മുതല്‍ എം.ബി.ബി.എസ്സ്. എന്നതിന്റെ കൂടെ ബ്രാക്കറ്റില്‍ മെറിറ്റ് അഡ്മിഷന്‍ എന്ന് കൂടി എഴുതേണ്ടി വരുമോ?

സമൂഹത്തിന് ബാധ്യതയായി ഒരു കൂട്ടം ചെറുപ്പക്കാരെ ഇങ്ങനെ ഇറക്കി വിടേണ്ടതുണ്ടോ എന്ന് ഇനിയെങ്കിലും സര്‍ക്കാരുകളും രക്ഷിതാക്കളും ചിന്തിക്കേണ്ടിയിരിക്കുന്നു.

വൈറ്റമിന്‍ Eയെ ആണുങ്ങള്‍ സൂക്ഷിക്കുക!

2011-10-14T22:17:00.000-04:00

വൈറ്റമിന്‍ ഇ യുടെ ഉപയോഗം പ്രോസ്റ്റേറ്റ് ക്യാന്‍സര്‍ ഉണ്ടാക്കുമെന്ന വാര്‍ത്ത പുറത്ത് വന്നിരിക്കുന്നു!!!
ശരീരത്തിലുണ്ടാകുന്ന ഫ്രീറാഡിക്കലുകളെ നശിപ്പിച്ച് ക്യാന്‍സറില്‍ നിന്നും മറ്റും സംരക്ഷിക്കുമെന്ന് വിശ്വസിച്ചിരുന്ന വൈറ്റമിന്‍ ഇ ഇപ്പോള്‍ വില്ലനായി മാറിയിരിക്കുന്നു. സൂര്യകാന്തി, പാം ഓയില്‍ തുടങ്ങിയ എണ്ണകളും, നട്ട്സ്, തവിടുള്ള ധാന്യങ്ങള്‍‌, തക്കാളി, ചതാവരി (ആസ്പരാഗസ്), പപ്പായ, അവക്കാഡ, സൊയാബീന്‍ തുടങ്ങിയവയാണ് വൈറ്റമിന്‍ ഇ യുടെ കലവറ. ക്യാന്‍സര്‍ കുറയ്ക്കുമെന്ന വിശ്വാസം ശരിയല്ല എന്നും എന്നാല്‍ പ്രൊസ്റ്റേറ്റ് ക്യാന്‍സര്‍ ഉണ്ടാകുവാനുള്ള സാധ്യത കൂടുതലാണെന്നും ഇപ്പോള്‍ തെളിഞ്ഞിരിക്കുന്നു.

5.5 കൊല്ലം തുടര്‍ച്ചയായി ദിവസേന 400 IU എന്ന അളവില്‍ വൈറ്റമിന്‍ ഇ നല്‍കുകയും പിന്നീട് അവരെ 1.5 വര്‍ഷം കൂടി നിരീക്ഷിക്കുകയും ചെയ്തതിന്റെ പുതിയ ഫലങ്ങളാണ് പുറത്ത് വിട്ടത്. സെലീനിയവും വൈറ്റമിന്‍ ഇ യും ഒരുമിച്ച് കഴിച്ചാല്‍ പ്രൊസ്റ്റേറ്റ് ക്യാന്‍സര്‍ ഉള്‍പ്പെടെയുള്ള ചില ക്യാന്‍സറുകള്‍ കുറയ്ക്കാമെന്ന നിരീക്ഷണം ശരിയാണോ എന്ന് അറിയുവാന്‍ Selenium and Vitamin E Cancer Prevention Trial (SELECT) എന്ന പേരില്‍ നടത്തിയ 7 കൊല്ലത്തെ പരീക്ഷണ നിരീക്ഷണങ്ങളുടെ ഫലമാണിത്.

കടപ്പാട്: SWOG

2008ല്‍ തന്നെ സെലീനിയവും വൈറ്റമിന്‍ ഇ യും ഒരുമിച്ചോ ഒറ്റയ്ക്കോ കഴിക്കുന്നത് കൊണ്ട് പ്രത്യേകിച്ച് ഗുണം ഒന്നുമില്ല എന്ന് തിരിച്ചറിഞ്ഞിരുന്നു. എന്നാല്‍ അതിന് ശേഷം ഈ പരീക്ഷണങ്ങള്‍ക്ക് വിധേയരായവരില്‍ നടത്തിയ നിരീക്ഷണങ്ങളില്‍ നിന്നാണ് വൈറ്റമിന്‍ ഇ മാത്രം കഴിച്ചവരില്‍ പ്രൊസ്റ്റേറ്റ് ക്യാന്‍സര്‍ ഉണ്ടാകുന്നത് മറ്റുള്ളവരില്‍ നിന്നും 17% കൂടുതലാണെന്ന് കണ്ടെത്തിയത്. പരീക്ഷണത്തിന് വിധേയരായ മുഴുവന്‍ പേരെയും തിരിച്ച് കൊണ്ടു വന്ന് നിരീക്ഷണം നടത്തുവാന്‍ ഇപ്പോള്‍ സെലെക്റ്റ് തയ്യാറായിരിക്കുന്നു.

സ്റ്റാര്‍ സിംഗറും, എം.ജി.യും, ഓട്ടിസവും

2011-10-09T13:22:00.000-04:00

സുകേശ് കുട്ടന്‍. ആ പേര് കേള്‍ക്കുമ്പോള്‍ സ്റ്റാര്‍ സിംഗര്‍ എന്ന പ്രോഗ്രാം കാണുന്നവര്‍ സഹതാപത്തോടെ ആ രൂപം ഓര്‍ക്കും. ചെവി രണ്ടും പിടിച്ച് സ്ലോമോഷനില്‍ പോകുന്ന ഒരു രൂപം.

സുകേശ് കേരളത്തില്‍ അവതരിപ്പിക്കപ്പെടേണ്ടത് അങ്ങിനെ ആയിരുന്നോ? നാലാം വയസ്സില്‍ ഓട്ടിസമെന്ന് തിരിച്ചറിഞ്ഞ് മാനസികമായി തകര്‍ന്ന രക്ഷിതാക്കളോട് താനും ഇതേ അവസ്ഥയിലൂടെ കടന്ന് പോയതാണെന്ന് പറഞ്ഞ് ധൈര്യം കൊടുത്ത വെല്ലൂരിലെ ആ ഡോക്റ്റര്‍ ചെയ്ത പോലെ സുകേശിന്റെ രക്ഷിതാക്കളെയും അവതരിപ്പിച്ചിരുന്നു എങ്കില്‍‌. ആ നാലാം വയസ്സുകാരനെ ഇന്നത്തെ നല്ല ഗായകനാക്കി മാറ്റിയ, ലോകത്തോട് പോടെ പുല്ലേ എന്ന് പറയുവാന്‍ കഴിയുന്ന സുകേശ് കുട്ടനാക്കി മാറ്റിയ ആ രക്ഷിതാക്കളും അവന്റെ സ്കൂളുകളും ഇതേ അവസ്ഥയുള്ള കുട്ടികളുടെ രക്ഷിതാക്കള്‍ക്ക് ആത്മ വിശ്വാസം പകരുന്ന തരത്തിലായിരിക്കണമായിരുന്നു.

ദേഷ്യം വരുമ്പോള്‍ ചെവി രണ്ടും പിടിച്ച് വാശി പിടിക്കുന്ന സുകേശിന്റെ അവസ്ഥയല്ല മറിച്ച് പുഞ്ചിരിയോടെ ഗാനങ്ങള്‍ ആലപിക്കുന്ന, ഓര്‍ക്കിസ്ട്രക്കാര്‍ തെറ്റ് വരുത്തിയാല്‍ രൂക്ഷമായി നോക്കുന്ന, തനിക്ക് തെറ്റ് പറ്റിയാല്‍ ചൂണ്ടി കാട്ടുന്ന സുകേശിനെയായിരുന്നു ഹൈലൈറ്റ് ചെയ്യേണ്ടിയിരുന്നത്. ആ സുകേശ് മാത്രമേ തന്റെ കുട്ടിക്കും ഓട്ടിസമാണെന്ന് അറിഞ്ഞ രക്ഷിതാക്കള്‍ക്ക് ആത്മവിശ്വാസം നല്‍കുകയുള്ളൂ.

വര്‍ഷങ്ങള്‍ക്ക് മുന്‍പ് സുകേശിന്റെ രക്ഷിതാക്കള്‍ക്ക് ധൈര്യം പകര്‍ന്ന വെല്ലൂരിലെ ആ ഡോക്റ്റര്‍ ചെയ്തത് പോലെ വേണമായിരുന്നു സ്റ്റാര്‍ സിംഗര്‍ സുകേശിനെ അവതരിപ്പിക്കേണ്ടിയിരുന്നത്. മറ്റ് രക്ഷിതാക്കള്‍ക്ക് ആത്മ ധൈര്യം കൊടുക്കുന്ന ഒരു ഉദാഹരണമാക്കേണ്ടതിന് പകരം തങ്ങളുടെ വ്യൂവര്‍ഷിപ്പ് കൂട്ടുവാന്‍ സാധാരണക്കാരില്‍ നിന്ന് വേറിട്ടുള്ള പ്രവര്‍ത്തികളെ ഹൈലൈറ്റ് ചെയ്ത് സെന്റി മ്യൂസിക്കും ഇട്ട് സ്വയം തരം താഴുന്ന അവസ്ഥ സ്റ്റാര്‍ സിംഗര്‍ ഒഴിവാക്കേണ്ടിയിരുന്നു! സാധാരണക്കാരില്‍ നിന്ന് വ്യത്യസ്തമായി ജീവിക്കുന്നവരെ വിളിച്ച് വരുത്തി ഇങ്ങനെ അപമാനിക്കുന്നവരുടെ പ്രവര്‍ത്തനങ്ങള്‍ എന്ന് നില്‍ക്കും.

മറ്റുള്ളവര്‍ എഴുന്നേറ്റ് നിന്ന് കൈയ്യടിച്ചപ്പോള്‍ എം.ജി. ശ്രീകുമാര്‍ മാത്രം എഴുന്നേല്‍ക്കുവാന്‍ ബുദ്ധിമുട്ടിയത് എന്ത് കൊണ്ട്? പലതിനെയും പോലെ ഇതിലെ രഹസ്യം മലയാളികള്‍ താമസിയാതെ മനസ്സിലാകുമെന്ന് കരുതാം. താന്‍ ഈ കുട്ടിയെ നേരത്തെ അറിയുമെന്ന് എല്ലാവരെയും അറിയിക്കുവാന്‍ വെമ്പല്‍ കൊണ്ട എം.ജി.യെ നാം കണ്ടു. കുട്ടന് 2-3 പ്രാവശ്യം വോയ്സ് ഓഫ് അറേബിയയില്‍ ഒന്നാം സമ്മാനം ഈ കൈ കൊണ്ട് തന്നിട്ടുണ്ട് എന്ന് പറയുമ്പോള്‍ കള്ളം പറയാനറിയാത്ത സുകേശ് ഇല്ല ഇല്ല ഫസ്റ്റ് ഇല്ല എന്ന് പറയുന്നത് കേട്ടിട്ടെങ്കിലും ഡീമ്പ് പറയല്‍ ഇനി എം.ജി. നിര്‍ത്തുക. ഏത് വര്‍ഷമാണ് ഒന്നാം സമ്മാനം കൊടുത്തത് (!) എന്ന് സുകേശിന് പറഞ്ഞ് കൊടുക്കുവാന്‍ എം.ജി. തയ്യാറാകുമായിരിക്കും!

കൂടാതെ ചിരിക്കുട്ടന്‍ എന്ന പേരില്‍ അറിയപ്പെടുന്ന കപടനാട്യക്കാരന്‍ ഒന്നറിയുക താങ്കളുടെ “പ്രശസ്തി” ഒരു പക്ഷേ മത്സരാര്‍ത്ഥികളെ കൊണ്ട് എതിര്‍ത്ത് പറയിക്കില്ലായിരിക്കും. പക്ഷേ കപടതകള്‍ ഒന്നുമറിയാത്ത സുകേശ് കുട്ടന്മാര്‍ താങ്കളെ പോലെയുള്ളവര്‍ പറയുന്ന കപടതകള്‍ക്ക് ഉടനെ മറുപടി തരും എന്ന് ഓര്‍ക്കുന്നത് നല്ലത്. താങ്കള്‍ക്ക് “മറവി” ഉണ്ടാകുമെങ്കിലും അവര്‍ക്ക് നല്ല “ഓര്‍മ്മ” കാണും..

ലോകത്ത് 1000ത്തില്‍ 1 കുട്ടിക്ക് തലച്ചോറിനെ ബാധിക്കുന്ന ഓട്ടിസം എന്ന അവസ്ഥയുണ്ടാകുന്നു. അമേരിക്കയിലാകട്ടെ 1000ത്തില്‍ 9 ആണ്! സാധാരണ കുട്ടികളില്‍ നിന്ന് പെട്ടെന്ന് ഇവരെ തിരിച്ചറിയുവാന്‍ കഴിയില്ല. എങ്കിലും ഇവരുടെ പ്രത്യേകത കാര്യങ്ങള്‍ ആവര്‍ത്തിച്ച് ചെയ്യുക, മറ്റുള്ളവരുമായി ഇടപെടാതിരിക്കുക എന്നതാണ്. എപ്പോഴും സാധനങ്ങള്‍ അടുക്ക് അടുക്കായി വെയ്ക്കുക, നിര നിരയായി വെയ്ക്കുക എന്നതാണ്. സ്വയം മുറിവേല്‍പ്പിക്കുക എന്നതും ഈ കൂട്ടരില്‍ സാധാരണമാണ്.

2006ല്‍ സുകേശിനെ കുറിച്ച് ഗള്‍ഫ് ന്യൂസില്‍ വന്ന വാര്‍ത്തയുടെ തലകെട്ട് “Music helps autistic teenager overcome condition” എന്നതായിരുന്നു. അതിനും മുന്‍പ് 2001ല്‍ അവര്‍ എഴുതിയത് “A song of hope” എന്നാണ്.

സുകേശിനെ ഇത്തരത്തില്‍ ജീവിതത്തെ നേരിടുവാന്‍ പഠിപ്പിച്ച രക്ഷിതാക്കള്‍ക്ക് പുറമേ സ്പെഷല്‍ നീഡ് കുട്ടികളെ സ്വന്തം കാലില്‍ നില്‍ക്കുവാന്‍ പഠിപ്പിക്കുന്ന ഗള്‍ഫിലെ Al Noor Training Centre For Children With Special Needs എന്ന സ്കൂളിനെയും, ഇത്തരം കുട്ടികളുടെ സംഗീതത്തിലെ വാസന തിരിച്ചറിഞ്ഞ് പ്രോത്സാഹിപ്പിക്കുന്ന, സുകേശിനെ പ്രോത്സാഹിപ്പിച്ച Sruthi Music and Dance Institute സ്കൂളിനെയും അഭിനന്ദിക്കുന്നു. ഇവരൊക്കെയും അത്തരം കുട്ടികളുടെ രക്ഷിതാക്കള്‍ക്ക് ജീവിതം മുന്നോട്ട് കൊണ്ടു പോകുവാനുള്ള ഊര്‍ജ്ജം നല്‍കുന്നവരാണ്.

ചുറ്റുമുള്ളവരുടെ പരിചരണം കൊണ്ട് ഓട്ടിസം വന്നവര്‍ക്ക് സാധാരണ ജീവിതത്തിലേയ്ക്ക് കുറേ എങ്കിലും തിരിച്ച് വരാം എന്ന് സുകേശിലൂടെ അവന്റെ രക്ഷിതാക്കളും, സ്കൂള്‍ നടത്തിപ്പുകാരും, അവന്റെ സ്വന്തക്കാരും നമുക്ക് കാട്ടി തരുന്നു.

സ്റ്റാര്‍ സിംഗര്‍ കാണിച്ചതിലും എനിക്കിഷ്ടമായത് ഈ വീഡിയോ ആണ്.

പുതുവത്സര ആശംസകള്‍

2011-09-28T20:29:00.000-04:00

ഇന്ന് ഡിപ്പാര്‍ട്ട്മെന്റ് മീറ്റിങ്ങിന് ശേഷം ചെയര്‍ പേഴ്സണ്‍ പുതുവത്സര ആശംസകള്‍ നേര്‍ന്നപ്പോള്‍ ഒന്ന് ഞെട്ടി. വര്‍ഷം തീരുവാന്‍ മാസങ്ങള്‍ മാത്രമുള്ളപ്പോള്‍‌! പിന്നീടാണ് ഓര്‍ത്തത് 29നാണ് ജൂതരുടെ പുതിയ വര്‍ഷം (Rosh Hashanah) ആരംഭിക്കുന്നത്.

നാട്ടില്‍ ജൂതരും ജൂത പള്ളിയും (സിനഗോഗ്) ഉള്ള സ്ഥലത്തായിരുന്നു വാസമെങ്കിലും ജൂതരുടെ ആഘോഷങ്ങള്‍ അടുത്തറിയുന്നത് ഇവിടെ വന്നപ്പോഴാണ്. കോഷര്‍ ഭക്ഷണത്തെ പറ്റി മനസ്സിലാക്കിയതും, ഇവര്‍ക്ക് ഭക്ഷണത്തിന് ഇത്രയേറെ നിര്‍ബന്ധങ്ങള്‍ ഉണ്ടെന്നും അറിഞ്ഞത് ഇവിടെ എത്തിയ ശേഷമാണ്.

സ്ലൈഡ് കൊണ്ട് തലയില്‍ കൊച്ച് തൊപ്പി പിടിപ്പിച്ച് നടന്ന് പോകുന്ന കുട്ടികളെ കാണുമ്പോള്‍ നാട്ടില്‍ മദ്രസകളിലേയ്ക്ക് വെള്ള തൊപ്പിയും അണിഞ്ഞ് പോകുന്ന കുട്ടികളെ ഓര്‍മ്മ വരും.

പറഞ്ഞ് വന്നത് 29ന് ജൂതരുടെ പുതിയ വര്‍ഷത്തിന് തുടക്കം കുറിക്കുന്നു. പുതു വര്‍ഷത്തെ വരവേല്‍ക്കുവാന്‍ അവര്‍ തേനും ആപ്പിളും ഈന്തപ്പഴവും മറ്റും കഴിക്കുന്നു. മധുരതരമായ ഒരു നല്ല വര്‍ഷത്തിന് വേണ്ടി.

അങ്ങിനെ ഒരു വര്‍ഷത്തില്‍ കടന്ന് വരുന്ന പല പുതുവത്സര ആഘോഷങ്ങള്‍ക്കൊപ്പം മറ്റൊന്ന് കൂടി.

പുതുവത്സര ആശംസകള്‍ .....

911 ഓര്‍മ്മിക്കുമ്പോള്‍

2011-09-11T11:49:00.001-04:00

അത്യാവശ്യ സര്‍വ്വീസിനായി വിളിക്കുന്ന നമ്പര്‍ എന്നതില്‍ ഉപരിയായി ലോക ചരിത്രത്തിന്റെ ഗതിയെ തന്നെ മാറ്റി വിട്ട അക്കങ്ങളാണ് അവ.

2001 സെപ്തംബര്‍ 11 അമേരിക്കന്‍ ഈസ്റ്റേണ്‍ സമയം രാവിലെ 8.50 ഓടെ അമേരിക്കയുടെ അഭിമാനമായി തല ഉയര്‍ത്തി നിന്ന ഇരട്ട കെട്ടിടങ്ങളില്‍ ഒന്നില്‍ ഒരു വിമാനം ഇടിച്ച് കയറി. കുറച്ച് സമയങ്ങള്‍ക്ക് ശേഷം രണ്ടാമത്തെ കെട്ടിടത്തിലേയ്ക്കും മറ്റൊരു വിമാനം ഇടിച്ച് കയറുന്നത് അന്ന് ലോകം ടെലിവിഷന്‍ സെറ്റുകള്‍ക്ക് മുന്നില്‍ ഇരുന്ന് കണ്ടു. ആദ്യത്തേത് അപകടമല്ല എന്ന തിരിച്ചറിവ് ഒരു ഞെട്ടലോടെ ഉള്‍ക്കൊള്ളേണ്ടി വന്നു. ഇതിനിടയില്‍ അമേരിക്കയുടെ സൈനിക കേന്ദ്രമായ പെന്റഗണിലും ഒരു വിമാനം ഇടിച്ചിറങ്ങിയതായി ലോകം കണ്ടു. പെന്‍സില്വാനിയയില്‍ ഒരു വിമാനം തകര്‍ന്ന് വീണു.

ഇതോടെ ആസൂത്രിതമായ ഒരു ആക്രമണം ആകാശം വഴി നടത്തുന്നു എന്ന് തീര്‍ച്ചയായി. അതോടെ എല്ലാ വിമാനങ്ങളും താഴേയ്ക്കിറക്കി. ലോക മെമ്പാടും ഭരണകൂടങ്ങള്‍ ജാഗരൂകരായി. തീവ്രവാദികളുടെ ആക്രമണം എന്ന് അമേരിക്ക പറയുവാന്‍ തുടങ്ങി. 8.50 മുതല്‍ 11.00 മണിവരെയുള്ള ആ മണിക്കൂറുകള്‍ അമേരിക്കക്കാര്‍ക്കെന്ന പോലെ ലോക ജനതയ്ക്കും മറക്കുവാന്‍ കഴിയില്ല. [അന്ന് നടന്ന സംഭവങ്ങളുടെ ഒരു ഓര്‍മ്മപ്പെടുത്തല്‍ വീഡിയോ ദൃശ്യങ്ങള്‍ ദി ടെലിഗ്രാഫ് തങ്ങളുടെ സൈറ്റില്‍ കൊടുത്തിട്ടുണ്ട്. എ.ബി.സി.യും കവര്‍ ചെയ്തിട്ടുണ്ട്].

അമേരിക്കയില്‍ വിമാന പരീശീലനം നേടി, അമേരിക്കയുടെ വിമാനം തട്ടിയെടുത്ത്, അമേരിക്കയില്‍ തന്നെ ആക്രമണം നടത്തുകയായിരുന്നു എന്ന് പിന്നീട് വാര്‍ത്തകള്‍ പുറത്ത് വന്നു.

പെന്റഗണില്‍ ഒരു വിമാനം ഇടിച്ചിറക്കുക എന്നത് അവിശ്വസിനീയമായിരുന്നു. 1993ല്‍ ഇരട്ട കെട്ടിടത്തില്‍ ഒന്നിന്റെ കീഴില്‍ ട്രെക്ക് ബോംബ് പൊട്ടിച്ചതിനെ തുടര്‍ന്ന് അതീവ സുരക്ഷയാണ് ഉണ്ടായിരുന്നത്. ഇത്രയും സുരക്ഷ സംവിധാനങ്ങള്‍ ഉള്ള അമേരിക്കയ്ക്ക് എവിടെയാണ് പിഴവ് സംഭവിച്ചിരിക്കുക? [10 വര്‍ഷങ്ങള്‍ക്ക് ഇപ്പുറം ഇപ്പോഴും ചര്‍ച്ചകള്‍ നടന്ന് കൊണ്ടിരിക്കുന്നു.]

തങ്ങളെ ആക്രമിച്ചത് ബിന്‍ലാദന്‍ ആണ് എന്ന് അമേരിക്ക പ്രഖ്യാപിച്ചു. ലാദന്‍ അഫ്ഗാനിസ്ഥാന്‍ കുന്നുകളിലുണ്ടെന്നതിനാല്‍ അമേരിക്ക അഫ്ഗാനിലേയ്ക്ക് സൈന്യത്തെ അഴച്ചു. എന്നാല്‍ ലാദനെ പിടികിട്ടിയില്ല എന്ന് മാത്രമല്ല മറ്റൊരു യുദ്ധത്തിലേയ്ക്ക് അമേരിക്ക വഴുതി വീണു. ലാദനെ ഇറാക്കിലെ സദ്ദാം പിന്തുണയ്ക്കുന്നു എന്നും ഇറാക്കിന്റെ കയ്യിലുള്ള വിനാശകരമായ അണ്വായുധങ്ങള്‍ ലോകത്തിന് ഭീഷണിയാകുമെന്നും പറഞ്ഞായിരുന്നു ഇറാക്കിനെതിരെയുള്ള യുദ്ധം.

ലാദന്റെ കാര്യത്തിലെന്ന പോലെ സദ്ദാമും അമേരിക്കയുടെ കണ്ണിലുണ്ണിയായിരുന്നു. റഷ്യക്കെതിരെയാണ് ലാദനെ ഉപയോഗിച്ചിരുന്നതെങ്കില്‍ ഇറാനെതിരെയായിരുന്നു അമേരിക്ക സദ്ദാമിനെ പിന്തുണച്ചത്. 1990ലെ ഇറാക്കിന്റെ കുവൈറ്റ് ആക്രമണവും അമേരിക്കയുടെ ഇടപെടലും എല്ലാം മാറ്റി മറിച്ചു. ലാദന്‍ അമേരിക്കയ്ക്ക് എതിരെ രംഗത്ത് വരുന്നത് കുവൈറ്റ് യുദ്ധത്തെ തുടര്‍ന്നാണ്.

അമേരിക്കയുടെ ഇറാക്ക് യുദ്ധം തെറ്റിധാരണ പരത്തി നടത്തിയതാണെന്ന് പിന്നീട് വ്യക്തമായി. ഇതിനിടയിലും ലാദന്‍ പിടി കൊടുക്കപ്പെടാതെ രക്ഷപ്പെട്ടിരുന്നു എന്ന് മാത്രമല്ല നിരപരാധികളായ മുസ്ലിം വിശ്വാസികള്‍ക്ക് മറ്റുള്ളവരുടെ അക്രമണങ്ങള്‍ നേരിടേണ്ടിയും വന്നു. ഇത് മുതലെടുക്കുവാന്‍ താലിബാന്‍ ഉള്‍പ്പെടെയുള്ള മത തീവ്രവാദ സംഘടനകള്‍ പരമാവധി ശ്രമിച്ചു. വിജയം കണ്ടെത്തുകയും ചെയ്തു. ഒരു പക്ഷേ കേരളത്തില്‍ പോലും തിവ്രമത ചിന്ത (വിരലിലെണ്ണാവുന്നവരേ ഉള്ളു എങ്കില്‍ പോലും) വേരോടിക്കുവാന്‍ മത തീവ്രവാദ സംഘടനകള്‍ക്ക് കഴിഞ്ഞു എന്നത് തന്നെ അവരുടെ വിജയം എത്രമാത്രമെന്ന് കാണാം.

ഇറാക്ക് വിചാരിച്ച പോലെ എളുപ്പമായിരുന്നില്ല. ചക്രവ്യൂഹത്തില്‍ നിന്ന് പുറത്ത് കടക്കുവാന്‍ അമേരിക്കയ്ക്ക് ഇനിയും കഴിഞ്ഞിട്ടില്ല. അഫ്ഗാനിസ്ഥാനിലും ഇതേ അവസ്ഥ തന്നെ. താലിബാനെയും മറ്റും തകര്‍ക്കുവാന്‍ പാക്കിസ്ഥാന് വാരിക്കോരി പണം കൊടുത്തുവെങ്കിലും അവ ഇന്ത്യയ്ക്കെതിരെയുള്ള തന്ത്രങ്ങള്‍ക്കാണ് പാക്കിസ്ഥാന്‍ ഉപയോഗിച്ചത് എന്ന് ഇപ്പോള്‍ അമേരിക്കയ്ക്ക് സമ്മതിക്കേണ്ടി വന്നു.

2001 സെപ്തംബറിന് മുന്‍പ് 1999 ഡിസമ്പര്‍ 24ന് ഇന്ത്യ മുള്‍മുനയില്‍ നിന്നത് ലോകം കണ്ടതാണ്. അന്ന് കണ്ടഹാറിലേയ്ക്ക് തട്ടിയെടുക്കപ്പെട്ട വിമാനത്തിന് പകരം വിടുവിച്ച തീവ്രവാദികളില്‍ ഒരാള്‍ ഇരട്ട കെട്ടിടങ്ങള്‍ തകര്‍ക്കുവാനുള്ള സൂത്രധാരന്മാരില്‍ ഉണ്ടായിരുന്നു എന്ന തിരിച്ചറിവ് അമേരിക്കയ്ക്ക് ഒരു തിരിച്ചടിയായിരുന്നിരിക്കണം. കാരണം കണ്ടഹാറിലേയ്ക്ക് വിമാനം തട്ടി കൊണ്ടു പോയപ്പോള്‍ ഇന്ത്യ അമേരിക്ക ഉള്‍പ്പെടെയുള്ളവരുടെ സഹായം അഭ്യര്‍ത്ഥിച്ചിരുന്നു. എന്നാല്‍ ഇന്ത്യയുടെ മാത്രം ഉത്തരവാദിത്തം എന്ന മട്ടിലായിരുന്നു അവര്‍ പ്രതികരിച്ചത്.

10 വര്‍ഷം തികയാറായപ്പോഴാണ് പാക്കിസ്ഥാനിലെ ഒരു രഹസ്യ കെട്ടിടത്തില്‍ (അതും പാക്കിസ്താന്‍ പട്ടാളത്തിന്റെ മൂക്കിന് കീഴിലുള്ള കെട്ടിടം!) വെച്ച് അമേരിക്കന്‍ സൈന്യം ലാദനെ വധിച്ചു എന്ന വാര്‍ത്ത ലോകം കേട്ടത്. ഇന്ത്യ പറഞ്ഞു കൊണ്ടിരുന്നത് ഒടുവില്‍ അമേരിക്ക ഉള്‍പ്പെടെയുള്ള രാജ്യങ്ങള്‍ സമ്മതിച്ചിരിക്കുന്നു!

രണ്ട് യുദ്ധങ്ങളെ തുടര്‍ന്ന് അമേരിക്കയ്ക്ക് വിചാരിച്ചതിലും കൂടുതല്‍ ധന നഷ്ടമാണ് ഉണ്ടായത്. എന്നാല്‍ ലോകത്തിനാകട്ടെ എപ്പോഴും ഒരു ചാവേര്‍ ആക്രമണം പ്രതീക്ഷിച്ചിരിക്കുവാനുള്ള വിധിയും. ഈ 10 വര്‍ഷങ്ങള്‍ക്കുള്ളില്‍ അമേരിക്കയുടെ ഉള്ളില്‍ നിന്ന് തന്നെ പല ആക്രമണങ്ങളും മുങ്കൂട്ടി കണ്ട് നശിപ്പിക്കുവാന്‍ അമേരിക്കന്‍ സേനയ്ക്ക് കഴിഞ്ഞു. എന്നാല്‍ ചിലപ്പോഴെങ്കിലും ഒറ്റപ്പെട്ട ചെറിയ പാളിച്ചകള്‍ അവര്‍ക്കും സംഭവിച്ചു. ഇന്ത്യക്കാര്‍ക്ക് പിന്നെ മാസത്തില്‍ ഒരു തവണ പൊട്ടിയത് കണ്ടില്ലെങ്കില്‍ ഈ മാസം എന്താ മുംബൈയിലോ, ഡെല്‍ഹിയിലോ പൊട്ടാഞ്ഞത് എന്നേ ചോദിക്കുവാനുള്ളൂ!

ഇരട്ട കെട്ടിടങ്ങള്‍ തകര്‍ന്ന് വീണപ്പോള്‍ മരിച്ച 2000ത്തില്‍ പരം മനുഷ്യ ജീവിതങ്ങള്‍ മാത്രമല്ല അന്ന് ആളുകളെ രക്ഷപ്പെടുത്തുവാന്‍ ധീരതയോടെ അവിടെ ഉണ്ടായിരുന്ന പോലീസുകാര്‍‌, അഗ്നിശമന പ്രവര്‍ത്തകര്‍ തുടങ്ങിയവരില്‍ ഭൂരിപക്ഷത്തിനും ക്യാന്‍സര്‍ ഉള്‍പ്പെടെയുള്ള ശ്വാസകോശ സംബന്ധമായ അസുഖങ്ങളുമായി കഷ്ടപ്പെടുന്നു. അന്ന് ഉയര്‍ന്ന പൊടിപടലങ്ങള്‍ വര്‍ഷങ്ങള്‍ക്ക് ശേഷവും ഉപദ്രവിച്ച് കൊണ്ടിരിക്കുന്നു!

10 വര്‍ഷങ്ങള്‍ക്കിപ്പുറം ഗ്രൌണ്ട് സീറോ എന്ന് അറിയപ്പെട്ടിരുന്ന ഇരട്ട കെട്ടിടങ്ങള്‍ നിന്ന സ്ഥലം അതി മനോഹരമായ രണ്ട് വെള്ളച്ചാട്ടങ്ങളും പൂന്തോട്ടങ്ങളും മറ്റും കൊണ്ട് മനോഹരമാക്കിയിരിക്കുന്നു. ലൈവ് ക്യാമറ കാണാന്‍ ഈ ലിങ്ക് നോക്കുക.

2001ല്‍ നിന്ന് 2011ല്‍ എത്തിയിട്ടും തീവ്രവാദികള്‍ എപ്പോള്‍ എവിടെ എങ്ങിനെ ആക്രമിക്കും എന്ന പേടിയോടെ ലോകം കഴിയുന്നു. തീവ്രവാദ പ്രവര്‍ത്തനങ്ങള്‍ ഇല്ലാതാക്കാന്‍ കഴിഞ്ഞില്ല എന്ന് മാത്രമല്ല കൂടുതല്‍ ആളുകളെ തീവ്രമത ചിന്തയുടെ പേരില്‍ തങ്ങളിലേയ്ക്ക് ആകര്‍ഷിപ്പിക്കുവാന്‍ തീവ്രവാദ സംഘടനകള്‍ക്ക് കഴിഞ്ഞിരിക്കുന്നു.

ഇത്തരം മത തീവ്രവാദങ്ങളെ ഇനിയും തുടരാന്‍ അനുവദിച്ചാല്‍ “എന്തു സംഭവിച്ചു! ഈ മാസത്തെ ക്വോട്ട കണ്ടില്ലല്ലോ” എന്ന ഇന്ത്യക്കാരന്റെ ചിന്ത ലോക ജനതയ്ക്കും പിടിപെടും.

പ്രവാസി കുഞ്ഞിന്റെ ഓണം

2011-09-08T21:46:00.000-04:00

എല്ലാവര്‍ക്കും ഓണാശംസകള്‍

(വള്ളം കളി ഇത് വരെ നേരിട്ട് കണ്ടിട്ടില്ലാത്ത പ്രവാസി കുഞ്ഞ് അഴച്ച് തന്ന ആശംസകള്‍ ഇവിടെ പോസ്റ്റുന്നു)

ക്രി.പുരോഹിതരുടെ മദ്യ വിരോധം വിജയിക്കുമോ!

2011-08-28T20:34:00.001-04:00

മദ്യത്തെ പ്രോത്സാഹിപ്പിക്കുന്നവരെ അടുത്ത തെരഞ്ഞെടുപ്പില്‍ തോല്‍പ്പിക്കും എന്ന് ബഹുമാന്യനായ ^nent¸mkv amÀ {Intkmkväw henb sa{Xmt¸meo¯ പ്രഖ്യാപിച്ചു.

നല്ല കാര്യം.... മദ്യം വിഷമാണെന്നും, അത് ഉണ്ടാക്കരുത്, കൊടുക്കരുത്, കുടിക്കരുത് എന്നും കള്ള് ചെത്തുന്ന കത്തി ഒടിച്ച് ശൌരം ചെയ്യാന്‍ പോകുകയാണ് വേണ്ടത് എന്നും ഉപദേശിച്ച നാരായണഗുരുവിന്റെ പേരിലുള്ള പ്രസ്ഥാനത്തിന്റെ തലപ്പത്തിരിക്കുന്നവര്‍ ആ വചനങ്ങളെ കണ്ടില്ലെന്ന് നടിച്ച് മദ്യം വിറ്റ് നടക്കുന്ന കേരളത്തില്‍ ബഹുമാന്യ പുരോഹിതരുടെ വചനങ്ങള്‍ ചെവി കൊള്ളുവാന്‍ ആരെങ്കിലും ഉണ്ടാകുമോ എന്ന് കണ്ടറിയണം.

പക്ഷേ ഇവിടെ പ്രധാന ചോദ്യം മദ്യത്തിനെതിരെ ശക്തമായി മുന്നോട്ട് വന്നിരിക്കുന്ന ക്രിസ്ത്യന്‍ പുരോഹിതര്‍ വിശ്വാസികള്‍ക്ക് മുന്നില്‍ നിന്ന് കൊണ്ട് വീഞ്ഞ് കുടിക്കുന്നത് ഇപ്പോഴും തുടരുമ്പോള്‍ എങ്ങിനെയാണ് വിജയം കണ്ടെത്തുവാന്‍ കഴിയുക?

ഇവര്‍ തന്നെയാണ് കുട്ടികള്‍ക്ക് പോലും വീഞ്ഞില്‍ മുക്കിയ അപ്പം നാക്കില്‍ വെച്ച് കൊടുക്കുന്നത്!

വിശ്വാസത്തിന്റെ പേരില്‍ മദ്യം നുണയുന്നത് കുഴപ്പമില്ല എന്ന് വിശ്വസിപ്പിച്ച് മദ്യം നാക്കില്‍ വെച്ച് കൊടുക്കുമ്പോള്‍ തന്നെ മദ്യം ഉപയോഗിക്കുന്നത് തെറ്റാണെന്ന് പറയുമ്പോഴുള്ള പൊരുത്തകേടല്ലേ ആദ്യം മാറ്റിയെടുക്കേണ്ടത്!

വിശ്വാസങ്ങളുടെ പേരില്‍ ചില അമ്പലങ്ങളിലും ഒട്ടു മിക്ക കാവുകളിലും നിവേദ്യമായി മദ്യം നിര്‍ബന്ധമായിരുന്ന കാലത്താണ് അത് അനാചാരമെന്ന് ഉറക്കെ പറഞ്ഞ് നാരായണഗുരു മദ്യത്തെ ആരാധനാലയങ്ങള്‍ക്ക് വെളിയില്‍ തള്ളിയത്. ആ ഒരു ചങ്ക് ഉറപ്പ് കാട്ടിയിട്ട് മദ്യ വിരുദ്ധ പോരാട്ടത്തിനിറങ്ങിയാല്‍ കേരളത്തെ മദ്യ വിമുക്തമാക്കാന്‍ പ്രയാസമുണ്ടോ!

ബോധം പോകുന്നത് വരെ മദ്യപിക്കുക എന്ന വൃത്തികെട്ട കാഴ്ചപ്പാടാണ് കേരളത്തെ ദുരിതത്തിലേയ്ക്ക് തള്ളുന്നത്. ആ കാഴ്ചപ്പാടാണ് മാറ്റിയെടുക്കേണ്ടത്.

ഇന്ത്യ ഭരിക്കുന്നത് ആരാണ്?

2011-08-16T23:02:00.000-04:00

ഇന്ത്യ ഭരിക്കുന്നത് യു.പി.എ. എന്ന കൂട്ട് കക്ഷിയാണെന്നാണ് വെപ്പ്. എന്നാല്‍ ഇന്ന് വാര്‍ത്തകള്‍ വായിച്ചപ്പോള്‍ കോണ്‍ഗ്രസ്സ് ഒറ്റയ്ക്ക് ഭരിക്കുന്നു എന്ന തോന്നല്‍‌. എപ്പോഴാണ് കോണ്‍ഗ്രസ്സിന് ഒറ്റയ്ക്ക് ഭൂരിപ്ക്ഷം കിട്ടിയത് ആവോ?

ഹസ്സാരയെ പുറത്ത് വിട്ടത് ഇന്ത്യന്‍ പ്രധാനമന്ത്രി ഒന്നര മണിക്കൂര്‍ രാഹുലുമായി ചര്‍ച്ച ചെയ്താണ് അത്രേ. കൂട്ടുകക്ഷി ഭരണമെങ്കില്‍ പേരിനെങ്കിലും മറ്റ് കക്ഷികളെ വിളിച്ച് ദാ ഇതാണ് ചെയ്യുവാന്‍ പോകുന്നത് എന്ന് പറഞ്ഞ് കൂട്ടായ തീരുമാനം ആണിതെന്ന് ജനങ്ങളെ കാണിക്കുവാനുള്ള ബുദ്ധിയെങ്കിലും അമൂല്‍ ബേബിക്ക് ഉണ്ടായിരുന്നുവെങ്കില്‍‌!!!

അങ്ങിനെ ഹസ്സാരയെ അറസ്റ്റ് ചെയ്തതോടെ അമൂല്‍ ബേബിയുടെ അടുത്ത അടവും പൊട്ടി പാളീസായി! സോണിയ മാഡം ഉണ്ടായിരുന്നുവെങ്കില്‍ അവരുടെ തലയില്‍ കെട്ടിവെച്ച് അമൂല്‍ ബേബിയുടെ “കരിയര്‍‌” രക്ഷിക്കാമായിരുന്നു. ഇതിപ്പോള്‍ ഈ കറുത്ത ചരിത്രം അമൂല്‍ ബേബിയുടെ കരിയറില്‍ വരയ്ക്കപ്പെട്ട് കഴിഞ്ഞു!

കുറച്ച് ആഴ്ചകള്‍ക്ക് മുന്‍പാണ് അമൂല്‍ ബേബി യു.പി.യില്‍ നിരോധനാജ്ഞ ലംഘിച്ച് “പ്രകടനം” നടത്തിയത്. അന്ന് പുള്ളി കൂളായി നെഞ്ച് വിരിച്ച് നടന്നിട്ടും ആരും അറസ്റ്റ് ചെയ്തില്ല. അതിനെ ന്യായീകരിച്ചവര്‍ ഇന്ന് ലംഘിക്കുമെന്ന് പറഞ്ഞപ്പോഴേയ്ക്കും അറസ്റ്റ് ചെയ്തതിനെ ന്യായീകരിക്കുവാന്‍ പെടാപാട് ചെയ്യുന്നു!!!

സ്വാതന്ത്ര്യ ദിനത്തില്‍ മറന്നുകളയുന്നവര്‍

2011-08-14T20:13:00.000-04:00

1947 ആഗസ്റ്റ് 15ന് ബ്രിട്ടീഷുകാരില്‍ നിന്ന് ഇന്ത്യ സ്വതന്ത്ര്യയായി. എല്ലാ കൊല്ലവും ആഗസ്റ്റ് 15ന് നാം സ്വാതന്ത്ര്യ ദിനം ആഘോഷിക്കുന്നു. എന്നാല്‍ ഈ ദിനത്തില്‍ നാം മറക്കുന്ന അല്ലെങ്കില്‍ നമ്മെ ഓര്‍മ്മിപ്പിക്കുവാന്‍ ഭരണകൂടങ്ങള്‍ സമ്മതിക്കാത്ത ചില ചരിത്ര സത്യങ്ങള്‍ ഉറങ്ങി കിടക്കുന്നുണ്ട്.

1947 ആഗസ്റ്റ് 15 മുതല്‍ 1950 ജനുവരി 26 വരെ ഇന്ത്യ ബ്രിട്ടന് കീഴില്‍ തന്നെയായിരുന്നു. ഡൊമൈന്‍ രാജ്യമായി, ബ്രിട്ടീഷ് രാജാവിന് കീഴില്‍‌ നെഹ്രുവും ടീമും ആ 3 കൊല്ലം ഭരിച്ചു.

ഇന്ത്യ ഒറ്റ കെട്ടായി ഇരിക്കണം എന്ന ഗാന്ധിജിയുടെ ആഗ്രഹം മൂലയ്ക്ക് തള്ളി വിഭജനം വേണമെന്ന് നിര്‍ബന്ധവുമായി നെഹ്രു-പട്ടേല്‍ ടീമുകള്‍ നയിക്കുന്ന കോണ്‍ഗ്രസ്സ് ഒരു വശത്തും ജിന്ന നയിക്കുന്ന മുസ്ലീം ലീഗ് മറുവശത്തും നിരന്നപ്പോള്‍ ഈ ഒരു നിമിഷത്തിനായി അഹോരാത്രം പ്രയത്നിച്ച ബ്രിട്ടീഷ് ഭരണകൂടം ഒരു കടലാസ് കഷണത്തില്‍ ചില വരകള്‍ കുറിച്ച് ഇന്ത്യയെ രണ്ടാക്കി.

പക്ഷേ ആ വരകള്‍ തുടങ്ങി വെയ്ക്കുന്നത് വന്‍ ആഘാതമായിരുന്നു എന്ന് 1947 ആഗസ്റ്റ് 14ന് മുന്‍പ് തന്നെ Rawalpindi തെളിയിച്ചു. ഇപ്പോഴും മൂന്ന് രാജ്യങ്ങളും അനുഭവിക്കുന്നു!

വിഭജനത്തെ തുടര്‍ന്ന് ഏകദേശം 50 ലക്ഷം ജനങ്ങളാണ് ഇന്ത്യയിലേയ്ക്കും പാക്കിസ്ഥാനിലേയ്ക്കുമായി പാലായനം ചെയ്യപ്പെട്ടത്. അതിര്‍ത്തികളില്‍ പലപ്പോഴും അവര്‍ ഏറ്റ് മുട്ടി. ഭീകരമായ യാതനകള്‍ ഇരു കൂട്ടരും അനുഭവിക്കേണ്ടി വന്നു. 1947 ഒക്ടോബര്‍ 27ന് ടൈം മാഗസിന്റെ പുറം ചട്ടയില്‍ സ്വയം കുത്തി പരിക്കേല്‍പ്പിക്കുന്ന കാളിയുടെ രൂപമുള്ള ഇന്ത്യയെയാണ്. INDIA-PAKISTAN: The Trial of Kali എന്ന ലേഖനത്തില്‍ ഭീകരമായ അന്നത്തെ ചിത്രം വരച്ച് കാട്ടുന്നുണ്ട്. അഞ്ച് ലക്ഷത്തിന് മുകളില്‍ ജനങ്ങളാണ് അന്ന് കലാപത്തില്‍ മരിച്ചതെന്ന് ടൈം റിപ്പോര്‍ട്ട് ചെയ്യുന്നത്.

കണ്‍മുന്നില്‍ സഹോദരങ്ങളും, കുട്ടികളും, ഭര്‍ത്താക്കന്മാരും, അച്ഛന്മാരും വെട്ടേറ്റ് വീഴുന്നതും ഭാര്യമാരും, കുട്ടികളും, സഹോദരിമാരും, അമ്മമാരും കൂട്ടത്തോടെ ആക്രമിക്കപ്പെടുന്നതും കാണേണ്ടി വന്നവരുടെ തലമുറയ്ക്ക് ഇന്ത്യയുടെ സ്വാതന്ത്ര്യം എന്ത് അനുഭവമാണ് നല്‍കുക!

എങ്കിലും നമുക്ക് ആശംസിക്കാം “HAPPY INDEPENDENCE DAY"

ഇന്ത്യയ്ക്ക് ഇത് പോലെ ഒരാളെ കിട്ടിയിരുന്നുവെങ്കില്‍‌!

2011-07-27T20:06:00.002-04:00

“യെസ് വി കാന്‍” എന്ന് പറഞ്ഞും പറയിപ്പിച്ചും അധികാരത്തില്‍ ഏറിയ ഒബാമ. പ്രതികൂല സാഹചര്യങ്ങള്‍ മാത്രം ഉണ്ടായിട്ടും വന്‍ വിജയം നേടി അമേരിക്കയുടെ പ്രസിഡന്റ് ആയ ഒബാമ. മാസങ്ങള്‍ക്ക് മുന്‍പ് ഒബാമയുടെ ബഡ്ജറ്റ് എതിരാളികളായ റിപ്പബ്ലിക്കന്മാര്‍ അംഗീകരിക്കാഞ്ഞതിനാല്‍ ഗവണ്മെന്റിന്റെ പ്രവര്‍ത്തനം തന്നെ നില്‍ക്കുമെന്ന ഘട്ടത്തില്‍ കുറച്ച് മാസങ്ങള്‍ കൂടി ഗവണ്മെന്റ് നടത്തുവാന്‍ അനുമതി നല്‍കി റിപ്പബ്ലിക്കന്മാര്‍ പിരിഞ്ഞു.

ഈ മാസം അവസാനിക്കുമ്പോള്‍ വീണ്ടും അതേ അവസ്ഥയില്‍ തന്നെ നില്‍ക്കുന്നു.

സാധാരണക്കാര്‍ക്ക് ആനുകൂല്യങ്ങള്‍ നല്‍കി കൊണ്ട് ബില്ല്യണര്‍‌മാരില്‍ നിന്ന് അവര്‍ ഇപ്പോള്‍ അനുഭവിക്കുന്ന ടാക്സ് ആനുകൂല്യം ചിലത് താല്‍ക്കാലികമായി നിര്‍ത്തലാക്കി കൊണ്ടും മുന്നോട്ട് വെയ്ക്കുന്ന ഒബാമയുടെ ബഡ്ജറ്റിനെ പക്ഷേ റിപ്പബ്ലിക്കന്മാര്‍ ഇപ്പോഴും എതിര്‍ക്കുന്നു. സാധാരണക്കാര്‍ക്ക് കൊടുക്കുന്ന ആനുകൂല്യങ്ങള്‍ വെട്ടി കുറച്ച് മുന്‍ നിരയിലുള്ള പണക്കാരെ തൊടാതെയുള്ള പണക്കാരെ അനുകൂലിക്കുന്ന ബഡ്ജറ്റ് തന്നെ വേണം എന്ന് റിപ്പബ്ലിക്കന്മാര്‍ വാശി പിടിക്കുന്നു. ഇതിനിടയില്‍ കഴിഞ്ഞ ദിവസം ഒബാമ ഇത് വരെയുള്ള സംഭവ വികാസങ്ങള്‍ രാജ്യത്തോട് പങ്ക് വെയ്ക്കുകയും തന്റെ നിലപാട് എന്ത് എന്ന് വ്യക്തമാക്കുകയും ചെയ്തു. (യൂ ട്യൂബ് ലിങ്ക്).

പാവപ്പെട്ടവരുടെ പുരോഗതിക്കായി ഉറച്ച് നില്‍ക്കുന്ന ഒബാമയെ പോലെയുള്ള ഒരാള്‍ ഇന്ത്യയ്ക്ക് ലഭിച്ചിരുന്നുവെങ്കില്‍‌! അമേരിക്കയിലെ റിപ്പബ്ലിക്കന്മാരെ പോലും നാണംകെടുത്തുന്നവരാണ് ഇന്ത്യയിലെ രാഷ്ട്രീയക്കാര്‍‌. സ്വന്തം കീശ വീര്‍പ്പിക്കുക അതിനായി പണക്കാരെ വഴി വിട്ട് സഹായിക്കുക എന്ന ഒറ്റ അജണ്ടയുമായി നടക്കുന്നവരാണ് ഭൂരിപക്ഷവും.

എന്‍.ഡി.എ. ഭരിക്കുന്ന സമയത്ത് രാജ്യ പുരോഗതിക്ക് എന്ത് ചെയ്യണം എന്ന് വിലയിരുത്തുവാന്‍ “പ്രൈം മിനിസ്റ്റര്‍ കൌണ്‍സിലിന്” രൂപം നല്‍കി. കമ്മറ്റികളുടെ തലപ്പത്തിരുന്നത് ഇന്ത്യയിലെ ബിസിനസ്സ് മാഗ്നറ്റുകളായിരുന്നു. അതിനാല്‍ തന്നെ റിപ്പോര്‍ട്ടുകള്‍ എന്തായിരിക്കുമെന്ന് ഉറപ്പായിരുന്നു. വിചാരിച്ച പോലെ തന്നെ 2000ത്തില്‍ വിവിധ മേഖലകളെ അവലോകനം ചെയ്ത് സമര്‍പ്പിച്ച റിപ്പോര്‍ട്ടുകള്‍ (റിപ്പോര്‍ട്ട് ലിങ്ക്) എല്ലാം തന്നെ ഒറ്റ വാക്കില്‍ വ്യവസായികളെ സഹായിക്കുക എന്നതായിരുന്നു.

വ്യവസായം, ആരോഗ്യം, കൃഷി, വിദ്യാഭ്യാസം, കമ്മ്യൂണിക്കേഷന്‍, ഭക്ഷണ വിതരണം തുടങ്ങിയവയില്‍ നിന്ന് സര്‍ക്കാര്‍ പിന്മാറണം എന്നും അവ സ്വകാര്യന്മാരെ ഏല്‍പ്പിക്കണമെന്നുമായിരുന്നു അവര്‍ വിലയിരുത്തിയത്.

ഐ.ഐ.റ്റി.കള്‍ ഉള്‍പ്പെടെയുള്ളവയില്‍ സര്‍ക്കാര്‍ പണം മുടക്കരുതെന്നും പഠനത്തിനായി വിദ്യാര്‍ത്ഥികള്‍ മുഴുവന്‍ പണം കൊടുത്ത് പഠിക്കണമെന്നുമായിരുന്നു അംബാനി-ബിര്‍ള റിപ്പോര്‍ട്ട്. അതിലാണ് വിദ്യാഭ്യാസ രംഗത്ത് വിദേശ നിക്ഷേപം അനുവദിക്കണമെന്ന് വാദിക്കുന്നത്.

ബാങ്കുകള്‍ ഉള്‍പ്പെടെയുള്ള പൊതുമേഖല സ്ഥാപനങ്ങള്‍ വിറ്റ് സര്‍ക്കാര്‍ പണം കരുതി വെയ്ക്കണമെന്നാണ് ജി.പി. ഗോയങ്ക കമ്മറ്റി പറയുന്നത്. പൊതുമേഖലയെ വില്‍ക്കുവാന്‍ തുടങ്ങിയപ്പോള്‍ പണം ആരൊക്കെയാണ് കരുതി വെയ്ക്കുവാന്‍ തുടങ്ങിയതെന്ന് നാം കണ്ട് കഴിഞ്ഞു.

ആരോഗ്യമേഖലയെ പറ്റി റിപ്പോര്‍ട്ട് സമര്‍പ്പിച്ചതും ബിര്‍ള-അംബാനിമാര്‍ തന്നെ. പതിവ് പോലെ ആരോഗ്യ മേഖലയില്‍ സ്വകാര്യന്മാര്‍ വന്നാലെ ഇന്ത്യ രക്ഷപ്പെടൂ എന്ന നയം. അമേരിക്കയിലും മറ്റും കാണുന്നത് പോലെ ആരോഗ്യ മേഖലയെ സ്വകാര്യ ഇന്‍ഷ്വറന്‍സുകാര്‍ക്ക് പണയപ്പെടുത്തണം എന്ന ശക്തമായ ആവശ്യം ആ റിപ്പോര്‍ട്ടില്‍ കാണാം.

ഇങ്ങനെ പോകുന്നു ആ റിപ്പോര്‍ട്ടുകള്‍‌.

അവ ഉടനെ നടപ്പാക്കുവാന്‍ ബി.ജെ.പി.യുടെ എന്‍.ഡി.എ. ഗവണ്മെന്റ് അരയും മുറുക്കി ഇറങ്ങി. പതിവ് പോലെ ഇടത് പക്ഷം എല്ലാം പഠിച്ച് വന്നപ്പോഴേയ്ക്കും അടുത്ത ഭരണ മാറ്റമായി. ഇടത് പിന്തുണയോടെ വന്നതിനാല്‍ കോണ്‍ഗ്രസ്സിന് ആഗ്രഹമുണ്ടായിട്ടും ഈ റിപ്പോര്‍ട്ടുകള്‍ പലതും നടപ്പിലാക്കുവാന്‍ കഴിഞ്ഞിരുന്നില്ല. എന്നാല്‍ ഇടതിന്റെ പിന്തുണ ആവശ്യമില്ല എന്ന് വന്നതോടെ കോണ്‍ഗ്രസ്സ് തനി നിറം പുറത്തെടുത്തു. പലതും നടപ്പിലാക്കുവാന്‍ ചാടി ഇറങ്ങി. സോണിയാജിക്ക് ഉന്നജാതിക്കാരായ ഇടത് നേതാക്കളെയായിരുന്നു വിശ്വാസം (കടപ്പാട്: വിക്കിലീക്ക്സ്) എന്നത് പിന്നീട് വന്ന സാമ്പത്തിക മാന്ദ്യത്തില്‍ ഇന്ത്യ നശിച്ച് പോകാതിരിക്കുവാന്‍ സഹായിച്ചു.

ലോക സാമ്പത്തിക മാന്ദ്യ സുനാമിയില്‍ എല്ലാവരും തകര്‍ന്നു. നമ്മുടെ ബാങ്കുകള്‍ പൊതുമേഖലയിലായിരുന്നതിനാല്‍ മാത്രം ഇന്ത്യ രക്ഷപ്പെട്ടു. പൊതുമേഖല ബാങ്കുകള്‍ വിറ്റ് തുലയ്ക്കാനിരുന്ന കോണ്‍ഗ്രസ്സ് മന്ത്രി സഭ ഒടുവില്‍ മനസ്സില്ലാ മനസ്സോടെ താല്‍ക്കാലികമായി പിന്‍ വാങ്ങി. എങ്കിലും മന്ത്രിമാരുടെ സ്വന്തക്കാര്‍ വാഴുന്ന സ്വകാര്യ ബാങ്കിന് കരകയറുവാന്‍ എസ്.ബി.ഐ.നെ കൊണ്ട് കോടികള്‍ മുടക്കിക്കുന്നത് ഇന്ത്യക്കാര്‍ നോക്കിയിരുന്നു. തിരിച്ച് കിട്ടുമെന്ന പ്രതീക്ഷയില്ല എങ്കിലും...

ഈ അടുത്ത് സി.എ.ജി. പുറത്ത് വിടുന്ന വാര്‍ത്തകള്‍ പലതും ചൂണ്ടി കാട്ടുന്നത് 2000ത്തില്‍ എന്‍.ഡി.എ. തുടങ്ങി വെച്ച വില്‍പ്പനകള്‍ രണ്ടാം വരവില്‍ കോണ്‍ഗ്രസ്സ് നേതൃത്വം നല്‍കുന്ന യു.പി.എ. നിര്‍ബാധം തുടര്‍ന്നെന്നും പല മേഖലയിലും വന്‍ സാമ്പത്തിക നഷ്ടം വരുത്തി വെച്ചു എന്നുമാണ്. ഹിറ്റായിരിക്കുന്ന 2ജി ഇപ്പോള്‍ പ്രധാനമന്ത്രിക്ക് വരെ പ്രശ്നമായി മാറിയിരിക്കുന്നു. രാജ പറഞ്ഞ് വെയ്ക്കുന്നത് എന്‍.ഡി.എ. മന്ത്രി മുതല്‍ ഇങ്ങോട്ടുള്ളവര്‍ ചെയ്തത് താനും ചെയ്തു എന്നാണ്. അതും വേണ്ടപ്പെട്ടവര്‍ അറിഞ്ഞ് കൊണ്ടാണ് പോലും!

സാധരണക്കാരെ മറന്ന് പണക്കാര്‍ക്ക് വേണ്ടി നിലകൊള്ളുന്ന രാഷ്ട്രീയക്കാര്‍ സ്വന്തം പോക്കറ്റും നിറയ്ക്കുന്നു. ഓരോ ഇന്ത്യക്കാരന്റെയും സ്വന്തമായ പൊതുമേഖല പണം സ്വിസ്സ് ബാങ്കുകളിലെ സ്വകാര്യ എക്കൌണ്ടില്‍ കുമിഞ്ഞ് കൂടുന്നു എന്ന വാര്‍ത്തകള്‍ ഭാവിയില്‍ നമുക്ക് ഒരു ഞെട്ടലും ഉണ്ടാക്കില്ല.

രാജ ഭരണകാലത്ത് കൂട്ടിയവ ഇന്ന് നിധിയായി കണ്ടെടുത്തത് കണ്ട് മഞ്ഞളിച്ച് നില്‍ക്കുന്ന നമ്മള്‍ ഭാവിയില്‍ സ്വിസ്സ് എക്കൌണ്ടുകള്‍ കണ്ട് എന്നാലും പണമൊന്നും നഷ്ടപ്പെടാതെ അവര്‍ സ്വിസ്സ് ബാങ്കില്‍ നിക്ഷേപിച്ചില്ലേ എന്ന് പറയും....

ഇവിടെയാണ് ഒബാമ ഇവരില്‍ നിന്നെല്ലാം വ്യത്യസ്തമാകുന്നു... പണക്കാരനും പാവപ്പെട്ടവനും എന്നുള്ള അന്തരം വര്‍ദ്ധിച്ചത് ഒബാമ തിരിച്ചറിഞ്ഞിരിക്കുന്നു. സ്വകാര്യ ഇന്‍ഷ്വറന്‍സ്, ക്രെഡിറ്റ് കാര്‍ഡുകാര്‍ ജനങ്ങളെ പിഴിയുന്നത് കണ്ടില്ല എന്ന് നടിക്കുവാന്‍ ഒബാമ തയ്യാറാകുന്നില്ല. അവര്‍ക്കൊക്കെ നിയന്ത്രണങ്ങള്‍ കൊണ്ടു വരുന്നതിനൊപ്പം ടാക്സ് ആനുകൂല്യങ്ങള്‍ ആസ്വദിച്ച് കൂടുതല്‍ വീര്‍ക്കുന്ന പണക്കാരെ നിലയ്ക്ക് നിര്‍ത്തുവാനും ഒബാമ തുനിയുന്നു. എന്നാല്‍ ഇന്ത്യയിലെ ഭരണക്കര്‍ത്താക്കളാകട്ടെ ഇതെല്ലാം കണ്ടിട്ടും സാധാരണക്കാരെ പുറങ്കാലിന് തട്ടി തെറിപ്പിച്ച് പണക്കാര്‍ക്കൊപ്പം നടന്ന് നീങ്ങുന്നു.....

ലീഗ് വീണ്ടും നാണം കെട്ടു

2011-07-16T14:02:00.003-04:00

ഒത്തു തീര്‍പ്പുകള്‍ക്ക് വിരുദ്ധമായി കൂടുതല്‍ മന്ത്രിമാരെ ലീഗ് തന്നിഷ്ടത്തിന് പ്രഖ്യാപിച്ച് വിലസാമെന്ന് കരുതിയെങ്കിലും ഭരണം തൂങ്ങി നില്‍ക്കുന്ന അവസ്ഥയില്‍ കൂടുതലായി ഒരു മന്ത്രിയെ നല്‍കാന്‍ കോണ്‍ഗ്രസ്സ് തയ്യാറാകാഞ്ഞത് ലീഗിന് കിട്ടിയ വലിയ അടിയായിരുന്നു. എന്നാല്‍ കേന്ദ്ര മന്ത്രിസഭ വികസിപ്പിക്കുമ്പോള്‍ ആനയെ കിട്ടുമെന്ന് പ്രചരിപ്പിച്ചെങ്കിലും കുഴിയാനയെ പോലും കൊടുക്കുവാന്‍ സോണിയജി തയ്യാറായില്ല എന്നത് ലീഗിനുള്ള അടുത്ത പ്രഹരമായി.

ഇപ്പോള്‍ ഇതാ യു.ജി.സി. പറയുന്ന യോഗ്യത ഇല്ലാത്ത ഒരാളെ കാലിക്കറ്റ് വി.സി. ആയി നിയമിക്കണമെന്ന് വിദ്യാഭ്യാസ മന്ത്രിയുടെ ഓഫീസ് നിര്‍ദ്ദേശിച്ചിരിക്കുന്നു!

“While preparing the panel, the search committee must give proper weightage to academic excellence, exposure to the higher education system in the country and abroad, and adequate experience in academic and administrative governance” എന്നാണ് വി.സി. ആയി പരിഗണിക്കേണ്ട ആളിനെ കുറിച്ച് യു.ജി.സി. ചട്ടങ്ങളില്‍ പറയുന്നത് (പി.ഡി.എഫ്.).

പത്ത് വര്‍ഷത്തെ പരിചയം വേണമെന്ന യു.ജി.സി. ചട്ടം പോലും പാലിക്കാത്ത ലീഗിന്റെ ഈ നിലപാടിനെതിരെ കേരളത്തിലെ യൂണിവേഴ്സിറ്റി അധ്യാപക സമൂഹത്തില്‍ നിന്ന് ഉയര്‍ന്ന സ്വരം മറ്റുള്ളവരും ഏറ്റെടുത്തതോടെ ഉമ്മന്‍ ചാണ്ടിക്ക് വിദ്യാഭ്യാസ മന്ത്രിയുടെ നിര്‍ദ്ദേശം ചവറ്റ് കൊട്ടയില്‍ തള്ളി കളയേണ്ടി വന്നു എന്നത് ലീഗിന് കിട്ടിയ ഏറ്റവും പുതിയ അടിയാണ്. കേരള സമൂഹത്തിന് മുന്‍പില്‍ ലീഗ് വീണ്ടും നാണം കെട്ടിരിക്കുകയാണ്!

വിദ്യാഭ്യാസം ലീഗിന് കൊടുത്തതിനെതിരെ അഴീക്കോട് എന്തോ പറഞ്ഞു എന്ന് പറഞ്ഞ് ബ്ലോഗുലകത്തും ഭൂലോകത്തും വെളിച്ചപ്പാടുകള്‍ ഉറഞ്ഞ് തുള്ളുകയായിരുന്നുവല്ലോ! മതവും ദേശവും എടുത്തിട്ടല്ലായിരുന്നോ അലക്ക്! എന്നാല്‍ അതിന് മുന്‍പേ ഇലക്ഷന്‍ റിസള്‍ട്ട് വന്നപ്പോള്‍ തന്നെ വിദ്യാഭ്യാസ വകുപ്പ് കോണ്‍ഗ്രസ്സ് ഏറ്റെടുക്കണമെന്ന് ഹൈബി പറഞ്ഞപ്പോള്‍ ഈ വെളിച്ചപ്പാടുകളുടെയെല്ലാം വായില്‍ ഭക്ഷണമായിരുന്നെന്ന് തോന്നി! ഇനി ഇപ്പോള്‍ അവര്‍ എന്ത് പുതിയ ന്യായം കണ്ടെത്തുമോ ആവോ?

കോ.സര്‍ക്കാരും കാ.പുരോഹിതരും ഒരേ സ്വരത്തില്‍‌!

2011-07-10T20:24:00.000-04:00

പ്രൊഫഷണല്‍ കോഴ്സുകളില്‍ മെറിറ്റ് അടിസ്ഥാനത്തില്‍ ഗവണ്മെന്റ് കോട്ടയില്‍ ചില പണക്കാര്‍ വരുന്നു, അവര്‍ക്ക് സൌജന്യം കൊടുക്കുവാന്‍ പാടില്ല. അത് കൊണ്ട് എല്ലാ സീറ്റിലും ഒരേ ഫീസ് ആക്കണം. ഫീസ് തങ്ങള്‍ നിശ്ചയിക്കും. തങ്ങള്‍ നിശ്ചയിക്കുന്ന ഫീസ് സര്‍ക്കാര്‍ റാന്‍ മൂളി കൊണ്ട് പാവപ്പെട്ടവര്‍ക്ക് ഫെല്ലോഷിപ്പായി നല്‍കണം എന്ന് അഭിനവ (പുരോഹിത‌) സ്വയാശ്രയമുതലാളിമാര്‍‌!

പണക്കാര്‍ക്കും സബ്സിഡിയായുള്ള ഗ്യാസ് കിട്ടുന്നു. അതിനാല്‍ ഇനി മുതല്‍ എല്ലാവര്‍ക്കും 4 കുറ്റി ഗ്യാസ് സിലിണ്ടര്‍ മാത്രം സബ്സിഡി നിരക്കില്‍ (ഇന്ത്യയില്‍ 60% ആളുകള്‍ 8 സിലണ്ടറുകള്‍ വരെ ഉപയോഗിക്കുന്നു എന്ന് റിപ്പോര്‍ട്ട് നല്‍കിയവര്‍ തന്നെ പറയുന്നു!). എന്നാല്‍ സിലിണ്ടര്‍ വാങ്ങുമ്പോള്‍ എല്ലാ ജനങ്ങളും സബ്സിഡിയില്ലാത്ത മുഴുവന്‍ തുകയും (800 രൂപയോളം) ഏജന്‍സിക്ക് നല്‍കണം. അര്‍ഹമായ സിലിണ്ടറിനുള്ള സബ്സിഡി ജനങ്ങളുടെ ബാങ്ക് അക്കൌണ്ടില്‍ സര്‍ക്കാര്‍ ഡെപ്പോസിറ്റ് ചെയ്യും എന്ന് ഇന്ത്യന്‍ പെട്രോളിയം മന്ത്രാലയം!!!! ഇവിടെയും ഗ്യാസിന്റെ വില കമ്പനികള്‍ നിശ്ചയിക്കും, സര്‍ക്കാര്‍ അതിന് റാന്‍ മൂളും!!!

ചുരുക്കത്തില്‍ കുറച്ച് പണക്കാര്‍ അനര്‍ഹമായത് വാങ്ങുന്നത് ഒഴിവാക്കുവാന്‍ വേണ്ടി ഭൂരിപക്ഷം വരുന്ന സാധാരണക്കാരുടെ പള്ളയ്ക്കടിക്കുക എന്ന പോളസിയില്‍ ഇന്ത്യയിലെ കോണ്‍ഗ്രസ്സ് സര്‍ക്കാരിനും കാ.പുരോഹിതര്‍ക്കും ഒരേ സ്വരം!!!

ഗ്യാസ് സിലിണ്ടര്‍ പ്രശ്നത്തില്‍ പി.സി. ജോര്‍ജിന്റേതായി ദീപികയില്‍ തന്നെ വന്ന പ്രസ്താവന അഭിനവ സ്വയാശ്രയമുതലാളിമാര്‍ കൂടി വായിച്ച് പഠിച്ചിരുന്നുവെങ്കില്‍‌!!!

എന്‍ഡോസള്‍ഫാന്‍: ഒടുവില്‍ ആ റിപ്പോര്‍ട്ടും വെളിച്ചം കണ്ടു

2011-07-08T22:02:00.000-04:00

ഐ.സി.എം.ആര്‍‌. നടത്തിയ പഠനത്തില്‍ 2001ല്‍ സെയ്തിനെ കൂടാതെ 2003ല്‍ പ്രതാപ് കുമാറിന്റെ നേതൃത്വത്തിലും പഠനം നടത്തിയിരുന്നു എന്നും അവര്‍ 2006ല്‍ റിപ്പോര്‍ട്ട് സമര്‍പ്പിച്ചുവെങ്കിലും അത് വെളിച്ചം കാണിക്കാതെ പൂഴ്ത്തി വെച്ചുമെന്ന് തെളിഞ്ഞിരിക്കുന്നു. (റിപ്പോര്‍ട്ടിന്റെ പി.ഡി.എഫ്. മാതൃഭൂമി വക).

ആണ്‍ കുട്ടികളില്‍ ലൈംഗിക വളര്‍ച്ചയ്ക്ക് താമസം നേരിടുന്നതിനെ പറ്റി സെയ്ത് 2003ല്‍ പറഞ്ഞ് വെച്ചതിന്റെ (പി.ഡി.എഫ്.) തുടര്‍ച്ചയാണ് ഈ റിപ്പോര്‍ട്ട്.

424 ആണുങ്ങളില്‍ നിന്നായി ശേഖരിച്ച രക്ത സാമ്പിളുകളില്‍ നിന്നും തെളിയുന്നത് പ്രശ്ന ബാധിത പ്രദേശത്തിന് പുറത്ത് താമസിക്കുന്നവരേക്കാള്‍ എന്‍ഡോസള്‍ഫാന്‍ ബാധിത പ്രദേശത്ത് താമസിക്കുന്നവരില്‍ ടെസ്റ്റോസ്റ്റിറോണും, എഫ്.എസ്സ്.എച്ച്.ഉം കുറവാണെന്നാണ്. കൂടാതെ ക്രോമസോമല്‍ അബറേഷനും കൂടുതലായും കണ്ടെത്തി. ഈ രണ്ട് നിരീക്ഷണങ്ങളും കാണിക്കുന്നത് ആ പ്രദേശത്ത് താമസിക്കുന്നവര്‍ക്ക് പ്രത്യുല്‍പ്പാദന കുറവും, ശാരീരിക-മാനസിക വൈകല്യമുണ്ടാകുവാനും സാധ്യത കൂടുതലാണെന്നാണ്. 2003ല്‍ പ്രസിദ്ധീകരിച്ച ആര്‍ട്ടിക്കിളില്‍ പ്രശ്ന ബാധിത പ്രദേശത്തുള്ളവരില്‍ എന്‍ഡോസള്‍ഫാന്റെ അംശം കണ്ടെത്തിയിരുന്നു.

ഈ പഠനത്തിന് മുന്‍പ് നടന്ന സര്‍വേകളില്‍ പ്രശ്ന ബാധിത പ്രദേശത്ത് ക്യാന്‍സര്‍‌, ഗര്‍ഭമലസല്‍‌, ന്യൂറോളജിക്കല്‍ പ്രശ്നങ്ങള്‍‌, നവജാതരില്‍ എല്ലുകള്‍ക്ക് വൈകല്യം എന്നിവ കൂടുതലാണെന്ന് കണ്ടെത്തിയിട്ടുള്ളതായി ഈ റിപ്പോര്‍ട്ടില്‍ എടുത്ത് പറയുന്നുണ്ട്.

ഇത്രയും ശക്തമായ തെളിവ് ലഭിച്ചിട്ടും അത് പുറത്ത് കാട്ടാതിരുന്നത് എന്തിന് വേണ്ടിയായിരുന്നു എന്ന് ഉത്തരം പറയേണ്ടത് കേന്ദ്ര ഗവണ്മെന്റാണ്. 8 ലക്ഷത്തോളം മുടക്കി 3 കൊല്ലം കൊണ്ട് പഠനം നടത്തിയ റിപ്പോര്‍ട്ട് പൂഴ്ത്തി വെച്ച് എന്‍ഡോസള്‍ഫാന്‍ കമ്പനികള്‍ക്ക് ഓശാന പാടുന്ന സര്‍ക്കാര്‍ വീണ്ടും ഐ.സി.എം.ആര്‍‌.നെ കൊണ്ട് തന്നെ കൂടുതല്‍ പഠനത്തിനായി നിയോഗിച്ച് നാടകം കളിക്കുന്നത് എന്തിനെന്ന് പറയണം!

ചരിത്രം കാ.സഭയ്ക്ക് വേണ്ടി വളച്ചൊടിക്കുന്നു!

2011-06-26T20:06:00.004-04:00

ഒടുവില്‍ കേരളത്തിലെ കാ.സഭയ്ക്ക് വേണ്ടി ലോക ചരിത്രത്തെ വികൃതമാക്കി ബാബു പോളും റെയ്മണും റിപ്പോര്‍ട്ട് സമര്‍പ്പിച്ചു എന്ന് മംഗളം വാര്‍ത്ത!

കേരളത്തിലെ കാ.സഭ പുരോഹിതരും, ബാബു പോളും, റെയ്മണും 2000 മാര്‍ച്ചില്‍ ജോണ്‍ പോള്‍ രണ്ടാമന്‍ മാര്‍പ്പാപ്പ ലോകത്തോട് മാപ്പ് പറഞ്ഞത് എന്തിനൊക്കെയായിരുന്നു എന്നത് ഇത് വരെ വായിച്ച് നോക്കിയിട്ടില്ല എന്നത് ദു:ഖകരം തന്നെ.

വിദഗ്ദ്ധ സമിതിയുടെ നിരീക്ഷണത്തില്‍ പാഠഭാഗങ്ങളില്‍ തെറ്റ് സംഭവിച്ചിട്ടില്ലെന്നും സഭയെ ബോധപൂര്‍വ്വം താറടിക്കുവാന്‍ ശ്രമിച്ചിട്ടില്ല എന്നും എന്നാല്‍ മാര്‍ക്സിയന്‍ വീക്ഷണത്തില്‍ ചരിത്രം വീക്ഷിച്ചത് കൊണ്ടാണ് അതെല്ലാം വന്നത് പോലും!

സാമ്പത്തിക ബാധ്യത ഉണ്ടായപ്പോള്‍ സഭ ചെയ്ത പ്രവര്‍ത്തികള്‍ വസ്തുതകള്‍ നിലനിര്‍ത്തി “വികാരങ്ങളെ വ്രണപ്പെടുത്താതെ” എഴുതണം! പാപമുക്തി പത്രത്തെ കുറിച്ച് പറയുന്നിടം പരിഷ്കരിക്കണം. ചരിത്രത്തില്‍ നിന്ന് ഇവ എടുത്ത് കളയുവാന്‍ കഴിയില്ല എന്ന് ബാബു പോളിന് പോലും മനസ്സിലായി! സാമ്പത്തിക പ്രതിസന്ധി മറികടക്കാന്‍ Indulgences വിറ്റ് കാശുണ്ടാക്കുവാന്‍ ശ്രമിച്ചു എന്ന ഭാഗമില്ലെങ്കില്‍ മാര്‍ട്ടിന്‍ ലൂഥര്‍ എന്ന ചരിത്ര പുരുഷനെയും പ്രൊട്ടസ്റ്റെന്റ് ഗ്രൂപ്പുകാര്‍ ഉദയം ചെയ്തതും എങ്ങിനെ വിവരിക്കും എന്ന് കൂടി ബാബു പോള്‍ പറയേണ്ടി വരുമായിരുന്നു!

എന്നാല്‍ ഇങ്ക്വിസിഷന്‍ എന്ന ഭാഗം മാറ്റണം പോലും!

അപ്പോള്‍ അക്കാലത്ത് കാ.മതത്തില്‍ നിന്ന് ആളുകള്‍ കൊഴിഞ്ഞ് പോകുമെന്ന് ഭയന്ന് ഉണ്ടാക്കിയ ഈ സാധനം എന്തായിരുന്നു/എന്തിനായിരുന്നു (വിക്കി ലിങ്ക്) എന്ന് പറയേണ്ട ബാധ്യത ബാബു പോള്‍ നടത്തണ്ടയോ! ഒന്നുമില്ലേല്‍ ജോണ്‍ ഓഫ് ആര്‍ക്കിന്റെ “വധശിക്ഷ” കാ. സഭയെ മാത്രമല്ല തന്നെയും നോക്കി പരിഹസിച്ച് ചിരിക്കുമെന്ന് ബാബു പോളും മറക്കരുതായിരുന്നു! ഗലീലിയോമാരെ പോലെയുള്ളവരെ മരണത്തിലും അപമാനിച്ചവര്‍ക്ക് വേണ്ടി ബാബു പോള്‍ വാദിക്കുമ്പോള്‍ നഷ്ടപ്പെടുന്നത് അദ്ദേഹത്തിന്റെ ഇമേജ് തന്നെയാണ്.

2000 വര്‍ഷം കൊണ്ട് കാ. സഭ ചെയ്ത തെറ്റുകള്‍ ഏറ്റ് പറഞ്ഞ് ജോണ്‍ പോള്‍ രണ്ടാമന്‍ മാപ്പ് പറഞ്ഞ കാര്യങ്ങളില്‍ ഈ ഇങ്ക്വിസിഷനും ഉണ്ടെന്ന് ബാബു പോള്‍ എങ്കിലും മറക്കരുതായിരുന്നു. കേരളത്തിലെ കാ.സഭ പുരോഹിതര്‍ക്കും ബാബു പോളിനും വായിക്കുവാന്‍ വത്തിക്കാനിലെ സൈറ്റില്‍ തന്നെ ഇപ്പോഴും അവ കിടപ്പുണ്ട്. MEMORY AND RECONCILIATION: THE CHURCH AND THE FAULTS OF THE PAST (ലിങ്ക്), "DAY OF PARDON" Sunday, 12 March 2000 (ലിങ്ക്)

കേരള സിലബസില്‍ മാത്രമല്ല സി.ബി.എസ്സ്.ഇ./ഐ.സി.എസ്സ്.ഇ. സിലബസില്‍ 10ആം ക്ലാസ്സില്‍ തന്നെ ഇങ്ക്വിസിഷന്‍ എന്ത് എന്ന് പഠിപ്പിക്കുന്നുണ്ട്. ദാ ഒരു ലിങ്ക് ഇ വിടെ. അതില്‍ പേയ്ജ് 160-161 നോക്കുക. ആ സിലബസ്സില്‍ പഠിപ്പിക്കുന്ന ടീചര്‍മാര്‍ക്കുള്ള് മാനുവലില്‍ (Formative Assessment Manual for Teachers Social Science (Class X)) 21ആം പേയ്ജ് നോക്കുക. അതായത് കേരള സിലബസ്സ് മാത്രമേ കാ. പുരോഹിതര്‍ക്ക് പ്രശ്നമുള്ളൂ!!! അത് മാത്രമേ കമ്മ്യൂണിസ്റ്റ്കാര്‍ തയ്യാറാക്കിയതായുള്ളൂ!!! കേന്ദ്രന്മാര്‍ തയ്യാറാക്കുന്നതില്‍ ഇതേ സാധനം കണ്ടാല്‍ പ്രതികരിക്കുവാന്‍ മുട്ടിടിക്കുന്നത് എന്തിന്? എതിര്‍ക്കുമ്പോള്‍ എല്ലാം എതിര്‍ക്കണ്ടയോ?

ചുരുക്കത്തില്‍ ഇനി കേരള ജനത ന്യൂനപക്ഷമെന്ന് അവകാശപ്പെടുന്ന കാ.സഭയ്ക്ക് അടിമപ്പെട്ട് കഴിയണം. ഇത് തന്നെയായിരുന്നു മദ്ധ്യകാലഘട്ടത്തില്‍ യൂറോപ്പില്‍ സംഭവിച്ചതും. മദ്ധ്യകാലഘട്ടം കേരളത്തില്‍ ആവര്‍ത്തിപ്പിക്കുവാന്‍ ശ്രമിക്കുന്ന കാ.സഭയ്ക്ക് മൂക്ക് കയറിടുവാന്‍ മറ്റൊരു മാര്‍ട്ടിന്‍ ലൂഥര്‍ പുനരവതരിക്കും വരെ കാത്തിരിക്കാം!

എന്തായാലും ഇനി 10ആം ക്ലാസ്സ് കഴിഞ്ഞ് പട്ടത്തിനായി വരുന്ന കുഞ്ഞാടുകളുടെ എണ്ണം കുറയില്ല എന്ന് പുരോഹിതര്‍ക്ക് ആശ്വസിക്കാം. പക്ഷേ ലോകചരിത്രത്തെ ഇത് പോലെ തോല്‍പ്പിച്ചിട്ട് ആയിരിക്കരുതായിരുന്നു!

10ആം ക്ലാസ്സ് കഴിയുന്നവര്‍ തങ്ങളുടെ കച്ചവട സ്ഥാപനത്തില്‍ (പ്രൊഫഷണല്‍ കോളേജ്) വന്നടിയുമെന്നും അതിനാല്‍ പിന്നീട് അവരുടെ ജീവിതത്തില്‍ യഥാര്‍ത്ഥ ചരിത്രം പഠിക്കില്ല എന്നും കാ.സഭയ്ക്കറിയാം!

ചികിത്സ കിട്ടാന്‍ $1 മോഷ്ടിക്കുമ്പോള്‍

2011-06-21T22:34:00.001-04:00

അമേരിക്കയില്‍ ഒരാള്‍ക്ക് ആരോഗ്യ ഇന്‍ഷ്വറന്‍സ് ഇല്ലെങ്കില്‍ ചികിത്സ കിട്ടുവാന്‍ വളരെ ബുദ്ധിമുട്ടാണ്. സ്വന്തം പോക്കറ്റില്‍ നിന്ന് ചികിത്സയ്ക്ക് കൊടുക്കേണ്ടി വരുന്നവര്‍ ഒടുവില്‍ പാപ്പര്‍ ഹര്‍ജി നല്‍കുന്നത് ഇടയ്ക്ക് സംഭവിക്കാറുണ്ട്. അങ്ങിനെയുള്ളവരെ രക്ഷിക്കുവാന്‍ ഒബാമ മെഡികെയര്‍ ബില്ല് പാസ്സാക്കിയെങ്കിലും 2014ഓടെ മാത്രമേ അതിന്റെ പ്രയോജനം സാധാരണക്കാര്‍ക്ക് ലഭിക്കുകയുള്ളൂ. എന്നാല്‍ ഇതിനെതിരെ റിപ്പബ്ലിക്കന്മാര്‍ ശക്തമായി രംഗത്തുണ്ട്.

സാമ്പത്തിക മാന്ദ്യത്തെ തുടര്‍ന്ന് അമേരിക്കയില്‍ തൊഴിലില്ലായ്മ രൂക്ഷം. അതിനാല്‍ തന്നെ ഇന്‍ഷ്വറന്‍സ് എടുക്കുവാന്‍ സാധാരണക്കാര്‍ക്ക് കഴിയാതെ വരുന്നു.

എന്നാല്‍ ഈ മാസം ആദ്യം വളരെ വ്യത്യസ്തമായ ഒരു സംഭവം നടന്നു. ഒരാള്‍ ബാങ്കില്‍ കയറി ചെന്ന് ബാങ്ക് കൊള്ളയടിച്ചു. കൌണ്ടറില്‍ ചെന്ന് $1 തരണമെന്ന ചീട്ട് നല്‍കി. പണം എത്ര ചെറുതെങ്കിലും ഇത് ബാങ്ക് കൊള്ള തന്നെ ആയതിനാല്‍ ഉടനെ പോലീസിനെ വിളിച്ചു. പോലീസ് വരുന്നത് വരെ കക്ഷി സൌമ്യനായി അവിടെ ഇരുന്നു.

തന്റെ ആരോഗ്യം നല്ലതല്ലെന്നും എന്നാല്‍ ചികിത്സിക്കാന്‍ പണമില്ലാത്തതിനാല്‍ കണ്ട മാര്‍ഗ്ഗമാണ് ബാങ്ക് കൊള്ളയടിക്കുക എന്നത്. ഇത് കേസ്സാകുമെന്നും ജയിലടക്കപ്പെടുമെന്നും അയാള്‍ക്ക് അറിയാം. അങ്ങിനെ ജയിലിലായാല്‍ ഗവണ്മെന്റ് അയാളുടെ ചികിത്സ നോക്കും. അതിനാണ് $1 മാത്രം ആവശ്യപ്പെട്ടത്! ഇപ്പോള്‍ കക്ഷി ജയിലില്‍ ചികിത്സയുമായി കഴിയുന്നു.

വര്‍ഷങ്ങള്‍ക്ക് മുന്‍പ് പുള്ളി കൊക്കോ കോള വിതരണം ചെയ്യുന്ന ജോലിയായിരുന്നു. എന്നാല്‍ മാന്ദ്യത്തെ തുടര്‍ന്ന് അത് നഷ്ടപ്പെട്ടു. പിന്നീട് പാര്‍ട്ട് ടൈമില്‍ ഒരു കടയില്‍ കിട്ടി പക്ഷേ വയസ്സായതിനാല്‍ ശരീരം അതിന് വഴങ്ങാതെയായി. പുറം വേദനയും മറ്റ് രോഗങ്ങളും പിടി കൂടി. എന്നാല്‍ ഇന്‍ഷ്വറന്‍സ് ഇല്ലാത്തതിനാല്‍ ചികിത്സിക്കാന്‍ മാര്‍ഗ്ഗമില്ലാതായി. കക്ഷി കണ്ടെത്തിയ മാര്‍ഗ്ഗമാണ് ബാങ്ക് കൊള്ള എന്നതിലൂടെ ചികിത്സയ്ക്കായി ജയിലില്‍ പോവുക എന്നത്!

പണക്കാര്‍ക്ക് വേണ്ടി വാദിക്കുന്ന ടീ പാര്‍ട്ടി/റിപ്പബ്ലിക്കന്മാര്‍ക്ക് മുന്നില്‍ വലിയ ഒരു ചോദ്യ ഛിഹ്നമായി ഈ കക്ഷി നില്‍ക്കുന്നു. ലക്ഷക്കണക്കിന് സാധാരണക്കാരുടെ പ്രതിനിധിയായി!

ചികിത്സയ്ക്ക് വേണ്ടി $1 കൊള്ളയടിച്ച് ജയിലില്‍ പോകേണ്ടി വരുന്ന അവസ്ഥ. അമേരിക്കയില്‍ ജയിലില്‍ പോയാലെങ്കിലും നല്ല ചികിത്സ കിട്ടും... ഇന്ത്യയിലോ?

ഇന്ത്യയിലും ഇത് പോലെ എത്ര ജീവിതങ്ങള്‍ പക്ഷേ റിപ്പബ്ലിക്കന്മാരെയും വെല്ലുന്ന ഇന്ത്യയിലെ മന്മോഹന്‍ സര്‍ക്കാരിന്റെ കണ്ണ് തുറക്കാന്‍.....!

കെ.വി. തോമസ്സ് റോക്ക്സ്

2011-06-12T21:53:00.002-04:00

കെ.വി. തോമസ്സ് വീണ്ടും “വളിച്ച തമാശ” പറഞ്ഞു. ഇപ്രാവശ്യം സ്വന്തം വാസ സ്ഥലമായ പശ്ചിമ കൊച്ചിക്കാരുടെ നെഞ്ചത്ത് പൊങ്കാലയിട്ടാണ്.

അരൂര്‍ ബൈപാസ് ടോള്‍ പിരിക്കും അത് കേന്ദ്ര നയമാണ് പോലും. ആയിക്കോട്ടെ പക്ഷേ 16 കി.മീ. കാറില്‍ സഞ്ചരിക്കുന്നവന്‍ 15രൂപ കൊടുക്കണം! 1 കി.മീ. ഓടാന്‍ 1 രൂപയോളം ടോള്‍!! തോപ്പും‌പടി പാലത്തില്‍ ചെയ്തത് പോലെ ഇനി ഇതിലൂടെ ഓടുന്ന ബസ്സുകാര്‍ യാത്രക്കാരനില്‍ നിന്ന് അത് പിരിക്കും എന്ന് ഉറപ്പ്! എറണാകുളത്തേയ്ക്ക് ജോലിക്കായി പോകുന്ന സെയിത്സ് ജോലി ചെയ്യുന്നവര്‍ ഉള്‍പ്പെടെയുള്ള സാധാരണക്കാരുടെ പോക്കറ്റ് തന്നെ അറുത്തെടുക്കണം!

പശ്ചിമ കൊച്ചിക്കാരന് എറണാകുളത്തേയ്ക്ക് വാഹനത്തില്‍ പോകണമെങ്കില്‍ ഗാമണ്‍ ഇന്ത്യയുടെ തോപ്പും‌പടി പാലത്തില്‍ ഒരു “ബിനാമി” നടത്തുന്ന ടോള്‍ ബൂത്തില്‍ കഴുത്തറുക്കാന്‍ വെച്ച് കൊടുക്കണം. ഇത് ഒഴിവാക്കി ഇടക്കൊച്ചി വഴി അരൂര്‍ പാലം കടന്ന് എറണാകുളത്തെ ആശ്രയിച്ചിരുന്നവര്‍ക്ക് ദാ ഇപ്പോള്‍ ഇരുട്ടടി പോലെ അവിടെയും തുടങ്ങിയിരിക്കുന്നു കഴുത്തറപ്പന്‍ ടോള്‍!

ഇനി പശ്ചിമ കൊച്ചിക്കാര്‍ക്ക് എറണാകുളത്തെത്താന്‍ എന്ത് വഴി? എവിടെയും ടോള്‍ റോഡിന് പകരം ടോള്‍ കൊടുക്കാതെ പോകുവാന്‍ മറ്റൊരു സംവിധാനം കാണും പക്ഷേ പശ്ചിമ കൊച്ചിക്കാര്‍ക്ക് മാത്രം അത് നിഷേധിച്ചിരിക്കുന്നു (ഗൂഗിള്‍ മാപ്പ്). അതും ഒരു കേന്ദ്രമന്ത്രി അവിടെ നിന്നും ഉണ്ടായിട്ട്....

എങ്കിലും എന്റെ തോമസ്സ് മാഷേ സ്വന്തം നാട്ടുകാരോട് ഈ ചതി വേണ്ടായിരുന്നു... വോട്ടണ്ണലില്‍ അത് വരെ മുന്നില്‍ നിന്ന എതിര്‍ സ്ഥാനാര്‍ത്ഥിയെ പിന്നിലാക്കി താങ്കള്‍ മുന്നിലെത്തി വിജയിച്ചത് പശ്ചിമ കൊച്ചിയിലെ വോട്ടെണ്ണല്‍ തുടങ്ങി അവസാനിച്ചപ്പോഴായിരുന്നു എന്ന കാര്യം മറന്ന് പോകല്ലേ!

16 കി.മീ. മാത്രമുള്ള അരൂര്‍-ഇടപ്പള്ളി റോഡ് വീതി കൂട്ടി പൂര്‍ത്തിയായപ്പോള്‍ അത് കടക്കുവാന്‍ 15രൂപ അപ്പോള്‍ എന്‍.എച്ച്.47 വീതി കൂട്ടി പൂര്‍ണമാകുമ്പോള്‍ തിരുവനന്തപുരത്ത് നിന്ന് യാത്ര ചെയ്യുന്ന ഒരാള്‍ എത്ര രൂപ ടോള്‍ കൊടിക്കേണ്ടി വരും!

ടോളുകളിലെ ബിനാമികളെ (അതോ ബിനാമിയോ!) പറ്റി അന്വേഷിച്ചാല്‍ ഒരു പക്ഷേ കേന്ദ്ര സര്‍ക്കാരിന് ഒരു അഴിമതി കൂടി തൊപ്പിയില്‍ വെച്ച് അഭിമാനിക്കാം.

കാ.പുരോഹിതരെ കൊണ്ട് തോറ്റു!

2011-06-06T20:46:00.000-04:00

ദാ പിന്നെയും വരുന്നു അവഹേളനം.. ഈ പ്രാവശ്യം ബി.എ. മലയാളത്തില്‍ ആണ് പോലും... ഒരു നാടകത്തില്‍.... അതും രചിച്ചിരിക്കുന്നത് എം.ജി.യു.വിലെ അദ്ധ്യാപകന്‍ ബാലചന്ദ്രന്‍ മാഷും... അതില്‍ സഭയ്ക്കും, ഇടയലേഖനത്തിനും എതിരെ വാചകങ്ങള്‍ ഉണ്ടത്രേ! സഹിക്കുമോ കാ. പുരോഹിതര്‍!!

ബി.എ. മലയാളത്തില്‍ സിലബസില്‍ ഉള്ളത് മാത്രമേ വിദ്യാര്‍ത്ഥികള്‍ പഠിക്കുകയും വായിക്കുകയും ഉള്ളൂ എന്ന് വിചാരിക്കുന്ന ഈ കാ. പുരോഹിതര്‍ ഇത്രയ്ക്ക് “ബുദ്ധിമാന്മാരോ”!!! അത്രയ്ക്ക് മത നിന്ദയായിരുന്നുവെങ്കില്‍ ആ പുസ്തകം ഇറങ്ങിയപ്പോള്‍ തന്നെ നിരോധിക്കുകയല്ലേ വേണ്ടിയിരുന്നത്... മലയാളം പഠിക്കുന്ന വിദ്യാര്‍ത്ഥികള്‍ക്ക് അപ്പോള്‍ പിന്നെ അവ വായിക്കുവാന്‍ കിട്ടില്ലല്ലോ!!!

തെറ്റുകള്‍ക്ക് ജോണ്‍ പോള്‍ രണ്ടാമന്‍ മാപ്പ് പറഞ്ഞിട്ടും ആ പഴയ യൂറോപ്പ്യന്‍ മിഡില്‍ ഏജിലെ പ്രേതങ്ങള്‍ കേരളത്തില്‍ ഇപ്പോഴും അലഞ്ഞ് നടക്കുന്നു!!

കോണ്‍ഗ്രസ്സ് ഇന്ത്യയെ നാണം കെടുത്തി വീണ്ടും

2011-06-04T21:30:00.000-04:00

കള്ളപണത്തിനും അഴിമതിക്കുമെതിരെ സമാധാനപരമായി ഡെല്‍ഹിയില്‍ സമരം നടത്തിയിരുന്ന ആയിരക്കണക്കിന് ജനങ്ങളെ പാതിരാത്രിയില്‍ ടിയര്‍ ഗ്യാസും, ലാത്തിയും ഉപയോഗിച്ച് തുരുത്തി കൊണ്ട് കോണ്‍ഗ്രസ്സ് പാര്‍ട്ടി ലോകത്തിന് മുന്‍പില്‍ വീണ്ടും ഇന്ത്യയുടെ മാനം കെടുത്തിയിരിക്കുന്നു. (വീഡിയോ ദൃശ്യങ്ങള്‍)

രാജ്യത്തിന്റെ വിവിധ ഭാഗത്ത് നിന്നെത്തിയ സ്ത്രീകളെ സുരക്ഷിതമായ പന്തലില്‍ നിന്ന് പാതിരാത്രിയില്‍ ഡെല്‍ഹിയിലെ തെരുവിലേയ്ക്ക് വലിച്ചെറിഞ്ഞവരെ എന്ത് പേരിട്ട് വിളിക്കണം? പാതിരാത്രിയില്‍ പരിചയമില്ലാത്ത ഡെല്‍ഹി തെരുവില്‍ സ്ത്രീകള്‍ പകച്ച് നിന്നപ്പോള്‍ സുഖമായി കിടന്നുറങ്ങിയ കോണ്‍ഗ്രസ്സ് അദ്ധ്യക്ഷയുടെ പ്രതികരിക്കണം എന്തായിരിക്കും?

കാ. പുരോഹിതര്‍ ഇറങ്ങിയിട്ടുണ്ട്, വീണ്ടും!

2011-05-31T19:28:00.001-04:00

പത്താം ക്ലാസ്സ് സാമൂഹ്യപാഠത്തിലെ ആദ്യ അദ്ധ്യായത്തില്‍ കാത്തലിക്ക് സഭയ്ക്കെതിരെ പരാമര്‍ശനം ഉള്‍പ്പെടുത്തിയെന്ന് പറഞ്ഞ് കാ. സഭ പുരോഹിതര്‍ ഉറഞ്ഞ് തുള്ളുവാന്‍ വീണ്ടും ശ്രമിക്കുന്നു!

പാഠ പുസ്തകത്തിലെ ഒന്നാം പാഠത്തില്‍ നവോത്ഥാനം (Renaissance) എന്നിടത്താണ് (അദ്ധ്യായത്തിന്റെ പി.ഡി.എഫ്. ലിങ്ക്) കാ.സഭയെ പറ്റി “തെറ്റ് ധരിപ്പിക്കുന്ന” പരാമര്‍ശം ഉള്ളത് പോലും.

ലോക ചരിത്രം വായിച്ചിട്ടുള്ള ആര്‍ക്കും മനസ്സിലാകുന്നതാണ് മദ്ധ്യ കാലഘട്ടത്തില്‍ യൂറോപ്പില്‍ നടന്ന ഫ്യൂഡല്‍ ഭരണാധികാരികളുടെയും കാ. സഭ പുരോഹിതരുടെയും ഇരുണ്ട ചരിത്രം. യൂറോപ്പില്‍ അക്കാലത്ത് നടന്ന കൊലകളുടെയും അഴിമതികളുടെയും പരമ്പരകള്‍ സഹിക്ക വയ്യാതെ, അടിച്ചമര്‍ത്തലുകളില്‍ നിന്ന് ഉയര്‍ത്തെഴുന്നേറ്റ നഗ്ന സത്യം കുട്ടികള്‍ അറിയെരുതെന്ന പിടി വാശിയുമായി കേരളത്തിലെ കാ.സഭ ഇപ്പോള്‍ രംഗത്തെത്തിയിരിക്കുന്നു. കാ.സഭയുടെ ഇരുണ്ട ചരിത്രം എഴുതിയത് ഇടത് ചിന്താഗതിക്കാര്‍ മാത്രമാണെന്ന തരത്തിലുള്ള തരം താണ പ്രചരണവുമായി പുരോഹിതര്‍ പതിവ് പോലെ രംഗത്തെത്തിയിരിക്കുന്നു. ഇതെല്ലാം വിശദമായുള്ള വിദേശ ചരിത്രകാരന്മാരുടെ പുസ്തകങ്ങളെ പറ്റി ഇവര്‍ ഒന്നും മിണ്ടുന്നുമില്ല! എന്തിന് കേരളത്തില്‍ തന്നെ കോളേജ് തലത്തില്‍ ഇതിലും “കൂടുതല്‍” പഠിപ്പിക്കുന്നതിനെ പറ്റി പോലും പരാമര്‍ശിക്കുന്നില്ല.

പത്താം ക്ലാസ്സ് കഴിയുന്നവരില്‍ ചിലര്‍ വൈദിക പഠനത്തിനായി വരുമെന്നും അവര്‍ ഇത് വായിച്ചാല്‍ പ്രശ്നമാകുമെന്ന വിചിത്ര കാഴ്ചപ്പാട് ഒരു ബിഷപ്പ് പറയുന്നതായി കണ്ടു! സഭയ്ക്ക് വൈദിക പഠനത്തിന് ആളെ കിട്ടുവാന്‍ ചരിത്ര സത്യം പഠിതാക്കളില്‍ നിന്ന് മറച്ച് വെയ്ക്കണമെന്ന വാശി ഭയാനകം തന്നെ! മിഡില്‍ ഏജിലേയ്ക്കുള്ള തിരിച്ച് പോക്ക് കേരളത്തില്‍ വേണോ?

ഡിഗ്രിക്കും, പി.ജി.ക്കും മിഡില്‍ ഏജിലെ യൂറോപിലെ ഫ്യൂഡല്‍ ഭരണാധികാരികളുടെയും, കാ.സഭയുടെയും “ചെയ്തികളെ” കുറിച്ച് വിശദമായി പഠിപ്പിക്കുന്നതില്‍ പ്രശ്നം കാണാത്തവര്‍ അതിന് മുന്‍പ് പത്താം ക്ലാസ്സില്‍ കുട്ടികള്‍ ഇതിനെ പറ്റി അറിഞ്ഞാല്‍ അത് കാ. സഭയെ അവഹേളിക്കലും, മത നിന്ദയുമായി പോകുന്നു എന്ന കണ്ട് പിടുത്തത്തെ എന്താണാവോ വിളിക്കേണ്ടത്?

Indulgences വിറ്റ് കാശുണ്ടാക്കുവാന്‍ ശ്രമിച്ചു എന്നത് പത്താം ക്ലാസ്സിലെ പാഠ പുസ്തക രചിയതാക്കള്‍ കണ്ടെത്തിയ പുതിയ സംഭവമെന്ന മട്ടിലാണ് കാ. സഭ വിമര്‍ശ്നം! അക്കാലത്ത് ദൈവ നിന്ദ നടത്തുവരെ വിചാരണ ചെയ്തിരുന്നത് എങ്ങിനെയെന്ന് കുട്ടികളും അറിയുന്നതില്‍ തെറ്റെന്താണ്? പ്രൊട്ടസ്റ്റന്റ് മതത്തിന് കാരണക്കാരനായ മാര്‍ട്ടിന്‍ ലൂഥറിനെ കുറിച്ചുള്ള ഭാഗങ്ങള്‍ കാ. സഭയ്ക്ക് സഹിക്കില്ല എന്നത് വാസ്തവം തന്നെ. പക്ഷേ ചരിത്രം അതായി പോയി.

മതം ഇല്ലാതെയും ആളുകള്‍ ജീവിക്കുന്നുണ്ടെന്ന് കുട്ടികള്‍ക്ക് പറഞ്ഞ് കൊടുക്കുവാന്‍ ശ്രമിച്ചപ്പോള്‍ വെകിളി പൂണ്ടവര്‍ ദാ ഇപ്പോള്‍ യൂറോപ്പില്‍ നടന്ന ചരിത്രം കുട്ടികളെ പഠിപ്പിക്കണ്ട എന്ന് പറഞ്ഞ് ഉറഞ്ഞ് തുള്ളുന്നു. അതും വൈദിക പഠനത്തിലേയ്ക്ക് ആളെ കിട്ടാതാകുമെന്ന ഭയം മൂലം!

പ്രശ്നത്തെ പറ്റി പഠിക്കുവാന്‍ പുതിയ ഗവണ്മെന്റ് ഉണര്‍ന്ന് പ്രവര്‍ത്തിക്കുന്നു. ഉടനെ കമ്മറ്റിയെ നിയമിച്ചു. എം.ജി.എസ്സ്.നെ ക്ഷണിച്ചെങ്കിലും പുള്ളി എതിര്‍പ്പുമായി രംഗത്തെത്തി കഴിഞ്ഞു. കമറ്റിയുടെ തലപ്പത്ത് ചരിത്രകാരന് പകരം ബ്യൂറോക്രാറ്റിനെയാണ് പ്രതിഷ്ഠിച്ചിരിക്കുന്നതെന്ന ആരോപണം എം.ജി.എസ്സ്. ചൂണ്ടികാട്ടി കഴിഞ്ഞു. ഇക്കൊല്ലം കുട്ടികള്‍ക്ക് ലഭിച്ചിട്ടുള്ളത് ഫലപ്രദമായ പാഠപുസ്തകമാണെന്നും പുള്ളി പറഞ്ഞ് വെച്ചു. കാ. സഭയ്ക്കെതിരെയുള്ള ഭാഗങ്ങള്‍ വന്നതിന് കാരണം ഇന്ത്യ പിന്തുടരുന്നത് ബ്രിട്ടീഷ്കാരെ ആയത് കൊണ്ടാണെന്നും കൂട്ടി ചേര്‍ത്തു. ഇടതില്‍ നിന്ന് ചാടി ബി.ജെ.പി.യില്‍ കുടി കയറിയ എം.ജി.എസ്സ്. ആണ് ഇത് പറയുന്നത് എന്നത് കാ. സഭ പുരോഹിതരുടെ തനി നിറം പുറത്ത് കൊണ്ടു വരുന്നു. എന്നാല്‍ മറ്റ് രാജ്യങ്ങളിലെ ചരിത്രകാരന്മാരും കാ. സഭയുടെ അന്നത്തെ “പ്രവര്‍ത്തനങ്ങളെ” കുറിച്ച് മറിച്ച് പറയുന്നില്ല എന്നത് എം.ജി.എസ്സ്. മനപൂര്‍വ്വം വിട്ട് കളയുന്നു.

തെറ്റ് ചെയ്യാത്തവര്‍ ആരും തന്നെയില്ല. കാ. സഭയും തെറ്റ് ചെയ്തിട്ടുണ്ട് എന്ന് ഏറ്റ് പറഞ്ഞ് മാപ്പിരുന്ന ജോണ്‍ പോള്‍ രണ്ടാമന് തോന്നിയ നന്മ കേരളത്തിലെ ചില കാ. സഭ പുരോഹിതര്‍ക്കില്ല എന്നത് ദു:ഖകരം തന്നെ. അവര്‍ക്ക് ഭയമാണ്... യൂറോപ്പിലെയും അമേരിക്കയിലെയും മറ്റും പോലെ ജനങ്ങള്‍ പുരോഹിതരുടെ “വലയത്തില്‍” നിന്ന് അകന്ന് പോകുമോ എന്ന ഭയം!

വയറ്റത്തടി കെ. ബാബുവിന്റെ വക

2011-05-27T20:12:00.000-04:00

കുടിയന്മാരുടെ കുടുംബത്തിന്റെ വയറ്റത്തടിച്ച് കെ. ബാബുവും രംഗ പ്രവേശം ചെയ്യുന്നു.

കഴിഞ്ഞ സര്‍ക്കാര്‍ അനുവദിച്ച ബിവറേജസ് കോര്‍പ്പറേഷന്റെ 12 ഔട്ട് ലെറ്റുകള്‍ റദ്ദ് ചെയ്തു. പക്ഷേ അതിനോടൊപ്പം കൊടുത്ത 46 ബാര്‍ ലൈസന്‍സുകള്‍ റദ്ദ് ചെയ്യില്ല പോലും. 3 സ്റ്റാര്‍ പദവിക്ക് മുകളിലുള്ളവയ്ക്ക് എല്ലാം ലൈസന്‍സ് കൊടുക്കണമെന്നാണ് അബ്കാരി നിയമം അത് പറ്റിയാല്‍ തിരുത്തും പോലും!

കൂടാതെ കുടി കുറക്കുവാന്‍ ബിവറേജസിന്റെ സമയത്തില്‍ മാറ്റം വരുത്തുന്നു പോലും.

ചുരുക്കത്തില്‍ ബിവറേജസില്‍ നിന്ന് കുറഞ്ഞ വിലയ്ക്ക് സെക്കന്റ്സ് അടിച്ചിരുന്നവര്‍ക്ക് ഇനി ബാര്‍ ഹോട്ടലുകളില്‍ ചെന്ന് കൂടിയ വില നല്‍കി സെക്കന്റ്സ് അടിക്കണം. സെക്കന്റ്സ് വിറ്റ് കാശുകാരായി കൊണ്ടിരുന്ന ബിവറേജസിലെ “പാവം തൊഴിലാളികള്‍” പട്ടിണിയില്‍!! ഇനി അത് ബാറ് മുതലാളിമാരുടെ പോക്കറ്റില്‍!

വീട്ടമാര്‍ക്ക് കിട്ടിയിരുന്ന കാശില്‍ കുറവ് വരുത്തുമെന്നല്ലാതെ ഈ പരിഷ്കാരം കൊണ്ട് എന്ത് നേടാന്‍ പോകുന്നു? മദ്യ വിമുക്തമാക്കുവാന്‍ തുനിയുന്നുവെങ്കില്‍ അതിനുള്ള ഫലപ്രദമായ മാര്‍ഗ്ഗങ്ങളാണ് നടപ്പാക്കേണ്ടത്. അല്ലായെങ്കില്‍ ആന്റണിയുടെ ചാരായ നിരോധനം പോലെയാകും.

മദ്യ വിമുക്തമാക്കാന്‍ എന്ന പേരും പറഞ്ഞ് തെരഞ്ഞെടുപ്പില്‍ സഹായിച്ച ബാറ് മുതലാളിമാരെ സഹായിക്കാന്‍ ഇതിലും നല്ല ഒരു മാര്‍ഗ്ഗം വേറെ ഉണ്ടോ?

ജനങ്ങളുടെ വയറ്റത്തടിച്ച് തുടക്കം!

2011-05-25T22:02:00.000-04:00

ശത്രുവിനോട് പക വീട്ടുന്നത് ജനങ്ങളുടെ വയറ്റത്തടിച്ച് ആയാലും വേണ്ടില്ല എന്ന് “മെഗാ ഫെയിം” തെളിയിക്കുന്നു. അധികാര വികേന്ദ്രീകരണത്തെ തകര്‍ത്ത് തരിപ്പണമാക്കിയാലും വേണ്ടില്ല തന്റെ ശത്രുവിന് മുഴുവന്‍ വകുപ്പും നല്‍കില്ല എന്നാണ് ഈ ജേതാവിന്റെ തീരുമാനം (വാര്‍ത്ത).

സാധാരണ ജനങ്ങളുടെ നെഞ്ചത്ത് പൊങ്കാലയിടുന്നവരെ വന്‍ഭൂരിപക്ഷത്തില്‍ തന്നെ വേണം ജയിപ്പിച്ച് വിടുവാന്‍... ഒരു നിയോജക മണ്ഡലത്തിലെ ജനങ്ങള്‍ ചെയ്ത “ഉപകാരം” അനുഭവിക്കേണ്ടി വരുന്നത് കേരളത്തിലെ മൊത്തം സാധാരണ ജനങ്ങളാണെന്നുള്ളത് ദയനീയം തന്നെ!

മനുഷ്യന്‍ നിസ്സഹായകനാകുന്നത്!

2011-05-15T23:06:00.000-04:00

മഞ്ഞ് വീഴ്ചയ്ക്കും, പേമാരിയ്ക്കും, ടെര്‍ണാഡോകള്‍ക്കും, വമ്പന്‍ കാറ്റുകള്‍ക്കും പുറകേ അമേരിക്കയില്‍ മിസിസ്സിപ്പി നദി നിറഞ്ഞ് ഒഴുകുന്നു. എന്നാല്‍ വെള്ളം പതുക്കെയാണ് പൊങ്ങുന്നത് എന്നതിനാല്‍ ആളുകള്‍ക്ക് സാധനങ്ങളുമായി ഒഴിഞ്ഞ് മാറുവാന്‍ അവസരം ലഭിക്കുന്നു. നദിയെ തടഞ്ഞ് നിര്‍ത്തുവാന്‍ മൈലുകളോളം മണല്‍ ചാക്കുകള്‍ ഉയര്‍ത്തി നോക്കിയിട്ടും രക്ഷയില്ലാതായി. വലിയ പട്ടണങ്ങളെ രക്ഷിക്കുവാന്‍ ചെറിയ പട്ടണങ്ങളിലേയ്ക്ക് വെള്ളം തുറന്ന് വിടുന്നു.

ദിവസങ്ങളായി മനുഷ്യനെ നിസ്സഹായകനാക്കി കവിഞ്ഞ് ഒഴുകുന്ന മിസിസ്സിപ്പിയെ കുറിച്ചുള്ള കൂടുതല്‍ വാര്‍ത്തകള്‍ കാണുവാന്‍:

രാഹുലിന്റെ വൃത്തികെട്ട നാടകം

2011-05-13T21:37:00.000-04:00

ഗ്രെയിറ്റര്‍ നോയിഡയില്‍ ഭൂമി വിട്ട് കൊടുക്കുന്നതിനെ എതിര്‍ത്ത് കര്‍ഷകര്‍ സമരം ചെയ്തതിനെ തുടര്‍ന്ന് ഉണ്ടായ ലഹളയില്‍ പോലീസുകാരും കര്‍ഷകരും മരണമടഞ്ഞു. അവിടെ നിരോധനാജ്ഞ പ്രഖ്യാപിച്ചു.

ഈ തക്കം നോക്കി ബൈക്കിന്റെ പുറകില്‍ യാത്ര ചെയ്ത് നമ്മുടെ “അമൂല്‍ ബേബി” ആ സ്ഥലത്ത് കടന്ന് ചെന്ന് നിയമം ലംഘിച്ച് കര്‍ഷകരെ കൂട്ടി സമരം തുടങ്ങി. പോലിസ് പുള്ളിയെ അറസ്റ്റ് ചെയ്തു. കൊണ്ടു പോകും വഴി പുള്ളി ഒരു ഡയലോഗ്. അവിടെ ചെന്നപ്പോഴാണ് കര്‍ഷകരുടെ ദയനീയ സ്ഥിതി മനസ്സിലായതെന്നും യു.പി. സര്‍ക്കാര്‍ സ്ഥലം ഏറ്റെടുക്കുന്നതില്‍ നിന്ന് പിന്മാറണം എന്നും...

ഈ അമൂല്‍ ബേബി സമരം ചെയ്യേണ്ടത് ജനപഥ് 10 ന്റെ മുന്നിലാണ്. വ്യവസായ വികസനം എന്ന പേരിട്ട് വങ്കിട സ്വകാര്യന്മാര്‍ക്ക് വേണ്ടി കര്‍ഷകരില്‍ നിന്നും ഗ്രാമവാസികളില്‍ നിന്നും അവരുടെ ഭൂമി തട്ടി പറിക്കുവാന്‍ ഉത്തരവ് ആദ്യമിട്ടത് കേന്ദ്രത്തിലുള്ള സ്വന്തം പാര്‍ട്ടി തന്നെയെന്ന് ഇനിയെങ്കിലും അമൂല്‍ ബേബി തിരിച്ചറിയുക.

വരാനിരിക്കുന്ന സംസ്ഥാന തെരഞ്ഞെടുപ്പില്‍ വോട്ട് നേടാന്‍ ഇത് പോലുള്ള തരം താണ കളി അമൂല്‍ ബേബിക്ക് ആവശ്യമുണ്ടോ?

കര്‍ഷകരോട് അത്ര സ്നേഹമെങ്കില്‍ ആദ്യം ജനപഥ് 10ല്‍ ചെന്ന് ജനവിരുദ്ധമായ എസ്സ്.ഇ.ഇസഡ്. എന്ന നിയമം നിര്‍ത്തലാക്കുവാന്‍ നോക്കൂ... ബഡ്ജറ്റില്‍ കൃഷിക്കായി ഇപ്പോള്‍ നീക്കി വെച്ചിരിക്കുന്ന 1.2% എന്ന നിസ്സാര സംഖ്യ ഒരു 12% എങ്കിലും ആക്കുവാനുള്ള തന്റേടം കാണിക്കൂ... അല്ലാതെ ഇത് പോലെയുള്ള വൃത്തികെട്ട നാടകം.. അയ്യേ...

മതത്തിന് സബ്സിഡി പട്ടിണിക്കോ?

2011-05-11T08:02:00.000-04:00

പുണ്യ സ്ഥലങ്ങള്‍ സന്തര്‍ശിക്കുവാന്‍ ഇന്ത്യന്‍ സര്‍ക്കാര്‍ വിശ്വാസികള്‍ക്ക് കോടിക്കണക്കിന് രൂപയാണ് സബ്സിഡി നല്‍കുന്നത്. ഇന്ത്യക്കാര്‍ നല്‍കുന്ന ടാക്സിന്റെ ചെറിയ ഒരു അംശം മാത്രമേ ഇത്തരത്തില്‍ ചെലവാക്കുന്നുള്ളൂ എന്ന് സുപ്രീം കോടതി നിരീക്ഷിച്ചിരുന്നു.

എന്നാല്‍ ആ ചെറിയ തുക എത്രയാണ്? ഹജ് തീര്‍ഥാടനത്തിന് 2011ല്‍ ചെലവാക്കുവാന്‍ ബഡ്ജറ്റില്‍ നീക്കി വെച്ചിരിക്കുന്നത് 600 കോടി! കൈലാസ് യാത്രയ്ക്ക് ഗവണ്മെന്റ് സബ്സിഡിയൊന്നും നേരിട്ട് കൊടുക്കുന്നില്ല എന്നാണ് ലോകസഭയിലെ രേഖകള്‍ പറയുന്നത്. എങ്കിലും 2010ല്‍ ഗവണ്മെന്റിന് കൈലാസ് യാത്രയുമായി ബന്ധപ്പെട്ട് 24 ലക്ഷത്തോളം ചെലവായി.

1999ല്‍ 123 കോടി സബ്സിഡി ഹജിനായി കൊടുത്ത സമയത്ത് ഇനി ഈ സബ്സിഡി പതുക്കെ ഇല്ലാതാക്കണമെന്ന് പാര്‍ലമെന്ററി കമ്മറ്റി ശുപാര്‍ശ ചെയ്തിരുന്നു. എന്നാല്‍ 2011 എത്തിയപ്പോള്‍ തുക 600 കോടിയില്‍ എത്തി നില്‍ക്കുന്നു. 2009ല്‍ ആന്ദ്ര ഹൈകോടതി ക്രിസ്ത്യാനികള്‍ക്ക് പുണ്യ സ്ഥലം സന്തര്‍ശിക്കുന്നതിനായി 2 കോടി സബ്സിഡി നല്‍കുന്നത് ശരിയല്ല എന്ന് നിരീക്ഷിച്ചിരുന്നു.

ഇനി ഇന്ത്യയിലെ പാവപ്പെട്ടവന് വേണ്ടി ഇന്ത്യന്‍ ഗവണ്മെന്റ് ചെയ്യുന്നതോ?

അത് കാണണമെങ്കില്‍ ഈ ദൃശ്യങ്ങള്‍ കാണണം (ഐ.ബി.എന്‍. ലൈവ്). അതില്‍ അവസാന ഭാഗത്തുള്ള നമ്മുടെ തോമസ്സ് മാഷിന്റെ വാക്കുകള്‍ കേള്‍ക്കാതിരിക്കരുത്.

സൂക്ഷിക്കുവാന്‍ സ്ഥലമില്ലെങ്കില്‍ പട്ടിണിക്കാര്‍ക്ക് വെറുതെ കൊടുക്കണമെന്ന സുപ്രീം കോടതി നിരീക്ഷണത്തിന് ശേഷവും കേന്ദ്ര സര്‍ക്കാര്‍ പാവപ്പെട്ടവന് വേണ്ടി ചെയ്ത ഉപകാരമാണ് ആ എരിഞ്ഞ് അടങ്ങുന്ന ടണ്‍കണക്കിന് അരി ചാക്കുകള്‍!

ആത്മീയ വളര്‍ച്ചയ്ക്ക് കോടികള്‍ സബ്സിഡി കൊടുക്കുവാന്‍ കാശുണ്ട് പക്ഷേ ഒരു നേരത്തെ ആഹാരത്തിന് വകയില്ലാത്തവര്‍ ജീവിക്കുന്ന ഇന്ത്യയില്‍ ഭക്ഷണം നശിച്ച് പോകാതെ ശേഖരിച്ച് വെയ്ക്കുന്ന കെട്ടിടങ്ങള്‍ പണിയാന്‍ ചില്ലി കാശില്ല, എങ്കില്‍ വെറുതെ കൊടുക്കുവാന്‍ പറഞ്ഞാലോ അതിനും ഉടക്ക് ന്യായങ്ങള്‍ ആവശ്യത്തിന്!

കൊച്ചി കീടനാശിനി ഫാക്റ്ററി പൂട്ടിച്ചു

2011-05-10T08:47:00.000-04:00

ഒടുവില്‍ അത് സംഭവിച്ചു. ഹിന്ദുസ്ഥാന്‍ ഇന്‍സെക്റ്റിസൈഡ്സ് ലിമിറ്റഡ് (എച്ച്.ഐ.എല്‍.) എന്ന സ്ഥാപനം വീണ്ടും പൂട്ടിച്ചു. മലിനീകരണ നിയന്ത്രണ ബോര്‍ഡ് ആണ് ഇത്തവണ ഉത്തരവിട്ടത്. മലിനീകരണം നടത്തുന്നു എന്ന പേരില്‍ 2004ല്‍ സുപ്രീം കോടതി പൂട്ടിച്ചതിന് ശേഷം തുറന്ന് പ്രവര്‍ത്തിച്ച കമ്പനി വീണ്ടും നിയമം ലംഘിച്ചു എന്നതിനാലാണ് ഇപ്പോള്‍ ഈ നടപടി എന്നത് ഗൌരവം നിറഞ്ഞതാണ്.

ഗ്രീന്‍പീസ് ഉള്‍പ്പെടെയുള്ള സംഘടനകള്‍ ചൂണ്ടി കാട്ടിയത് 2004ല്‍ സുപ്രീം കോടതി അംഗീകരിച്ചു.

ഏലൂര്‍ പുഴയില്‍ കീടനാശിനികളുടെ അംശം ഭീകരമാണെന്ന് പല പഠനങ്ങളും തെളിയിച്ചിട്ടുണ്ട്. ആ പ്രദേശത്ത് താമസിക്കുന്നവര്‍ക്ക് മാറാ രോഗങ്ങളും, ആരോഗ്യ പ്രശ്നങ്ങളും പിടിപ്പെട്ടിട്ടുണ്ട് എന്നും തെളിഞ്ഞിട്ടുണ്ട്. ഗ്രീന്‍ പീസ് എന്ന സംഘടന അപൂര്‍വ്വമായി നിയമിക്കുന്ന റിവര്‍ കീപ്പര്‍ ഏലൂരിലും ഉണ്ട്. "Global Toxic Hot spot" ആയ ഏലൂരില്‍ റിവര്‍ കീപ്പറായി (ലോകത്തെ രണ്ടാമത്തെ) വി.ജെ. ജോസിനെ 2002ലാണ് നിയമിക്കുന്നത്. കൊഴിക്കണ്ടം തോട്ടില്‍ നിന്ന് 111 തരത്തിലുള്ള രാസ വസ്തുക്കളാണ് അന്ന് കണ്ടെത്തിയത്. ഈ തോടിന്റെ അരികിലാണ് എച്ച്.ഐ.എല്‍., മെര്‍ക്കം തുടങ്ങിയ നിരവധി സ്ഥാപനങ്ങള്‍. 111ല്‍ 39 എണ്ണം പെര്‍സിസ്റ്റന്റ് ഓര്‍ഗാനിക്ക് പൊല്യൂട്ടന്റ് (പി.ഒ.പി.) വിഭാഗത്തില്‍ പെടുന്നവയായിരുന്നു. പതിറ്റാണ്ടുകള്‍ കഴിഞ്ഞിട്ടും ഇന്നും അതിന് കുറവ് ഒന്നുമില്ല. ഇന്നും ഇടയ്ക്ക് ഈ പുഴ ചുവന്ന നിറത്തില്‍ ഒഴുകാറുണ്ട്. മീനുകള്‍ കൂട്ടത്തോടെ ചത്ത് മലക്കാറുണ്ട്. പെരിയാറിനെ രക്ഷിക്കുവാന്‍ പല സമരങ്ങളും ഏലൂരിലും പരിസര പ്രദേശങ്ങളിലും നടന്നിട്ടുണ്ട്.. നടക്കുന്നുണ്ട്.. ഇനിയും നടക്കും...

അധികാരികളുടെ കണ്ണുകള്‍ തുറക്കുവാന്‍ ഇപ്പോള്‍ ഒരു എന്‍ഡോസള്‍ഫാന്‍ പ്രശ്നം വേണ്ടി വന്നു!

മെയ് 10ആം തിയതി മലിനീകരണ ബോര്‍ഡ് ഇറക്കിയ ഓര്‍ഡറില്‍ പറയുന്നത് (പി.ഡി.എഫ്.) കമ്പനി പരിസരത്ത് ആരോഗ്യത്തിന് ഹാനികരമാക്കുന്ന വേയ്സ്റ്റ് കുഴികളില്‍ നിന്ന് നീക്കം ചെയ്തിട്ടില്ല എന്നാണ്. ജൂണ്‍ 30, 2010ല്‍ നീക്കം ചെയ്ത് കുഴി നികത്തേണ്ടതായിരുന്നു. നോട്ടീസ് നല്‍കിയപ്പോള്‍ ഏപ്രില്‍ 30, 2011ല്‍ കുഴി മൂടുമെന്ന് അവസാനം കമ്പനി മറുപടി നല്‍കി. എന്നാല്‍ ഇക്കഴിഞ്ഞ 2ആം തിയതി പരിശോധിച്ചപ്പോള്‍ കമ്പനി ഒരു നടപടിയും കൈ കൊണ്ടിട്ടില്ല എന്ന് കണ്ടതിനാലാണ് ഇപ്പോള്‍ ഈ നിരോധന ഉത്തരവ് 10ആം തിയതി ഇറക്കിയിരിക്കുന്നത്.

2004ല്‍ എച്ച്.ഐ.എല്‍. ഉള്‍പ്പെടെ 200ഓളം കമ്പനികള്‍ കോടതി പൂട്ടിച്ചിരുന്നു. എച്ച്.ഐ.എല്‍.നെ പോലെ ആ കമ്പനികളും നിയമം ലംഘിച്ചിട്ടുണ്ടോ എന്ന് പരിശോധിക്കണം. വേണ്ട സംവിധാനങ്ങള്‍ ഉപയോഗിച്ച് പാഴ്ജലം ശുദ്ധമാണെന്ന് കമ്പനികള്‍ ഉറപ്പാക്കിയിട്ടാണ് പുഴയിലേയ്ക്ക് അവ തള്ളുന്നത് എന്ന് ബോര്‍ഡ് ഉറപ്പ് വരുത്തണം. അത് വരെ ജോലിക്കാര്‍ക്ക് ശമ്പളം നല്‍കി കൊണ്ട് കമ്പനിയുടെ പ്രവര്‍ത്തനങ്ങള്‍ നിര്‍ത്തി വെയ്പിക്കണം.

ബാബയും പോപ്പും പിന്നെ വിമര്‍ശകരും

2011-05-01T12:32:00.000-04:00

സായിബാബ പലതരത്തിലുള്ള രോഗികളെ സുഖപ്പെടുത്തിയെന്ന് അവകാശപ്പെട്ടിരുന്നു എന്നാല്‍ സ്വയം രോഗിയായപ്പോള്‍ എന്ത് കൊണ്ട് സ്വയം രക്ഷപ്പെടുത്തിയില്ല എന്ന നഗ്ന സത്യം ചൂണ്ടി കാട്ടി സോഷ്യല്‍ മീഡിയകളില്‍ ആളുകളുടെ പ്രവാഹമായിരുന്നു. ബാബയുടെ “മാജിക്കുകള്‍” തുറന്ന് കാട്ടുന്ന വീഡിയോകള്‍ക്ക് ലഭിക്കുന്ന ഹിറ്റ് കുത്തനെ ഉയര്‍ന്നു. ഇന്ത്യയിലെ പ്രമുഖ റാഷണലിസ്റ്റ് നേതാക്കള്‍ ടി.വി. ഷോകളില്‍ നിറഞ്ഞാടി. കള്ളത്തരത്തിലൂടെ വിശ്വാസികളെ പറ്റിക്കുന്നു എന്ന് പറഞ്ഞായിരുന്നു നിലവിളി. മരിച്ച് കഴിഞ്ഞും ഇവര്‍ രംഗത്ത് തന്നെ നിറഞ്ഞ് നിന്നു.

വത്തിക്കാന്‍ ഒരു പ്രഖ്യാപനം നടത്തിയിരുന്നു. മരിച്ച് പോയ പഴയ പോപ്പ് ജോണ്‍ പോള്‍ രണ്ടാമന്‍ ഒരു കന്യാസ്ത്രീയുടെ പാര്‍ക്കിണ്‍സണ്‍ രോഗം ഒറ്റ രാത്രി കൊണ്ട് മാറ്റി കൊടുത്തത് ശരിയാണെന്ന് തെളിഞ്ഞെന്നും ശാസ്ത്ര ലോകത്തിന് ഇതിനെ വിശദീകരിക്കുവാന്‍ കഴിയില്ല എന്നും അതിനാല്‍ മെയ് 1ന് ജോണ്‍ പോള്‍ രണ്ടാമനെ വിശുദ്ധിയിലേയ്ക്ക് ഉയര്‍ത്തുന്നു എന്നും.

പാര്‍ക്കിണ്‍സണ്‍ രോഗം വന്ന് മരിച്ച പോള്‍ രണ്ടാമന്‍ എന്ത് കൊണ്ട് സ്വയം രോഗ വിമുക്തനാകാന്‍ കഴിഞ്ഞില്ല എന്ന ചോദ്യവുമായി ഏതെങ്കിലും ഒരു റാഷണിലിസ്റ്റ് എങ്കിലും രംഗത്ത് വരുമെന്ന് വിചാരിച്ച് സോഷ്യല്‍ മീഡിയകള്‍ അരിച്ചു പെറുക്കി. ബാബയ്ക്കെതിരെ നിറഞ്ഞാടിയവര്‍ ഈ “അത്ഭുത”ത്തിനെതിരെ രംഗത്തെത്തി കണ്ടില്ല!

“സേയിന്റ് ഫാക്റ്ററി” എന്ന് കൂടി അറിയപ്പെടുന്ന ജോണ്‍ പോള്‍ രണ്ടാമനെ വിശുദ്ധപദവിയിലേയ്ക്ക് ഉയര്‍ത്തുമ്പോള്‍ The Survivors Network of those Abused by Priests (SNAP) എന്ന കൂട്ടായ്മ പീഡനത്തിരയായ കുട്ടികളെ സംരക്ഷിക്കുവാന്‍ ജോണ്‍ പോള്‍ രണ്ടാമന്‍ ഒന്നും ചെയ്തില്ല എന്ന് ഓര്‍മ്മിപ്പിച്ച് രംഗത്ത് വന്നത് മാധ്യമങ്ങള്‍ ചര്‍ച്ച ചെയ്തില്ല എന്നതും രസകരം തന്നെ! SNAP says that Vatican officials are “deepening the suffering of so many, by elevating a man who did almost nothing to stop bishops from ignoring and concealing heinous crimes.” (വിശദമായി ഇവിടെ)

വത്തിക്കാനില്‍ ജോണ്‍ പോള്‍ രണ്ടാമനെ വിശുദ്ധ പദവിയിലേയ്ക്ക് ഉയര്‍ത്തുമ്പോള്‍ കാത്തലിക്ക് പള്ളികള്‍ക്ക് പുറത്ത് പീഡനത്തിനരയായവര്‍ “കുട്ടികള്‍ക്കെതിരെ പീഡനം നടന്നു എന്ന് കണ്ടാല്‍ അപ്പോള്‍ തന്നെ അധികാരികളെ അറിയിക്കും” എന്ന് ഓര്‍മ്മപ്പെടുത്തുന്ന ലഘു രേഖകള്‍ വിതരണം ചെയ്യുമെന്ന് സ്നാപ്പ് പത്രകുറിപ്പിറക്കിയിരുന്നു.

ചുരുക്കത്തില്‍ ബാബ വിശ്വാസികളെ പറ്റിച്ച് ജീവിച്ചു എന്ന് തുറന്ന് കാട്ടുവാന്‍ സോഷ്യല്‍ മീഡിയകളില്‍ ആവേശത്താല്‍ ഇടിയായിരുന്നു എന്നാല്‍ വത്തിക്കാന്‍ അധികാരികള്‍ അതേ അടവ് പ്രയോഗിക്കുമ്പോള്‍ ആ ആവേശക്കാരെ മഷിയിട്ട് നോക്കിയിട്ട് കാണാനില്ല! ബാബ വിരുദ്ധ ചര്‍ച്ചകള്‍ നടത്തി ഇവരെല്ലാം ക്ഷീണിച്ച് ഉറക്കമാണെന്ന് തോന്നുന്നു.....

നിങ്ങളുടെ ഗുളിക ദോഷമുള്ളതല്ലേ?

2011-04-29T22:45:00.001-04:00

ദോഷമുള്ളതല്ല എന്ന് ഉറപ്പിച്ച് പറയുവാനാകുമോ? നമ്മള്‍ കഴിക്കുന്ന പല ഇംഗ്ലീഷ് മരുന്നുകളും മറ്റ് പല രോഗങ്ങളിലേയ്ക്കും നയിക്കുകയില്ല എന്ന് ഉറപ്പ് വരുത്തേണ്ടത് നമ്മള്‍ തന്നെയാണ്. വിവരങ്ങള്‍ കൈവിരല്‍ തുമ്പില്‍ ലഭിക്കുമ്പോള്‍ എന്തിന് സമയം കളയുന്നു?

ഒരു പോസ്റ്റില്‍ ഞാന്‍ പാരസറ്റമോള്‍ കുട്ടികളില്‍ ആസ്തമയുണ്ടാക്കുമെന്ന പഠനം പരിചയപ്പെടുത്തിയിരുന്നു. അത് പോലെ തന്നെ കഴിഞ്ഞ ദിവസം ടൈപ്പ് 2 പ്രമേഹത്തിനായി കൊടുക്കുന്ന ഗ്ലൈം പ്രൈഡ് എന്ന ഗുളികയെ പറ്റി നോക്കിയപ്പോള്‍ അത് ഹൃദ്രോഗം ഉണ്ടാക്കുവാന്‍ ഇടയുണ്ടാക്കുമെന്നും സൂക്ഷിക്കണമെന്നും അമേരിക്കയിലെ നാഷണല്‍ ഇന്‍സ്റ്റിറ്റ്യൂറ്റ് ഓഫ് ഹെല്‍ത്ത് (എന്‍.ഐ.എച്ച്.) ന്റെ സൈറ്റില്‍ കാണുവാനിടയായി... പുതിയതായി പുറത്ത് വന്ന പഠനങ്ങളുടെ അടിസ്ഥാനത്തില്‍ ഫെബ്രുവരി 2011ലാണ് ഈ വാണിങ് പുറത്ത് വിട്ടിരിക്കുന്നത്... വെറുതെ നോക്കിയപ്പോള്‍ പരിചയമുള്ള ചില ഗുളികകള്‍ ഇത് പോലെ പല പ്രശ്നങ്ങളും ഉണ്ടാക്കുന്നവയാണെന്ന് കാണുവാനിടയായി... പാരസെറ്റമോള്‍ ഒറ്റ തവണ കഴിക്കുവാനുള്ള അളവ് 325 മില്ലി ഗ്രാം ആക്കി പോലും. ഞാന്‍ കഴിച്ച് കൊണ്ടിരുന്നത് ഡോളോ 600 എന്ന ഇനമായിരുന്നു, അതും കുടുംബ ഡോക്റ്റര്‍ പരിചയപ്പെടുത്തിയ സാധനം!!! അതില്‍ നിന്ന് 500 ആയി കുറഞ്ഞതിന്റെ സങ്കടത്തില്‍ ഇരിക്കുകയായിരുന്നു!! എഫ്.ഡി.എ. ഇപ്പോള്‍ പറയുന്നതനുസരിച്ചാണെങ്കില്‍ എന്റെ കരള്‍ നല്ല കണ്ടീഷന്‍ ആയിട്ടുണ്ടാകണം, 600ന്റെ എത്രയെണ്ണമാണ് അകത്താക്കിയിട്ടുള്ളത് :-)

നമ്മള്‍ കഴിക്കുന്നവ സുരക്ഷിതമാണോ എന്നറിയാന്‍ ഈ സൈറ്റ് ഉപയോഗപ്പെടുത്തുക (ലിങ്ക്).

എഫ്.ഡി.എ.യുടെ മറ്റ് രണ്ട് സൈറ്റുകള്‍ കൊള്ളാമെന്ന് തോന്നുന്നു. ആദ്യത്തേത്, രണ്ടാമത്തേത്.

ഇനി അതിന് പകരം എന്ത് എന്ന് കേരളത്തിലെ ഡോക്റ്ററോട് ചോദിച്ചാലോ.. ഗ്ലൈം പ്രൈഡ് നിരോധിച്ചിട്ടില്ല അത് ഫലപ്രദമെന്നാണ് പകരം ഗുളികയ്ക്ക് ചെന്നപ്പോള്‍ ഡോക്റ്റര്‍ പറഞ്ഞത്!! പിന്നെ നിര്‍ബന്ധമെങ്കില്‍ ഡോസ് കുറഞ്ഞത് തരാം എന്ന് പറഞ്ഞ് അത് കുറിച്ചു!

കെ.പി.എസ്സ്. തമാശകള്‍ വീണ്ടും!

2011-04-26T21:41:00.004-04:00

കെ.പി.സുകുമാരന്‍ എന്ന ബ്ലോഗര്‍ ഇത്തവണ എന്‍ഡോസള്‍ഫാനെ അനുകൂലിച്ച് ബസ്സിട്ടു...
ഒരു ലിങ്ക് കിട്ടി അവിടെ എത്തിയപ്പോള്‍ പുള്ളി പഴയ തിരുനക്കര തന്നെ എന്ന് മാത്രമല്ല വായനക്കാരെ തെറ്റ് ധരിപ്പിക്കുന്ന കുറേ ഡയലോഗുകളും....

തെറ്റുകള്‍ ചൂണ്ടികാട്ടി കമന്റിയതിനെ തുടര്‍ന്ന് പടിയടച്ച് താഴിട്ട് പൂട്ടിയതിനാല്‍ അവിടെയിടേണ്ടത് ഇവിടെ എന്റെ സ്വന്തം ബ്ലോഗില്‍ പോസ്റ്റാക്കുന്നു..

<< ഹാഫ് ലൈഫ് എന്നാല്‍ എന്‍ഡോസല്‍ഫാന്റെ തന്മാത്രകള്‍ അതേ ഫോര്‍മ്യൂലയില്‍ നില്‍ക്കുന്ന കാലദൈര്‍ഘ്യമാണ്. അതിന്റെ അര്‍ത്ഥം എന്‍ഡോസല്‍ഫാന്‍ യൂറോപ്യന്‍ യൂനിയന്റെ നിരീക്ഷണ പ്രകാരം തന്നെ 180 ദിവസത്തില്‍ കൂടുതല്‍ നിലനില്‍ക്കില്ല എന്നാണ്. അതായത് ആ മോളിക്യൂളുകള്‍ മറ്റൊരു പദാര്‍ത്ഥമായി മാറി. ഹാഫ് ലൈഫ് എന്ന പ്രതിഭാസത്തെ പറ്റി കെമിസ്ട്രിയില്‍ പഠിച്ചത് ഓര്‍ക്കുമല്ലൊ......... തന്മാത്രകളുടെ അര്‍ദ്ധായുസ്സ് അഥവാ ഹാഫ് ലൈഫ് രസതന്ത്രത്തില്‍ പഠിച്ചത് ഇനിയും മറന്നു പോകാത്തവര്‍ക്ക് മാത്രമേ സ്റ്റോക് ഹോം കണ്‍‌വെന്‍ഷനിലെ പ്രോസസ്സിങ്ങും ഞാന്‍ ഇപ്പോള്‍ പറഞ്ഞതും ഗ്രഹിക്കാന്‍ കഴിയൂ >>
എന്റെ മാഷേ വായനക്കാരെ പടു വിഢികളാക്കി മാറ്റാതെ... ഹാഫ്= പകുതി, ലൈഫ്=കാലഘട്ടം/ജീവിതം എന്നെങ്കിലും മനസ്സിലാക്കാമായിരുന്നില്ലേ!!! താങ്കള്‍ സൂചിപ്പിച്ച ആ കെമസ്ട്രി ബുക്ക് ഒന്ന് എടുത്ത് വായിച്ചിരുന്നുവെങ്കില്‍, ഒന്ന് വിക്കിയെങ്കിലും നോക്കിയിരുന്നുവെങ്കില്‍ ഇത് പോലെ........

അതായത് ഒരു വസ്തുവിന്റെ അളവ് പകുതിയാകുന്നതിനുള്ള സമയം... 1കിലോ എന്‍ഡോസള്‍ഫാന്‍ 1/2 കിലോ ആകാന്‍ വേണ്ട സമയം.. ഇനി ബാക്കി 1/2 കിലോ അടുത്ത 60/180ദിവസം കൊണ്ടും തീരില്ല... ആ 1/2 കിലോയുടെ പകുതിയേ നശിക്കൂ.. അപ്പോള്‍ പിന്നെ താങ്കളുടെ വാദം എങ്ങിനെ ശരിയാകും? ഇനി തുടക്കത്തില്‍ 1കിലോ എന്നത് 1000കിലോ ആയാല്‍ അത് 1കിലോ ആകാന്‍ എത്ര സമയം എടുക്കുമെന്നതാണ് ഇന്നത്തെ ഹോം വര്‍ക്ക്.. നാളെ രാവിലെ ആകുമ്പോഴേയ്ക്കും ചെയ്ത് തീര്‍ക്കണേ.... കാരണം അതറിഞ്ഞാലേ കാസര്‍ഗോഡ് ഇപ്പോഴും എന്‍ഡോസള്‍ഫാന്റെ അംശം കണ്ടെത്തുന്നത് എന്ത് കൊണ്ട് എന്ന് മനസ്സിലാകൂ... എന്നിട്ട് പോരെ സ്റ്റോക്ക് ഹാം :) പിന്നെ എന്‍ഡോസള്‍ഫാന്‍ ഏത് പി.എച്ച്.ലാണ് ഉള്ളത് എന്നതും പ്രാധാന്യമാണ്. അസിഡിക്കാണെങ്കില്‍ കാലതാമസം എടുക്കും....

പിന്നെ എന്‍ഡോസള്‍ഫാന്‍ മറ്റൊരു രൂപം ആയി മാറുന്നു എന്ന് താങ്കള്‍ പറഞ്ഞു... ആ വസ്തു എന്‍ഡോസള്‍ഫാനേക്കാളും ഭീകരനാണെന്ന് അറിയുമോ? അതിനും ഹാഫ് ലൈഫ് ഉണ്ട്... ടോട്ടല്‍ റെസിഡ്യൂ എന്നായിരിക്കും റിപ്പോര്‍ട്ടുകളില്‍ രേഖപ്പെടുത്തിയിരിക്കുക... അമേരിക്കയുടെ (യൂറോപ്പിന്റെയല്ല കേട്ടോ) ഇപീഎ പറയുന്നത് ഈ ടോട്ടല്‍ റെസിഡ്യൂസ് 6 വര്‍ഷം വരെ കാണുമെന്നാണ്... 10 വര്‍ഷം കഴിഞ്ഞിട്ടും കാസര്‍ഗോഡ് ഷെരിയ പുഴയിലെ സെഡിമെന്റ്സില്‍ ഇപ്പോഴും എന്‍ഡോസള്‍ഫാന്‍ കണ്ടെത്തി എന്നാണ് പൊലൂഷന്‍ കണ്ട്രോള്‍ ബോര്‍ഡ് പറയുന്നത് (പി.ഡി.എഫ്.).

<<യുറോപ്യന്‍ യൂനിയന്റെ ഫണ്ട് കൈപ്പറ്റുന്ന ഒരു സന്നദ്ധ സംഘടന മാത്രമാണ് കാസര്‍ഗോട്ടെ പ്രശ്നത്തിന് കാരണം എന്‍ഡോസല്‍ഫാന്‍ ആണെന്ന് പറഞ്ഞിട്ടുള്ളത്... സര്‍ക്കാ‍ര്‍ നിയമിച്ച ഒരു കമ്മറ്റിയും അങ്ങനെ പറഞ്ഞിട്ടില്ല >>

നെറ്റ് അരിച്ച് പെറുക്കിയിട്ടും പുള്ളിക്ക് Indian Council of Medical Researchന്റെ കീഴിലുള്ള എന്‍.ഐ.ഒ.എച്ച്.ന്റെ പഠന റിപ്പോര്‍ട്ട് (പി.ഡി.എഫ്.) കണ്ടെത്താനായില്ല എന്നത് കഷ്ടം തന്നെ.. എന്‍.ഐ.ഒ.എച്ച്. റിപ്പോര്‍ട്ടില്‍ നിന്നുള്ള കുറച്ച് ഭാഗം [ആണ്‍ കുട്ടികളില്‍ ലൈംഗിക വളര്‍ച്ചയ്ക്ക് താമസം നേരിടുന്നതിനെ പറ്റി] Environmental Health Perspectives എന്ന അന്താരാഷ്ട്ര ജേര്‍ണലില്‍ 2003ല്‍ പ്രസിദ്ധീകരിച്ചിട്ടുണ്ട് (പി.ഡി.എഫ്.). കേരളത്തില്‍ 2003ല്‍ സമര്‍പ്പിച്ച ശിവരാമന്‍ റിപ്പോര്‍ട്ട് (പി.ഡി.എഫ്.) ഒന്ന് വായിച്ച് നോക്കാമായിരുന്നു. പക്ഷേ എക്സോണും മറ്റ് എന്‍ഡോസള്‍ഫാന്‍ ഉല്‍പ്പാദക കമ്പനികളും സ്പോണ്‍സര്‍ ചെയ്ത എന്‍ഡോസള്‍ഫാന്‍ അനുകൂല റിപ്പോര്‍ട്ട് മാത്രമേ പുള്ളി വിശ്വസിക്കൂ... പക്ഷേ എന്‍ഡോസള്‍ഫാന്‍ അനുകൂല റിപ്പോര്‍ട്ടുകളില്‍ നടന്ന തിരിമറികള്‍ പിന്നീട് “ഡൌണ്‍ ടു എര്‍ത്ത്” പുറത്ത് കൊണ്ട് വന്നിരുന്നു.

<<“Today Beharin & Qathar opposed India's move againist the ban on endosulphan. These 2 countries are from Gulf region where there is hardly no agricultural production apart from dates & hence they dont need endosulphan.“>>

എന്ന് കെ.പി.എസ്സ്. അവിടെ കമന്റിട്ടിട്ടുണ്ട്.. ഇതില്‍ നിന്ന് തന്നെ പുള്ളിക്കാരന് എന്‍ഡോസള്‍ഫാന്‍ എന്തിന് വേണ്ടിയെല്ലാം ഉപയോഗിക്കുന്നുണ്ട് എന്ന അടിസ്ഥാന വിവരം പോലുമില്ല എന്ന് തെളിയുന്നു...

<<"എന്‍ഡോസല്‍ഫാന്‍ ഉപയോഗിക്കുന്നത്കൊണ്ട് തേനീച്ചകള്‍ക്ക് ഒരു പ്രശ്നവും ഉണ്ടായിട്ടില്ല.">>

തേനീച്ചകള്‍ക്ക് നാശം സംഭവിക്കുമെന്ന് തെളിയിക്കുന്ന പരീക്ഷണങ്ങള്‍ നടത്തിയിട്ടുണ്ടെന്നും ആ റിപ്പോര്‍ട്ടുകള്‍ ശാസ്ത്ര ജേര്‍ണലുകളില്‍ വന്നിട്ടുണ്ടെന്നും എന്നുള്ളത് പുള്ളി വായനക്കാരില്‍ നിന്ന് മറച്ച് വെയ്ക്കുന്നത് എന്തിനാണ്?

എന്‍ഡോസള്‍ഫാന്‍ നിരോധിച്ചാല്‍ കാര്‍ഷിക മേഖല കടം കയറുമെന്നാണ് കെ.പി.എസ്സ്. പറഞ്ഞ് വെയ്ക്കുന്നത്.

മാഷേ ഇക്കൊല്ലത്തെ ബഡ്ജറ്റില്‍ കാര്‍ഷിക മേഖലയ്ക്ക് ഇന്ത്യന്‍ സര്‍ക്കാര്‍ നീക്കി വെച്ചിരിക്കുന്ന തുക എത്ര % എന്ന് അറിയുമോ? എഴുതാന്‍ തന്നെ എനിക്ക് നാണമാകുന്നു... എങ്കിലും താങ്കളുടെ അറിവിലേയ്ക്കായിട്ട് പറയാം കാര്‍ഷിക മേഖലയ്ക്കുള്ള മൊത്തമായ നീക്കിയിരുപ്പ് വെറും 1.2% മാത്രം. എന്നാല്‍ ഡിഫെന്‍സിന് 16% ആണെന്ന് ഓര്‍ക്കുക. (ബഡ്ജറ്റിന്റെ പി.ഡി.എഫ്. രൂപം).

വാല്‍കഷണം:
നാല് മാസം മാത്രം പ്രായമുള്ള കൊച്ചു കുട്ടിക്ക് മാസമുറ വന്ന കഥ ദാ ഇവിടെ വായിക്കാം.. ഓ നമ്മള്‍ക്കെന്താ കര്‍ഷകരും, കൃഷിയിടങ്ങളില്‍ ജോലി ചെയ്യുന്നവരും അവരുടെ കുഞ്ഞുങ്ങളും അല്ലേ അനുഭവിക്കുക... നമുക്ക് "പുഴുങ്ങിയും പച്ചക്കും തിന്നാല്‍" മതിയല്ലോ...

ഈ സാധനം കൊണ്ട് ഒരു പ്രശ്നവും ഉണ്ടാകില്ല എന്ന് ഇത്രയ്ക്ക് വിശ്വാസമുണ്ടെങ്കില്‍ താങ്കള്‍ എന്‍ഡോസള്‍ഫാന്‍ പരീക്ഷണത്തിന് തെയ്യാറാണെന്ന് പറഞ്ഞ് എഴുതി കൊടുക്കരുതോ... പരീക്ഷണ വസ്തു ആകാന്‍ ആരും തയ്യാറാകുന്നില്ല.. താങ്കളെ പോലെ ധീരന്മാരായി ആരും തന്നെയില്ല അതാണ്....

എന്‍ഡോസള്‍ഫാന്‍: തിരിഞ്ഞ് നോട്ടം

2011-04-24T18:22:00.000-04:00

പുതിയ പഠനങ്ങള്‍ നടന്നതിന് ശേഷം മാത്രമേ എന്‍ഡോസള്‍ഫാന്റെ കാര്യത്തില്‍ തീരുമാനമെടുക്കൂ എന്ന വാശിയിലാണ് കേന്ദ്രസര്‍ക്കാര്‍. ഇടത് സര്‍ക്കാറിന്റെ പിന്തുണയോടെ ഭരിച്ചിരുന്ന സമയത്ത് കേരളത്തില്‍ എന്‍ഡോസള്‍ഫാന്‍ നിരോധിച്ച് കൊണ്ടാണ് പഠനത്തിന് തയ്യാറായത്. എന്ത് കൊണ്ട് ഇപ്പോള്‍ കോണ്‍ഗ്രസ്സ് സര്‍ക്കാര്‍ അതു പോലെ നിരോധനം നടത്തിയിട്ട് പഠനം നടത്തുവാന്‍ തയ്യാറാകുന്നില്ല! നിരോധനം നടത്തിയ കോണ്‍ഗ്രസ്സിന്റെ തുടര്‍ച്ചക്കാര്‍ ഭരിക്കുന്ന ഈ സര്‍ക്കാര്‍ തന്നെയാണ് പി.ഒ.പി. സമേളനത്തില്‍ എന്‍ഡോസള്‍ഫാന്‍ കൊണ്ട് പ്രശ്നമില്ല എന്ന് പറഞ്ഞതും ഇപ്പോള്‍ ആവര്‍ത്തിക്കുവാന്‍ തിനിയുന്നതും!

11 വര്‍ഷമായി കാസര്‍ഗോഡ് എന്‍ഡോസള്‍ഫാന്‍ പ്രശ്നം ഇന്ത്യയുടെ മുഖ്യ ധാരയിലെത്തിയിട്ട്. കാസര്‍ഗോഡ് മാത്രമല്ല തൊട്ടടുത്ത് കിടക്കുന്ന ദക്ഷിണ കര്‍ണാടകയിലുള്ള കശുവണ്ടി തോട്ട മേഖലയില്‍ താമസിക്കുന്നവര്‍ക്കും ഒരേ രോഗ ലക്ഷണങ്ങളാണ് ഉള്ളത്. രണ്ടിടത്തും എന്‍ഡോസള്‍ഫാന്‍ ഉപയോഗിച്ചിരുന്നു. ഇവിടങ്ങളില്‍ ആകാശ മാര്‍ഗ്ഗമാണ് തളി നടന്നത്.

പതിറ്റാണ്ടുകള്‍ക്ക് മുന്നേ പദ്രയില്‍ പ്രാക്ടീസ് ചെയ്യുന്ന ഡോക്ടര്‍ മോഹന കുമാര്‍ അവിടെ നടക്കുന്ന “ദുരിതത്തെ” ഡോക്റ്റര്‍മാരുടെ സംഘടനയുള്‍പ്പെടെയുള്ള വിദഗ്ദ്ധരുടെ മുന്നില്‍ എത്തിച്ചിരുന്നു. ജേര്‍ണലിസ്റ്റും സാമൂഹിക പ്രവര്‍ത്തകനുമായ ശ്രീ-പദ്രയും മാധ്യമങ്ങളിലൂടെ രംഗത്തിറങ്ങിയിരുന്നു.

1979ല്‍ ഒരു കര്‍ഷകന്‍ തന്റെ 3 കന്നുകാലി കുട്ടികളുടെ കാലുകള്‍ക്ക് സംഭവിച്ച വൈകല്യങ്ങളാണ് ആദ്യമായി ഈ പ്രദേശത്ത് കീടനാശിനികളുടെ ചര്‍ച്ചകള്‍ക്ക് തുടക്കമിട്ടത്. 1981ല്‍ ശ്രീ-പദ്രയുടെ “കശുവണ്ടിക്ക് വേണ്ടി ജീവന്‍ നശിക്കുന്നവരെ” പറ്റിയുള്ള ലേഖനമായിരിക്കാം ഒരു പക്ഷേ ആദ്യമായി ഈ പ്രശ്നത്തെ പുറത്തറിയിക്കുന്നത്.

1984ല്‍ രണ്ട് പഞ്ചായത്തുകള്‍ ആകാശ മാര്‍ഗം മരുന്ന് തളിക്കുന്നതിനെതിരെ റെസലൂഷന്‍ പാസ്സാക്കി. പിന്നീട് ജലസേചന മന്ത്രിയായിരുന്ന സുബ്ബറാവു ആകാശ മാര്‍ഗ്ഗമുള്ള മരുന്ന് തളി നിര്‍ത്തുവാന്‍ ഉത്തരവിട്ടു. രണ്ട് കൊല്ലത്തോളം ആകാശ മാര്‍ഗ്ഗമുള്ള മരുന്ന് തളി നടന്നില്ല. എന്നാല്‍ അതിന് ശേഷം വീണ്ടും പഴയ പടിയായി. എന്നാല്‍ അത് വരെ നടന്നിരുന്നത് അളവില്ലാത്ത കീടനാശിനി പ്രയോഗമാണെന്ന് തെളിയിക്കുന്ന രേഖകള്‍ പുറത്ത് വന്നിരുന്നു. ഇതിനിടയില്‍ ലോക്കല്‍ ക്ലബുകളും സംഘടനകളും രംഗത്തെത്തി. 1994ല്‍ Kerala Sastra Sahithya Parishad (KSSP) അവരുടെ നിരീക്ഷണം പ്രസിദ്ധീകരിച്ചു. ആകാശ മാര്‍ഗ്ഗം മരുന്ന് തളിക്കുന്നതാണ് പ്രശ്നമെന്നും ഇത് നിര്‍ത്തേണ്ടതാണെന്നും അവര്‍ പറഞ്ഞു വെച്ചു.

1998ല്‍ മുന്‍സിഫ് കോര്‍ട്ടില്‍ പെരിയ കൃഷി ഭവനിലെ ജീവനക്കാരിയായ ലീല കുമാരിയും കര്‍ഷകനായ കിട്ടനും ബോര്‍ഡിനെതിരെ കേസ്സ് ഫയല്‍ ചെയ്തു. സ്ഥലം മാറി വന്ന തനിക്കും കുട്ടികള്‍ക്കും സംഭവിക്കുന്ന ആരോഗ്യ പ്രശ്നത്തിന്‍ കാരണം ആകാശ മാര്‍ഗ്ഗമുള്ള മരുന്ന് തളിയാണെന്ന് തിരിച്ചറിഞ്ഞാണ് ലീല കുമാരി രംഗത്തെത്തുന്നത്. ലാഭം കിട്ടുവാന്‍ മനുഷ്യരുടെയും പ്രകൃതിയുടെയും ജീവന് വില കല്‍പ്പിക്കണ്ട എന്ന ബോര്‍ഡിന്റെ നിലപാടിനെ കോടതി രൂക്ഷമായി വിമര്‍ശിച്ചു. അങ്ങിനെ 1999ല്‍ ബോര്‍ഡിന് മരുന്നടി നടത്തുവാന്‍ കഴിഞ്ഞില്ല. പക്ഷേ അവര്‍ ഹൈകോടതിയില്‍ കേസ്സ് ഫയല്‍ ചെയ്തു. ഇതിനിടയില്‍ ലോക്കല്‍ മാധ്യമങ്ങള്‍ ഈ പ്രശ്നം ഏറ്റെടുത്തു കഴിഞ്ഞിരുന്നു.

അങ്ങിനെ 2000ത്തോടെയാണ് കേരളം ഈ പ്രദേശത്തെ ശ്രദ്ധിക്കുവാന്‍ തുടങ്ങിയത്. 2000 മാര്‍ച്ചിലെ പെസ്റ്റിസൈഡ്സ് ന്യൂസില്‍ INTACH (National Heritage)ലെ (തണല്‍) ഉഷ കേരളത്തിലെ ദുരിതം പ്രസിദ്ധീകരിച്ചു. ഉഷ നടത്തിയ സര്‍വേയ്ക്ക് മുന്‍പ് SEEK (The Society for Environmental Education in Keralam) സര്‍വേ നടത്തിയിരുന്നു. ഉഷയുടെ നിരീക്ഷണത്തില്‍ ആകാശ മാര്‍ഗ്ഗം എന്‍ഡോസള്‍ഫാന്‍ തളിക്കുന്നതാണ് അവിടെ താമസിക്കുന്നവരുടെ ആരോഗ്യ പ്രശ്നങ്ങള്‍ക്ക് കാരണം. 25-35 വയസ്സുള്ള ചെറുപ്പക്കാര്‍ കൌമാരക്കാരുടേത് പോലെയും എന്നാല്‍ ചെറുപ്പക്കാരികള്‍ പ്രായമായവരെ പോലെയും കാണപ്പെടുന്നു എന്ന് ഉഷ പറഞ്ഞ് വെയ്ക്കുന്നു. കൂടാതെ ആണ്‍കുട്ടികളില്‍ മുലകള്‍ വളരുന്നതായും, പ്രത്യുല്‍പ്പാദന ശേഷി കുറയുന്നതായും, സ്ത്രീകള്‍ക്ക് മാസമുറ കൃത്യമല്ലയെന്നും അവിടെയുള്ള ഡോക്റ്റര്‍മാര്‍ കണ്ടെത്തിയതായും പറയുന്നു. കൂടാതെ തൊലി പൊട്ടി പൊളിയുന്ന അസുഖവും സര്‍വ്വ സാധാരണമാണ് പോലും. ആകാശമാര്‍ഗ്ഗമുള്ള മരുന്ന് തളിയാണ് ഇതിനെല്ലാം കാരണം എന്ന് കാണാം.

അതിന് ശേഷം 2000ത്തിന്റെ ഒടുവിലാണ് Centre for Science and Environment (CSE) ഈ പ്രശ്നത്തിലേയ്ക്ക് കടന്ന് വരുന്നത്. ശാസ്ത്രീയമായ പഠനം നടത്തുവാന്‍ അവര്‍ തീരുമാനിക്കുന്നു. 1999ല്‍ തളിക്കാന്‍ കഴിയാതിരുന്ന ബോര്‍ഡ് 2000 അവസാനം മരുന്ന് തളി നടത്തി. ഇത് നടന്ന് കഴിഞ്ഞ് കുറച്ച് ദിവസങ്ങള്‍ക്ക് ശേഷം സി.എസ്സ്.ഇ. അവിടെ നിന്നും വെള്ളം, മണ്ണ്, മനുഷ്യരില്‍ നിന്നും മൃഗങ്ങളില്‍ നിന്നും രക്തം, പാല് തുടങ്ങിയവ ശേഖരിച്ചു.

അവര്‍ പുറത്ത് വിട്ട വിവരങ്ങള്‍ ഞെട്ടിക്കുന്നതായിരുന്നു. പ്ലാന്റേഷനില്‍ തളിക്കുന്ന എന്‍ഡോസള്‍ഫാനാണ് ആ പ്രദേശങ്ങളിലെ ആരോഗ്യ പ്രശ്നങ്ങള്‍ക്ക് കാരണമെന്നതിലേയ്ക്ക് ആദ്യമായി ശാസ്ത്രീയമായി വിരല്‍ ചൂണ്ടുന്ന ആ റിപ്പോര്‍ട്ടിന്റെ പിന്‍ബലത്തില്‍ അവര്‍ Down To Earth എന്ന മാസികയില്‍ “എന്‍ഡോസള്‍ഫാന്റെ കുട്ടികള്‍” എന്ന തലകെട്ടോടെ 2001 ഫെബ്രുവരിയില്‍ ഒരു ലേഖനം പ്രസിദ്ധീകരിച്ചു. കാണ്‍പൂര്‍ ഐ. ഐ.ടി.യിലും ഈ സാമ്പിളുകള്‍ പരിശോധിച്ചിരുന്നു. അവിടെ നിന്നുമുള്ള ഫലങ്ങളും സി.എസ്സ്.ഇ.യുടെ ഫലങ്ങളെ ശരിവെയ്ക്കുന്നവയായിരുന്നു.

Endosulfan Spray Protest Action Committee (ESPAC) യുടെയും മറ്റും പ്രതിഷേധങ്ങള്‍ ഉയര്‍ന്നതോടെ അന്നത്തെ ഇടത് സര്‍ക്കാര്‍ കൃഷി വകുപ്പിനോട് റിപ്പോര്‍ട്ട് ആവശ്യപ്പെട്ടു. അച്ചുതന്‍ കമ്മിറ്റിയെ നിയമിച്ചു. പ്ലാന്റേഷന്‍ കോര്‍പ്പറേഷന്‍ സാമ്പിളുകള്‍ എടുത്ത് ചെന്നൈയിലെ Fredrick Institute of Plant Protection and Toxicology ലാബില്‍ പരിശോധനയ്യ്ക്ക് അഴയ്ക്കുന്നു. ഒപ്പം കേരള കാര്‍ഷിക സര്‍വകലാശാലയും പഠനത്തിനായി ഇറങ്ങി. 2001 മാര്‍ച്ചില്‍ പി.സി.കെ.യോട് ആകാശ മാര്‍ഗമുള്ള തളിക്കല്‍ നിര്‍ത്തുവാന്‍ മലിനീകരണ ബോര്‍ഡ് നിര്‍ദ്ദേശിക്കുന്നു.

ഇതിനിടയില്‍ ഭരണം മാറുന്നു. വലത് സര്‍ക്കാര്‍ അധികാരത്തില്‍.

തമിഴ്നാട്ടില്‍ നിന്നുമുള്ള റിപ്പോര്‍ട്ടില്‍ മനുഷ്യരിലും മൃഗങ്ങളിലും എന്‍ഡോസള്‍ഫാന്റെ അംശം കണ്ടെത്തിയില്ല എന്നായിരുന്നു. ഇതിന്റെ ചില ഭാഗങ്ങള്‍ അവര്‍ ജേര്‍ണലില്‍ പ്രസിദ്ധീകരിച്ചു. എന്നാല്‍ തളി നടന്ന് 2-3 മാസം കഴിഞ്ഞ് ശേഖരിച്ച സാമ്പിളുകളില്‍ മണ്ണിലും, ഇലകളിലും എന്‍ഡോസള്‍ഫാന്റെ അംശം കണ്ടെത്തിയെന്നത് ഗൌരവം നിറഞ്ഞതായി തുടര്‍ന്നു.

2001 ഓഗസ്റ്റില്‍ കാസര്‍ഗോഡ് ചില പ്രദേശങ്ങളില്‍ മരുന്ന് തളിക്കുന്നത് തല്‍ക്കാലത്തേയ്ക്ക് കളക്റ്റര്‍ നിരോധിച്ച് കൊണ്ട് ഉത്തരവിറങ്ങി.

മനുഷ്യ അവകാശ കമ്മീഷന്‍ സ്വയം ഏറ്റെടുത്ത് Indian Council of Medical Researchനെ റിപ്പോര്‍ട്ട് സമര്‍പ്പിക്കുവാന്‍ നിയമിച്ചു. അങ്ങിനെ ഐ.സി.എം.ആര്‍.ന്റെ കീഴിലുള്ള National Institute of Occupational Healthല്‍ നിന്നും 3 പേരെ പരീക്ഷണ-നിരീക്ഷണങ്ങള്‍ക്കായി നിയോഗിച്ചു.

കാര്‍ഷിക സര്‍വകലാശാലയുടെ റിപ്പോര്‍ട്ട് പുറത്ത് വന്നു. അതില്‍ പക്ഷേ എന്‍ഡോസള്‍ഫാന്‍ കൊണ്ട് യാതൊരു പ്രശ്നവുമില്ല എന്നായിരുന്നു. എന്നാല്‍ ഈ പഠനം സ്പോണ്‍സര്‍ ചെയ്തത് എന്‍ഡോസള്‍ഫാന്‍ ഉല്‍പ്പാദക സംഘടനയാണെന്നതിനാല്‍ വിശ്വസിക്കുക പ്രയാസമായി.

അച്ചുതന്‍ കമ്മിറ്റി റിപ്പോര്‍ട്ട് പുറത്ത് വിട്ടു. തെളിവെടുപ്പുകള്‍ക്ക് അവസാനം പദ്രയിലും പരിസര പ്രദേശത്തും കാണുന്ന ആരോഗ്യ പ്രശ്നങ്ങള്‍ക്ക് കാരണം എന്‍ഡോസള്‍ഫാന്‍ ആണെന്നതിനുള്ള തെളിവുകളില്ല എന്നും എന്നാല്‍ എന്‍ഡോസള്‍ഫാന്‍ കൊണ്ടല്ല ഈ പ്രശ്നങ്ങള്‍ക്ക് കാരണമെന്ന് പറയുവാന്‍ കഴിയില്ല എന്നും ആയിരുന്നു നിരീക്ഷണം. അതിനാല്‍ ആകാശ മാര്‍ഗ്ഗമുള്ള മരുന്ന് തളി നിര്‍ത്തണം എന്ന് കമ്മിറ്റി നിര്‍ദ്ദേശം മുന്നോട്ട് വെച്ചു. കൂടാതെ പ്രശ്ന ബാധിത പ്രദേശത്ത് 5 കൊല്ലത്തേയ്ക്ക് എന്‍ഡോസള്‍ഫാന്‍ തളിക്കുന്നത് നിരോധിക്കുവാനും ആവശ്യപ്പെട്ടു. പാവപ്പെട്ട രോഗ ബാധിതര്‍ക്ക് സര്‍ക്കാര്‍ ധനസഹായം നല്‍കണം എന്നും പറഞ്ഞ് വെച്ച് അവര്‍ തലയൂരി.

2002 ജനുവരിയില്‍ എന്‍.ഐ.ഒ.എച്ച്. പഠനത്തിന്റെ ആദ്യ റിപ്പോര്‍ട്ട് പുറത്ത് വിട്ടു. ഇതില്‍ ആണ്‍ കുട്ടികളില്‍ പ്രായപൂര്‍ത്തിയാകുന്നത് താമസിക്കുന്നതും, പെണ്‍കുട്ടികള്‍ നേരത്തെ ധൃതുമതികളാകുന്നതും, കുട്ടികളില്‍ താഴ്ന്ന ഐ.ക്യു. തുടങ്ങിയവ പ്രശ്ന ബാധിത പ്രദേശത്തുണ്ട് എന്നായിരുന്നു. 2000ത്തില്‍ ഉഷ പ്രസിദ്ധീകരിച്ചതും ഇത് തന്നെയായിരുന്നു.

ഇതിനിടയില്‍ തണല്‍ എന്ന എന്‍.ജി.ഒ. തങ്ങളുടെ പഠന റിപ്പോര്‍ട്ടിന്റെ രണ്ടാം ഭാഗം പുറത്ത് വിട്ടു (പി.ഡി.എഫ്.). അതിലും മറ്റ് പ്രദേശത്തെ അപേക്ഷിച്ച് എന്‍ഡോസള്‍ഫാന്‍ തളിക്കുന്ന പ്രദേശത്ത് ആരോഗ്യ പ്രശ്നങ്ങള്‍ വഷളാണെന്നായിരുന്നു.

ഈ പ്രശ്നങ്ങള്‍ക്കിടയില്‍ എന്‍ഡോസള്‍ഫാന്‍ നിരോധനം നീക്കുവാന്‍ കൃഷി മന്ത്രിയായ ഗൌരിയമ്മയുടെ നേതൃത്വത്തില്‍ നീക്കങ്ങള്‍ നടന്നെങ്കിലും പ്രതിഷേധങ്ങളെ തുടര്‍ന്ന് നടക്കാതെ വന്നു. എന്‍ഡോസള്‍ഫാന്‍ നിര്‍മ്മാതാക്കളുടെ സംഘടന ശാസ്ത്രീയമായ തെളിവുകള്‍ ഒന്നും തന്നെ ഇത് വരെ ലോകത്ത് റിപ്പോര്‍ട്ട് ചെയ്തിട്ടില്ല എന്ന് പത്ര സമ്മേളനങ്ങള്‍ നടത്തി! എന്നാല്‍ ലോകത്ത് ഒരിടത്തും ഇത് വരെ ജനങ്ങള്‍ ഇത് പോലെ കീടനാശിനിക്ക് വിധേയരായിട്ടില്ല എന്നത് അവര്‍ മനപൂര്‍വ്വം വിഴുങ്ങി!

അന്ന് പ്രതിപക്ഷ നേതാവായിരുന്ന വി.എസ്സ്. അച്ചുതാനന്ദന്‍ ശക്തമായ ഭാഷയില്‍ രംഗത്തെത്തി.

കേരള സര്‍ക്കാര്‍ നിരോധനത്തിനെതിരെ നിര്‍മ്മാതാക്കള്‍ കേരള ഹൈകോടതിയില്‍ കേസ്സ് ഫയല്‍ ചെയ്തു. എന്നാല്‍ സര്‍ക്കാര്‍ അച്ചുതന്‍ കമ്മിറ്റി റിപ്പോര്‍ട്ടും മറ്റും പഠിച്ച് വേണ്ടത് ചെയ്യുവാനായിരുന്നു കോടതി നിര്‍ദ്ദേശിച്ചത്.

കേരളത്തില്‍ എന്‍ഡോസള്‍ഫാന്‍ ഉപയോഗിക്കരുതെന്ന നിയമം വലത് സര്‍ക്കാര്‍ പിന്വലിച്ചു. പകരം പെരളയില്‍ 5 കൊല്ലത്തേയ്ക്ക് എന്‍ഡോസള്‍ഫാന്‍ തളിക്കുന്നത് നിരോധിച്ചപ്പോള്‍ കേരളത്തിലെ മറ്റിടങ്ങളില്‍ ആകാശ മാര്‍ഗ്ഗം തളിക്കുന്നത് മാത്രം സര്‍ക്കാര്‍ നിരോധിച്ചു കൊണ്ട് പുതിയ ഉത്തരവിറക്കി.

കേന്ദ്രത്തിലെ ബി.ജെ.പി. സര്‍ക്കാര്‍ എന്‍.ഐ.ഒ.എച്ച്. ആദ്യ പഠന റിപ്പോര്‍ട്ട് ചര്‍ച്ച ചെയ്തു. അങ്ങിനെ ഡ്യുബെ കമ്മിറ്റി രൂപീകരിച്ചു.

ഈ സമയത്താണ് എന്‍.ഐ.ഒ.എച്ച്. അവരുടെ പൂര്‍ണ റിപ്പോര്‍ട്ട് പുറത്ത് വിടുന്നത് (പി.ഡി.എഫ്.).

തങ്ങളുടെ പഠനത്തില്‍ എന്‍ഡോസള്‍ഫാന്‍ തളിച്ച സ്ഥലത്തും അല്ലാത്ത സ്ഥലത്തും നിന്നുള്ള സാമ്പിളുകളില്‍ വ്യക്തമായ വ്യത്യാസം ഉണ്ടെന്നും അതിനാല്‍ പ്രശ്നബാധിത പ്രദേശത്തെ മാനസികമായ, ശാരീരികമായ ആരോഗ്യ പ്രശ്നങ്ങള്‍ക്ക് കാരണം എന്‍ഡോസള്‍ഫാന്‍ തന്നെ. പ്രശ്ന ബാധിത പ്രദേശത്തെ മനുഷ്യരില്‍ കാണുന്ന പ്രശ്നങ്ങള്‍ എല്ലാം തന്നെ മൃഗങ്ങളില്‍ ശാസ്ത്രജ്ഞന്മാര്‍ പരീക്ഷണം നടത്തി പ്രസിദ്ധീകരിച്ചവ പോലെ തന്നെയാണെന്നാണെന്ന് പറയുന്നു. സാമ്പിളുകളില്‍ എന്‍ഡോസള്‍ഫാന്റെ സാന്നിദ്ധ്യം ഉണ്ട് എന്നായിരുന്നു സി.എസ്സ്.ഇ. 2001ല്‍ പറഞ്ഞത്.

എന്‍.ഐ.ഒ.എച്ച്. റിപ്പോര്‍ട്ടില്‍ നിന്നുള്ള കുറച്ച് ഭാഗം [ആണ്‍ കുട്ടികളില്‍ ലൈംഗിക വളര്‍ച്ചയ്ക്ക് താമസം നേരിടുന്നതിനെ പറ്റി] Environmental Health Perspectives എന്ന അന്താരാഷ്ട്ര ജേര്‍ണലില്‍ 2003ല്‍ പ്രസിദ്ധീകരിച്ചിട്ടുണ്ട് (പി.ഡി.എഫ്.).

2002 ആഗസ്റ്റില്‍ കേരള ഹൈകോടതി എന്‍ഡോസള്‍ഫാന്റെ ഉപയോഗം കേരളത്തില്‍ താല്‍ക്കാലികമായി നിരോധിച്ചു കൊണ്ട് ഉത്തരവിറക്കി (പി.ഡി.എഫ്.). തിരുവനന്തപുരം നേച്ചര്‍ ലവേഴ്സ് മൂവ്മെന്റ് എന്ന സംഘടനയാണ് കേസ്സ് ഫയല്‍ ചെയ്തിരുന്നത്. ഡ്യുബെ കമ്മിറ്റിയുടെ റിപ്പോര്‍ട്ട് സമര്‍പ്പിച്ച് കേന്ദ്ര സര്‍ക്കാരിന്റെ ഉത്തരവ് വരുന്നത് വരെയാണ് നിരോധനം ഏര്‍പ്പെടുത്തിയത്.

ഇതിനിടയില്‍ കേരളത്തില്‍ ശിവരാമന്റെ നേതൃത്വത്തില്‍ മറ്റൊരു കമ്മിറ്റി രൂപീകരിക്കപ്പെട്ടു. അവര്‍ റിപ്പോര്‍ട്ട് സമര്‍പ്പിച്ചത് 2003 ആഗസ്റ്റില്‍ (പി.ഡി.എഫ്.). എന്‍ഡോസള്‍ഫാന്‍ ബാധിത പ്രദേശത്ത് സാധാരണ പ്രദേശത്തേതിനേക്കാള്‍ ക്യാന്‍സര്‍, ശാരീരിക-മാനസിക പ്രശ്നങ്ങള്‍, വന്ദ്യത തുടങ്ങിയ ആരോഗ്യ പ്രശ്നങ്ങള്‍ കൂടുതലാണെന്ന് ഈ റിപ്പോര്‍ട്ടില്‍ വളരെ വ്യക്തമായി പറയുന്നുണ്ട്. കൂടാതെ വാണി നഗറില്‍ നടത്തിയ മെഡിക്കല്‍ ക്യാമ്പില്‍ നിന്ന് അസ്ഥികള്‍ക്ക് രൂപമാറ്റങ്ങളും, കേന്ദ്ര നാഡീ വ്യൂഹത്തില്‍ തകരാറുകളും പലരിലും കണ്ടെത്തി. ഈ സ്ഥലത്തെ കുട്ടികള്‍ക്കാണ് ആരോഗ്യ പ്രശ്നങ്ങള്‍ കൂടുതലായി കാണുന്നതും എന്ന് അവര്‍ പറയുന്നു. ഇതിനെല്ലാം കാരണം ആകാശ മാര്‍ഗ്ഗം എന്‍ഡോസള്‍ഫാന്‍ തളിച്ചതല്ലാതെ മറ്റൊരു കാരണവും കാണാനില്ല എന്നാണ് ശിവരാമന്‍ റിപ്പോര്‍ട്ട് പറയുന്നത്.

അതിനാല്‍ ആകാശം വഴിയുള്ള എന്‍ഡോസള്‍ഫാന്‍ തളി നിരോധിക്കണമെന്നും, രോഗ ബാധിതരായവര്‍ക്ക് വിദഗ്ദ്ധ ചികിത്സകളും മറ്റ് സഹായങ്ങളും നല്‍കുവാന്‍ വേണ്ട നടപടി എടുക്കണമെന്നും നിര്‍ദ്ദേശിച്ചു.

ഡ്യുബെ കമ്മിറ്റിയുടെ രഹസ്യ റിപ്പോര്‍ട്ട് വരുന്നത് 2003 മാര്‍ച്ചിലാണ്! അവര്‍ പറഞ്ഞ് വെച്ചത് എന്‍ഡോസള്‍ഫാന് പദ്രയില്‍ കാണുന്ന ആരോഗ്യ പ്രശ്നങ്ങളുമായി ബന്ധമില്ല എന്നാണ്. എന്നാല്‍ ആകാശം വഴിയുള്ള തളിക്കല്‍ നിരോധിക്കണം എന്നും. കമ്മിറ്റിയിലെ പലരും ഡ്യൂബെയുടെ റിപ്പോര്‍ട്ടിനോട് വിയോജിപ്പ് പ്രകടിപ്പിച്ചിരുന്നു.

ഈ കമ്മിറ്റിയില്‍ നടന്ന തിരിമറികള്‍ പിന്നീട് “ഡൌണ്‍ ടു എര്‍ത്ത്” പുറത്ത് കൊണ്ട് വന്നിരുന്നു. എന്‍.ഐ.ഒ.എച്ച്.ന്റെ റിപ്പോര്‍ട്ട് പാടേ നിരാകരിച്ചു കൊണ്ടാണ് ഡ്യൂബെ അവസാന തീരുമാനത്തില്‍ എത്തുന്നത്. എന്നാല്‍ എന്‍.ഐ.ഒ.എച്ച്.ന്റെ അന്വേഷണ ഫലം അന്താരാഷ്ട്ര ജേര്‍ണല്‍ അംഗീകരിച്ചു എന്നത് തന്നെ ഡ്യൂബെ റിപ്പോര്‍ട്ടിലെ കള്ളത്തരം പുറത്ത് കൊണ്ട് വരുന്നു. 2003 ഒക്ടോബറില്‍ കേന്ദ്ര ഗവണ്മെന്റ് റിപ്പോര്‍ട്ട് പൊതുജനങ്ങള്‍ക്കായി നല്‍കി. ഡ്യൂബെ റിപ്പോര്‍ട്ട് എന്‍ഡോസള്‍ഫാന്‍ നിര്‍മ്മാതാക്കള്‍ക്ക് അനുകൂലമാക്കിയെടുക്കുവാന്‍ പല തെളിവുകളും മറച്ച് വെച്ചു എന്ന് “ഡൌണ്‍ ടു എര്‍ത്ത്” തെളിവുകള്‍ നിരത്തി.

തുടര്‍ന്ന് കേന്ദ്രം മായി കമ്മിറ്റിയെ നിയോഗിച്ചു. എന്നാല്‍ അവരും മറുത്ത് ഒരു റിപ്പോര്‍ട്ട് സമര്‍പ്പിച്ചില്ല! അപ്പോഴേയ്ക്കും 2004 കഴിഞ്ഞു. ഈ സമയത്താണ് കേരള മലിനീകരണ നിയന്ത്രണ ബോര്‍ഡ് കാസര്‍ഗോഡ് എന്‍ഡോസള്‍ഫാന്‍ ഉപയോഗിക്കുന്നത് താല്‍ക്കാലികമായി നിരോധിക്കുന്നത്. ബി.ജെ.പി. സര്‍ക്കാര്‍ മാറി ഇടത് പിന്തുണയോടെ കോണ്‍ഗ്രസ്സ് ഭരണത്തില്‍ വന്ന സമയമാണ് 2004 മെയ്.

കോടതിയുടെയും മറ്റും ഇടപെടല്‍ നടന്നതിനാല്‍ പഠനം നടത്തി തീരുന്നത് വരെ കേരളത്തില്‍ എന്‍ഡോസള്‍ഫാന്‍ തളിക്കുന്നത് നിരോധിച്ച് 2005 ഡിസമ്പറില്‍ കേന്ദ്ര ഗവണ്മെന്റ് ഗസറ്റ് വിജ്ഞാപനം പുറപ്പെടുവിച്ചു (പി.ഡി.എഫ്.).

2006 മെയ് മാസത്തോടെ കേരളത്തിലും ഭരണം മാറി. ഇടത് സര്‍ക്കാര്‍ അധികാരത്തില്‍ വന്നു. എന്‍ഡോസള്‍ഫാന്‍ ദുരിതര്‍ക്ക് പിന്തുണ നല്‍കിയിരുന്ന വി.എസ്സ്. മുഖ്യ മന്ത്രി ആയതോടെ പ്രശ്നങ്ങള്‍ക്ക് വേഗം പരിഹാരമാകുമെന്ന് വിശ്വാസം എല്ലാവര്‍ക്കും. അവര്‍ക്ക് സര്‍ക്കാര്‍ സഹായം ലഭിക്കുവാന്‍ തുടങ്ങിയെങ്കിലും വേണ്ടത് പോലെ ലഭിച്ചില്ല എന്നും കാണാം.

പിന്നീടുള്ള വര്‍ഷങ്ങളില്‍ നിര്‍മ്മാതാക്കള്‍ തങ്ങളുടെ എതിരാളികളുമായി വാഗ്പയറ്റുകളും കേസ്സുകളുമായി മുന്നോട്ട് പോകുന്നതാണ് കണ്ടത്.

പിന്നീട് കേരള ജനത ഉണരുന്നത് 2010 ഒക്ടോബറില്‍ ജനീവയില്‍ നടന്ന പി.ഒ.പി. മീറ്റിങ്ങില്‍ ഇന്ത്യ മാത്രം എന്‍ഡോസള്‍ഫാനെ അനുകൂലിച്ച വാര്‍ത്ത പുറത്ത് വന്നപ്പോഴാണ്. തൊട്ട് പുറകേ കെ.വി. തോമസ്സിന്റെ വാക്കുകളും എന്‍ഡോസള്‍ഫാന്‍ പ്രശ്നം സജീവമാക്കി.

2010 നവമ്പറില്‍ മലിനീകരണ ബോര്‍ഡ് കേരളത്തില്‍ മൊത്തമായി എന്‍ഡോസള്‍ഫാന്‍ നിരോധിച്ച് ഉത്തരവിറക്കി (പി.ഡി.എഫ്.). 2008 മുതല്‍ 2010 വരെ മലിനീകരണ ബോര്‍ഡ് നടത്തിയ പഠനത്തില്‍ കാസര്‍ഗോഡ് മേഖലയിലെ പ്രശ്ന പ്രദേശങ്ങളില്‍ എന്‍ഡോസള്‍ഫാന്‍ കണ്ടെത്തിയിരിക്കുന്നു! ഷിരിയ പുഴയിലും അടുത്തുള്ള തോട്ടിലും എന്‍ഡോസള്‍ഫാന്റെ അംശം കണ്ടെത്തിയിട്ടുണ്ട്!

2001ലാണ് കാസര്‍ഗോഡ് പി.സി.കെ.യുടെ കീഴിലുള്ള സ്ഥലത്ത് ആകാശ മാര്‍ഗമുള്ള മരുന്ന് തളി മലിനീകരണ ബോര്‍ഡ് തടഞ്ഞത്. 2004ല്‍ കാസര്‍ഗോഡ് ജില്ലയില്‍ എന്‍ഡോസള്‍ഫാന്‍ ഉപയോഗിക്കുന്നത് നിറുത്തി മലിനീകരണ ബോര്‍ഡ് ഉത്തരവ് ഇറക്കിയിരുന്നു. പ്രശ്നബാധിത പ്രദേശത്ത് വര്‍ഷങ്ങളായി മരുന്നടി നടന്നിട്ടില്ല എന്നതിനാല്‍ തന്നെ 2008-2010 കാലയളവില്‍ ബോര്‍ഡിന്റെ പഠനങ്ങളില്‍ എന്‍ഡോസള്‍ഫാന്‍ ഈ പ്രദേശങ്ങളില്‍ കണ്ടെത്തി എന്നത് വളരെ ഗൌരവ പൂര്‍വ്വമായി എടുക്കേണ്ടതാണ്. എന്‍ഡോസള്‍ഫാന്റെ ഹാഫ് ലൈഫ് മാസങ്ങള്‍ മാത്രമാണ് എന്നതിനാല്‍ പണ്ട് തളിച്ച ഈ കീടനാശിനിയുടെ അളവ് എത്ര ഭീകരമായിരുന്നു എന്നാണ് ഇത് തെളിയിക്കുന്നു.

കാസര്‍ഗോഡ് മാത്രമല്ല തൊട്ടടുത്ത് കിടക്കുന്ന കര്‍ണാടകയിലെ അതിര്‍ത്തി ജില്ലയിലും ഈ പ്രശ്നങ്ങളുണ്ട്. കര്‍ണാടക മാര്‍ച്ച് 15ന് എന്‍ഡോസള്‍ഫാന്‍ നിരോധിച്ച് ഉത്തരവിറക്കി. എന്നാല്‍ ഇതിനെതിരെ എന്‍ഡോസള്‍ഫാന്‍ ഉല്‍പ്പാദക സംഘടന കര്‍ണ്ണാടകയിലെ കോടതിയില്‍ കേസ്സ് ഫയല്‍ ചെയ്തു കഴിഞ്ഞു.

കാസര്‍ഗോഡ് കാണുന്ന അതേ ആരോഗ്യ പ്രശ്നങ്ങള്‍ തന്നെയാണ് അതിര്‍ത്തി ജില്ലയിലെ കശുമാവിന്‍ തോട്ടത്തിലും അതിനടുത്തും താമസിക്കുന്ന കര്‍ണ്ണാടകയിലും ഉള്ളത്. രണ്ടിടത്തും തളിച്ചത് എന്‍ഡോസള്‍ഫാന്‍. എന്നിട്ടും എന്‍ഡോസള്‍ഫാന്‍ അല്ല ഈ പ്രശ്നങ്ങള്‍ക്ക് കാരണം എന്ന് കേന്ദ്രത്തിലെ ഭരണകര്‍ത്താക്കള്‍ വാദിക്കുമ്പോള്‍ 2000 കോടിക്ക് മുകളില്‍ കച്ചവടം നടക്കുന്ന ഈ കീടനാശിനിയുടെ “ബലം” മനസ്സിലാക്കാം!

അടുത്ത പി.ഒ.പി. മീറ്റിങ്ങ് അടുത്തെത്തിയിരിക്കുന്നു. ഈ വരുന്ന 25 മുതല്‍ 29 വരെയാണ്. പക്ഷേ ഇന്ത്യ എന്‍ഡോസള്‍ഫാന് അനുകൂലമായ നിലപാടെടുക്കുമെന്നാണ് കേന്ദ്രം നല്‍കുന്ന സൂചന. അമേരിക്കയില്‍ കര്‍ഷകരില്‍ ചിലര്‍ക്ക് തലകറക്കവും, നാഡീ വ്യൂഹ സംബന്ധമായ താല്‍ക്കാലിക പ്രശ്നവും മാത്രമേ കണ്ടതുള്ളൂ എന്നാല്‍ മത്സ്യങ്ങളിലും, കാടുകളിലെ ജീവജാലങ്ങള്‍ക്കും, പക്ഷികള്‍ക്കും വംശനാശം സംഭവിക്കുന്നു എന്ന വ്യക്തമായ റിപ്പോര്‍ട്ടുകള്‍ ലഭിച്ചതിനാലും അവര്‍ അത് നിരോധിച്ചു, അവിടെ എന്‍ഡോസള്‍ഫാന്‍ ഉല്‍പ്പാദിപ്പിക്കുന്നത് അമേരിക്കന്‍ കമ്പനിതന്നെ ആയിട്ട് പോലും. എന്നാല്‍ ഇന്ത്യയില്‍ കേരളത്തിലും കര്‍ണാടകയിലും ജീവിക്കുന്ന തെളിവുകള്‍ ഉണ്ടായിട്ടും മന്മോഹനും കൂട്ടര്‍ക്കും ഇനിയും തെളിവ് വേണം പോലും! ഇടതിന്റെ സഹകരണത്തില്‍ ഭരണം നടത്തിയ സമയത്ത് പഠനം നടത്തി തീരുന്നത് വരെ കേരളത്തില്‍ എന്‍ഡോസള്‍ഫാന്റെ ഉപയോഗം നിരോധിച്ച് ഉത്തരവിട്ടത് പോലെ ഇന്ത്യയിലും നിരോധിച്ച് ഉത്തരവിടുന്നതിന് എന്തിന് മടിക്കുന്നു എന്നതിന് ഉത്തരം പറയേണ്ടത് മന്മോഹനും കൂട്ടരുമാണ്.

ഈ ബഹളങ്ങളൊക്കെ നടക്കുമ്പോഴും പണ്ട് മാധ്യമങ്ങളില്‍ നിറഞ്ഞ് നിന്ന ദുരന്ത മുഖങ്ങള്‍ പലതും ഇല്ലാതായി. പുതിയ മുഖങ്ങള്‍ ഇപ്പോള്‍ മാധ്യമങ്ങളില്‍ നിറയുന്നു. എന്നാല്‍ ദുരിത ബാധിതര്‍ക്ക് വേണ്ട വിധത്തിലുള്ള സഹായം കേന്ദ്രത്തിന്റെ പിടിവാശി മൂലം നഷ്ടപ്പെട്ടിരിക്കുന്നു. ആകെയുള്ള ആശ്വാസം എന്‍.ജി.ഒ.കളും, ചില രാഷ്ട്രീയ സംഘടനകളും പിന്നെ കേരള സര്‍ക്കാരിന്റെ സഹായവും മാത്രം.

കടപ്പാട്: ഡൌണ്‍ ടു എര്‍ത്ത്, സി.എസ്സ്.ഇ., തണല്‍, മറ്റ് റിപ്പോര്‍ട്ടുകള്‍

കോണ്‍ഗ്രസ്സുകാരുടെ വെട്ടിപ്പ്!

2011-04-20T23:55:00.000-04:00

കേന്ദ്രത്തിലെ കോണ്‍ഗ്രസ്സ് തെരഞ്ഞെടുപ്പിന് “ലാവിഷാകാന്‍” സംസ്ഥാന കോണ്‍ഗ്രസ്സിന് നല്‍കിയ കോടികളില്‍ 20 കോടി കാണാതെ പോയി പോലും! 20 കോടി!!!!!

ഈ തെരഞ്ഞെടുപ്പില്‍ ജയിച്ച് വരുന്ന എം.എല്‍.എ.മാരെ തങ്ങളുടെ കൂടെ നിര്‍ത്തുവാന്‍ “ചിലര്‍” മുക്കിയതാണെന്ന് മംഗളം റിപ്പോര്‍ട്ട് ചെയ്യുന്നു!

കേന്ദ്ര അഴിമതിയില്‍ മുഴങ്ങി കേള്‍ക്കുന്ന വ്യവസായികളാണത്രേ കോണ്‍ഗ്രസ്സിന് ഇത് പോലെ ലാവിഷായി ചെലവാക്കുവാന്‍ “അകമഴിഞ്ഞ് സഹായിക്കുന്നതെന്ന്” മംഗളം വീണ്ടും ചൂണ്ടി കാട്ടുന്നു.

അടിച്ച് മാറ്റി അടിച്ച് മാറ്റി ഇപ്പോള്‍ സ്വന്തം പാര്‍ട്ടിയില്‍ നിന്ന് വരെ അടിച്ച് മാറ്റാന്‍ ഉള്ള തൊലികട്ടി കോണ്‍ഗ്രസ്സന്മാര്‍ക്ക് കിട്ടി കഴിഞ്ഞിരിക്കുന്നു...

7 വയസ്സില്‍ മകള്‍ പ്രായപൂര്‍ത്തിയാക്കുമ്പോള്‍!

2011-04-18T22:37:00.000-04:00

മാതാപിതാക്കളുടെ നെഞ്ചില്‍ തീ കോരിയിടുന്ന ആ വാര്‍ത്ത വന്നത് കഴിഞ്ഞ ആഗസ്റ്റിലാണ്. അമേരിക്കയില്‍ നടന്ന പഠനം അനുസരിച്ച് പെണ്‍കുട്ടികള്‍ “പ്രായ പൂര്‍ത്തിയാകുന്നത്” 7 വയസ്സിലേയ്ക്ക് താഴ്ന്നിരിക്കുന്നു. ഇവിടെ 15% കുട്ടികളാണ് (ഏഴില്‍ ഒരു കുട്ടി) 7 വയസ്സിനോടടുത്ത് “പ്രായ പൂര്‍ത്തിയാകുന്നത്” അതില്‍ തന്നെ ആഫ്രിക്കന്‍-അമേരിക്കന്‍ കുട്ടികളില്‍ 23%ത്തിനടുത്താണത്രേ (നാലില്‍ ഒരു കുട്ടി)...

തനിക്കെന്താണ് സംഭവിച്ചതെന്ന് തിരിച്ചറിവ് ലഭിക്കാത്ത പ്രായത്തില്‍ അതും ഒരു രണ്ടാം തരത്തില്‍ പഠിക്കുന്ന കുട്ടി വയസ്സറിയിക്കുമ്പോള്‍ മാതാപിതാക്കള്‍ക്കുണ്ടാകുന്ന ആധി....

എന്ത് കൊണ്ട് ഇങ്ങനെ നേരത്തെ സംഭവിക്കുന്നു? പാല്‍കുപ്പി ഉള്‍പ്പെടെയുള്ള പ്ലാസ്റ്റിക്ക് കുപ്പികളില്‍ കാണുന്ന ബിസ് ഫിനോള്‍ പോലെയുള്ള രാസവസ്തുക്കളോ, പോഷക ആഹാരത്തിന്റെ ലഭ്യതയോ, അതോ.... പഠനങ്ങള്‍ നടന്ന് കൊണ്ടിരിക്കുന്നു.

പലരും സമയം നീട്ടി കൊണ്ടു പോകുവാന്‍ ഹോര്‍മോണ്‍ ചികിത്സയുടെ സഹായം തേടുന്നു... ഭാവിയില്‍ ക്യാന്‍സറുകള്‍ ഉള്‍പ്പെടെയുള്ള രോഗങ്ങള്‍ ഉണ്ടാകാമെന്നതിനേക്കാള്‍ ഉപരി മാനസിക പ്രശ്നങ്ങള്‍ കുട്ടികളുടെ വളര്‍ച്ചയെ തന്നെ ബാധിക്കില്ലേ!

വയസ്സായവരെ പോലും വിടാത്ത വിടന്മാരുടെ എണ്ണം വര്‍ദ്ധിച്ചിരിക്കുന്ന ഈ കാലത്ത് 7 വയസ്സുള്ള ഒരു കുട്ടി പ്രായപൂര്‍ത്തിയായി വരുന്നു എന്ന് പറയുമ്പോള്‍!!!

കോണ്‍. വനിതകളെ ചാവേറുകളാക്കുന്നുവോ?

2011-04-16T20:54:00.000-04:00

മലമ്പുഴ, വാമനപുരം എന്നിവിടങ്ങളില്‍ വനിതകളെ മുന്‍ നിര്‍ത്തി കോണ്‍ഗ്രസ്സ് നടത്തിയ നാടകങ്ങള്‍ പൊളിഞ്ഞതിന് പിന്നാലെ മണ്ണാറശാലയിലും നാടകം അരങ്ങേറിയോ? എന്നാണ് കേരള കൌമുദി നല്‍കുന്ന സൂചന!

വെള്ളം ഒറ്റ രാത്രി കൊണ്ട് രൂക്ഷ ഗന്ധമുള്ള ദ്രാവകം/മൂത്രമാകുന്ന ജാലവിദ്യ കോണ്‍ഗ്രസ്സിന് പുതുമയുള്ള കാര്യമല്ല... ഇതിന് മുന്‍പ് നടന്ന 2 കേസ്സിലും മണിക്കൂറുകള്‍ക്കുള്ളില്‍ “കാര്യങ്ങള്‍” ട്വിസ്റ്റ് ചെയ്യപ്പെട്ടത് കേരളം കണ്ടതാണ്... എന്തായാലും ബോട്ടിലില്‍ “മൂത്രവും” കരുതി നടക്കുന്ന അവനെ സമ്മതിക്കണം!!!

ഈ മൂന്നെണ്ണത്തില്‍ അവസാനം നടന്ന രണ്ട് കേസ്സിലും ദേഹോപദ്രവം ഏല്‍പ്പിച്ചവര്‍ക്കെതിരെ കര്‍ശന നടപടിയെടുക്കുക തന്നെ വേണം. എന്ത് വെള്ളമായാലും അത് തല വഴി ഒഴിച്ചതിന് നല്ല പെട ആ ഒഴിച്ചവന് അപ്പോള്‍ തന്നെ കൊടുക്കേണ്ടതായിരുന്നു...

എന്നാലും രാഷ്ട്രീയ ലാഭത്തിന് വേണ്ടി കോണ്‍. തങ്ങളുടെ വനികളെ മുന്‍ നിര്‍ത്തി ഇങ്ങനെയുള്ള കളികള്‍ നടത്തിയത് എന്തിന് വേണ്ടിയായിരുന്നു?

തെരഞ്ഞെടുപ്പില്‍ നാടിന്റെ വളര്‍ച്ചയ്ക്ക് വേണ്ട ആരോഗ്യകരമായ ചര്‍ച്ചകള്‍ നടത്താന്‍ ഇട നല്‍കാതെ ഇതു പോലെയുള്ള കേസ്സുകള്‍ “മെനഞ്ഞെടുത്ത” ബുദ്ധിക്ക് പുറകിലെ “ശക്തി”യെ സമ്മതിക്കണം!!! അല്ല പറഞ്ഞിട്ടെന്തിനാ സംസ്ഥാന തെരഞ്ഞെടുപ്പ് നടക്കുന്ന വേളയില്‍ കേന്ദ്രത്തിലെ അഴിമതി ചര്‍ച്ച ചെയ്യപ്പെടാതിരിക്കുവാന്‍ ഹസ്സാരയെ പെട്ടെന്ന് ഒതുക്കിയ കേന്ദ്ര തലകളുടെ ഗുണം കേരളത്തിലും കുറച്ചെങ്കിലും കാണിക്കണ്ടേ!

സിന്ധുവിന് ചീമുട്ടയേറ്

2011-04-10T22:46:00.001-04:00

വാമുനപുരം കോണ്‍. സ്ഥാനാര്‍ത്ഥി മോഹനചന്ദ്രന്റെ പ്രചരണ പരിപാടിയില്‍ പങ്കെടുത്ത സിന്ധുവിന് ചീമുട്ടയേറ്. നെടുമങ്ങാട് താലൂക്കിലെ വാമനപുരത്ത് പബ്ലിസിറ്റിക്ക് വേണ്ടി കഷ്ടപ്പെട്ട് കൊണ്ടിരുന്ന ചിറയന്‍കീഴ് താലൂക്കിലെ മുരുക്കുമ്പുഴയില്‍ താമസിക്കുന്ന മോഹനചന്ദ്രന് ഇതോടെ പേരായി.

ഇടത് സ്ഥാനാര്‍ത്ഥി കോലിയക്കോട്കാരന്‍ കൃഷ്ണന്‍ നായരുടെയും മോഹനചന്ദ്രന്റെയും സമ്മേളനങ്ങള്‍ ഒരേ സമയത്ത് വന്നതാണ് പ്രശ്നങ്ങള്‍ക്ക് കാരണമായതത്രേ. ഇടത് സ്ഥാനാര്‍ത്ഥി പ്രസംഗിച്ച് മടങ്ങുന്നതിനിടയില്‍ സിന്ധു നടത്തിയ പ്രസംഗത്തില്‍ പ്രകോപിതരായവരാണ് ചീമുട്ടയേറ് നടത്തിയതെന്ന് കേരള കൌമുദി വാര്‍ത്ത.

ഷെല്ലുകളെ ധീരതയോടെ നേരിട്ടിട്ടുള്ള സിന്ധുവിന് പക്ഷേ ചീമുട്ടയ്ക്ക് മുന്നില്‍ പിടിച്ച് നില്‍ക്കുവാനായില്ല എന്ന് തോന്നുന്നു. ഛര്‍ദ്ദിയെ തുടര്‍ന്ന് ഇപ്പോഴും ആശുപത്രിയില്‍ കഴിയുകയാണ്.

നേതാക്കള്‍ പതിവ് ശൈലിയില്‍.. അക്രമണമെന്ന് ചാണ്ടിയും, യു.ഡി.എഫ്.ന്റെ നാടകമെന്ന് വിജയനും.

ലതികയ്ക്ക് പുറകേ സിന്ധുവിനും രാഷ്ട്രീയ പൊറോട്ട് നാടകത്തിന്റെ രക്തസാക്ഷിയാകേണ്ടി വരുമോ?

വി.എസ്സി.ലൂടെ ബ്ലോഗ് പ്രസിദ്ധമാകുമോ!

2011-04-06T08:13:00.004-04:00

എതിര്‍ സ്ഥാനാര്‍ത്ഥി ലതികയെ കുറിച്ച് വിവാദ പ്രസ്താവന നടത്തി പോലും (യു.ട്യൂബ്)...

അവര്‍ ബ്ലോഗില്‍ പ്രസിദ്ധയാണെന്നാണ് വി.എസ്സ്.ന്റെ വിശദീകരണമെങ്കില്‍ മലയാളം ബ്ലോഗ് പ്രസിദ്ധമാകുവാന്‍ പോകുന്നു... ദേശീയ മാദ്ധ്യമങ്ങള്‍ വി.എസ്സ്.ന്റെ വിശദീകരണം നോക്കി നില്‍ക്കുന്നു....

അവര്‍ ബ്ലോഗില്‍ പ്രസിദ്ധയാണെന്നാണ് വി.എസ്സ്. ഉദ്ദേശിച്ചതെങ്കില്‍, വി.എസ്സ്. നിങ്ങള്‍ക്ക് തെറ്റി.. ബ്ലോഗിലൂടെ തന്നെ “വിവാദമായ” ചെറായി ബ്ലോഗ് മീറ്റിലെ സംഘാടകരില്‍ ഒരാള്‍ എന്ന നിലയിലും ബ്ലോഗ് എഴുത്ത് കാരി എന്ന നിലയിലും ബ്ലോഗില്‍ പോലും അവരെ അറിയുന്നവര്‍ കുറച്ച് പേര്‍ മാത്രമാണ്....

വി.എസ്സ്.ന്റെ വാക്കുകളെ മറ്റൊരു തരത്തില്‍ വളച്ചൊടിച്ച് സംഭവ ബഹുലമാക്കി മാറ്റുവാന്‍ കോണ്‍ഗ്രസ്സ് ശ്രമിക്കുന്നു.. എന്തായാലും വി. എസ്സ്.ന്റെ വിശദീകരണത്തിനായി കാത്തിരിക്കുന്നു..... അതിന് ശേഷം ബാക്കി....

ഗാന്ധിയെ വിമര്‍ശിക്കുവാന്‍ പാടില്ല!

2011-03-30T22:44:00.001-04:00

കേന്ദ്രം നിയമം കൊണ്ടു വരുവാന്‍ പോകുന്നു പോലും... ഗാന്ധിയെ “അപമാനിക്കുന്ന” തരത്തില്‍ വിമര്‍ശിക്കുന്നവര്‍ക്ക് ജയില്‍ ശിക്ഷ ലഭിക്കുന്ന വിധത്തില്‍ നിയമം ഭേദഗതി ചെയ്യുവാനുള്ള ഒരുക്കത്തിലാണ് പോലും!!!!

ഇപ്പോഴത്തെ പ്രശ്നത്തിന് കാരണം ലെലിവെല്‍ഡിന്റെ ഗാന്ധിയെ കുറിച്ചുള്ള പുതിയ പുസ്തകമാണ്. ഡെയിലി മെയിലില്‍ വന്ന റിവ്യൂ ആണ് പ്രശ്നങ്ങള്‍ക്ക് കാരണം. ഗാന്ധി ഒരു “ഗേ”/“ബൈസെക്ഷ്വല്‍” ആയിരുന്നുവെന്ന് പുസ്തകം പറയുന്നതായി ഇപ്പോള്‍ വാര്‍ത്തകള്‍. ഗുജറാത്ത് ഗവണ്മെന്റ് പുസ്തകം നിരോധിച്ചു... അപ്പോള്‍ പിന്നെ കേന്ദ്രന്മാര്‍ക്ക് വെറുതെ ഇരിക്കുവാന്‍ പറ്റുമോ!!!

ഈ ഡെയിലി മെയിലുകാര്‍ക്ക് വേറെ പണിയൊന്നുമില്ലേ!

കഴിഞ്ഞ കൊല്ലം ഗാന്ധിയുടെ അവസാനകാലവും രാഷ്ട്രിയത്തിനുപരിയായി തന്റെ ബ്രഹ്മചര്യയ്ക്ക് പ്രാധാന്യം കൊടുത്ത് രാത്രിയില്‍ മനു ഉള്‍പ്പെടെയുള്ള കൊച്ചു പിള്ളേരെ നഗ്നരാക്കി പരീക്ഷണം നടത്തിയെന്ന് പറയുന്ന ആദംസിന്റെ പുസ്തകത്തെ പറ്റിയായിരുന്നു അവര്‍ റിവ്യൂ ചെയ്തത്.

ഒരു കൊല്ലമാകുന്നതിന് മുന്‍പ് ദാ ഇപ്പോള്‍ അടുത്ത പുസ്തക നിരൂപണം. ഈ പ്രാവശ്യം ലെലിവെല്‍ഡിന്റേതാണ്. കസ്തുര്‍ബയില്‍ നിന്ന് അകന്ന് ദ.ആഫ്രിക്കയില്‍ താമസിച്ചിരുന്നപ്പോള്‍, പിന്നീട് സിയോണിസ്റ്റായി മാറിയ കാലന്‍ബാഗുമായി “ബന്ധ”മുണ്ടായിരുന്നു എന്നതാണ് ചികഞ്ഞെടുത്തിരിക്കുന്നത്! ഈ പുസ്തകത്തിലും അവസാന കാലത്തുള്ള ഗാന്ധിയുടെ “കിടപ്പിനെ” പറ്റിയുണ്ട് പോലും.

എന്നാല്‍ ഗാന്ധിയും കാലന്‍ബാഗും തമ്മിലുള്ള “ബന്ധം” പത്രം ആരോപിക്കുന്നത് പോലെയുള്ള ഒന്നാണെന്ന് തന്റെ പുസ്തകത്തില്‍ ഇല്ല എന്നാണ് ലെലിവെല്‍ഡിന്‍ പറയുന്നത്.

ഗാന്ധിയെന്ന വ്യക്തിയെ നെഹ്രുവിനും കൂട്ടര്‍ക്കും ആവശ്യമായിരുന്നു... പിന്നീട് കോണ്‍ഗ്രസ്സിന് ഗാന്ധിയില്ലാതെ രക്ഷയില്ല എന്നായി.. അതിനാല്‍ തന്നെ ഇത്രയും നാള്‍ മഹാനാക്കുവാന്‍ വേണ്ടവ മാത്രം ഉയര്‍ത്തി കാട്ടി “യഥാര്‍ത്ഥ” ഗാന്ധിയെ ജനങ്ങള്‍ക്ക് മുന്‍പില്‍ നിന്ന് മറച്ച് പിടിച്ച് ... എന്നാല്‍ ഇന്റര്‍നെറ്റ് വിപ്ലവവും, ബ്രിട്ടണ്‍ പോലെയുള്ള രാജ്യങ്ങള്‍ പഴയ ഡോക്യുമെന്റ്സ് പൊതുജനങ്ങള്‍ക്ക് തുറന്ന് കൊടുക്കുകയും ചെയ്തതോടെ ഓരോ വ്യക്തിയുടെയും മറഞ്ഞിരുന്ന രൂപങ്ങള്‍ പുറത്താകുവാന്‍ തുടങ്ങി.... അത് പല വിഗ്രഹങ്ങളും തകര്‍ന്നടിയുന്നതിനോടൊപ്പം പുതിയ പല രൂപങ്ങള്‍ ഉയര്‍ന്ന് വരുവാനും ഇടയാക്കി കൊണ്ടിരിക്കുന്നു.... ഇത് പലര്‍ക്കും തലവേദനയാകുന്നു എന്നതാണ് പുതിയ നീക്കം തെളിയിക്കുന്നത്.....

ലതിക അത് വേണ്ടായിരുന്നു!

2011-03-26T18:57:00.001-04:00

വേണ്ടായിരുന്നു എന്നല്ല ചെയ്യരുതായിരുന്നു.

ലതിക സുഭാഷ് തെരഞ്ഞെടുപ്പിലേയ്ക് കാല് കുത്തിയത് മത്സരത്തിന് കെട്ടിവെയ്ക്കാനുള്ള കുറച്ച് രൂപ ശാരിയുടെ മകളുടെ കയ്യില്‍ നിന്ന് വാങ്ങിയാണത്രേ. സ്വന്തം കാര്യലാഭത്തിന് വേണ്ടി കൊച്ച് കുട്ടിയെ ഉപയോഗിച്ചുള്ള ഒരു പൊറോട്ട് നാടകം, അതും ലതികയില്‍ നിന്ന് ഒട്ടും പ്രതീക്ഷിച്ചില്ല!

മറ്റിടങ്ങളിലെ പോലെ തന്നെ കുട്ടികളുടെ സ്വകാര്യതയും അവകാശങ്ങളും സംരക്ഷിക്കുവാനുള്ള നിയമങ്ങള്‍ ഇന്ത്യയിലും ഉണ്ട്. എന്നിട്ടും ആ കൊച്ച് കുട്ടിയെ ഇതിന് മുന്‍പും മാധ്യമങ്ങള്‍ “ആഘോഷിച്ചിട്ടുണ്ട്” എന്നത് ശരിയാണ്. എന്നാല്‍ ലതിക സുഭാഷ് അങ്ങിനെയല്ല ഒന്നുമില്ലെങ്കില്‍ ഒരു മാസത്തോളം അമേരിക്കയെ അടുത്തറിയാന്‍ അവിടത്തെ വിവിധ സ്റ്റേറ്റുകളില്‍ സന്തര്‍ശനം നടത്തി തിരിച്ചെത്തിയിട്ട് മാസങ്ങളേ ആകുന്നുള്ളൂ. അമേരിക്ക ഈ വിഷയത്തില്‍ നല്‍കുന്ന പ്രാധാന്യം അടുത്തറിയുവാന്‍ അവസരം ലഭിച്ചതാണ്. അതിനാല്‍ തന്നെ ലതിക ഈ തെറ്റ് ഒരിക്കലും ചെയ്യരുതായിരുന്നു.

ആ കൊച്ച് കുട്ടിയെ വാര്‍ത്തകളില്‍ നിന്നും ഒഴിവാക്കുവാന്‍ തയ്യാറാകേണ്ടിയിരുന്നത് ലതിക തന്നെയായിരുന്നു!

കൊച്ച് കുട്ടികളുടെ സ്വകാര്യതയ്ക്കും അവകാശങ്ങള്‍ക്കും ലോകം നല്‍കുന്ന പ്രാധാന്യം അത് അമേരിക്കയില്‍ നിന്നു പോലും ലതിക പഠിച്ചില്ല എന്നതാണ് ഈ പ്രവൃത്തി തുറന്ന് കാട്ടുന്നത്.

സ്ത്രീകളുടെ അവകാശത്തെ പറ്റി വാ തോരാതെ മാധ്യമങ്ങള്‍ക്ക് മുന്‍പില്‍ വിളമ്പിയപ്പോള്‍ എന്തേ ആ കൊച്ച് കുട്ടിയുടെ സ്വകാര്യതയെയും അവകാശത്തെയും പറ്റി നിങ്ങള്‍ മറന്നത്!

സിന്ധുവിനിതെങ്ങിനെ കഴിഞ്ഞു!

2011-03-24T22:35:00.000-04:00

ഉമ്മനു വേണ്ടി സ്റ്റേജില്‍ നിന്ന് കത്തി കയറുന്ന സിന്ധുവിന്റെ നാവില്‍ നിന്ന് ഒരിക്കലെങ്കിലും ഇടത് പക്ഷത്തെ അനുകൂലിക്കുന്ന ഒരു വാക്ക് നോക്കിയിരുന്ന് നിരാശനായത് മിച്ചം!

“ഇന്നലെ വരെ” 24 മണീക്കൂറും പാര്‍ട്ടിക്ക് വേണ്ടി വാ തോരാതെ പ്രസംഗിച്ചിരുന്ന ഒരു വ്യക്തിക്ക് മണീക്കൂറുകള്‍ക്കുള്ളില്‍ ഇങ്ങനെ പ്രസംഗിക്കുവാന്‍ കഴിയുന്നുവെങ്കില്‍!

ആ പ്രസംഗത്തില്‍ നിന്ന് മനസ്സിലാകുന്നത് പാര്‍ട്ടിയില്‍ നിന്ന് പുറത്ത് പോകുവാന്‍ ഒരവസരം നോക്കി മാസങ്ങളായി സിന്ധു കാത്തിരുന്നു എന്നാണ്. എന്നാലും സിന്ധു ഇങ്ങിനെ വേണമായിരുന്നുവോ?

സ്വയാശ്രയ സമര ഭൂമിയില്‍ നിന്ന് കോണ്‍ഗ്രസ്സ് നല്‍കിയ സമ്മാനം ജീവിതകാലം മുഴുവന്‍ കൂടെയുണ്ടാകുമെന്നത് മറക്കരുത്. മറക്കുവാന്‍ കഴിയില്ല എന്നതിന് തെളിവാണല്ലോ കഴിഞ്ഞ കൊല്ലം ആ ദിവസം ബ്ലോഗില്‍ പോസ്റ്റിയത്!

വിദ്യാര്‍ത്ഥി പ്രസ്ഥാനത്തിന്റെ പ്രവര്‍ത്തക ഒരു സുപ്രഭാതത്തില്‍ ലോക്കല്‍ കമ്മറ്റിയിലെ വെറും അംഗം പോലുമാകാതെ നേരിട്ട് പാര്‍ട്ടിയുടെ മേല്‍ തട്ടിലേയ്ക്ക് കയറ്റിയപ്പോഴും രണ്ട് ഇലക്ഷനില്‍ നിന്നപ്പോള്‍ പുറകില്‍ കണ്ട ജനാവലിയും മറ്റും കണ്ട് വെറും ഒരു സ്ഥാനമോഹിയായി അധ:പതിച്ചത് ചൂണ്ടി കാട്ടി തന്നിട്ടും അത് കാര്യമായെടുക്കാതെ മുന്നോട്ട് പോയതിന്റെ പരിസമാപ്തിയില്‍ പാര്‍ട്ടിയില്‍ നിന്ന് ഉടന്‍ പുറത്താകുമെന്ന അവസ്ഥയില്‍ രാജി വെച്ചതാണ് എന്ന് വരുത്തി മറു കണ്ടം ചാടുമ്പോള്‍ ഒന്നോര്‍ക്കണമായിരുന്നു. കോണ്‍ഗ്രസ്സിന്റെ കയ്യാല്‍ മുറിവേറ്റ് കിടന്നപ്പോള്‍ പിന്തുണയുമായി പതിനായിരങ്ങള്‍ ഉണ്ടായിരുന്നു. അവരെയാണ് ഒരു സ്ഥാനത്തിന് വേണ്ടി സിന്ധു തള്ളി പറഞ്ഞത്.

ദിവസങ്ങള്‍ക്ക് മുന്‍പ് സോഷ്യല്‍ മീഡിയകളിലൂടെ സിന്ധുവിന്റേതായി കുറിച്ച വാക്കുകള്‍ കണ്ടപ്പോഴേ ഏത് നിമിഷവും ഈ പൊറോട്ട് നാടകം പ്രതീക്ഷിച്ചിരുന്നു. ഭാഗ്യമുള്ളവനെ നദിയില്‍ പിടിച്ചിട്ടാല്‍ അവന്‍ വായില്‍ മീനുമായി വരുമെന്ന് കുറിച്ചപ്പോള്‍, ഭാഗ്യം കൊണ്ടല്ല നിങ്ങള്‍ പേരെടുത്തത് മറിച്ച് അവകാശങ്ങള്‍ക്ക് വേണ്ടി പോരാടിയത് കൊണ്ടാണ് എന്ന് മറുപടി കിട്ടിയത് എന്നും ഓര്‍മ്മയില്‍ സൂക്ഷിക്കുന്നത് നല്ലതാണ്...

സ്ഥാനമാനങ്ങള്‍ മോഹിച്ചായിരിക്കരുത് സമൂഹത്തിന് വേണ്ടി പ്രവര്‍ത്തിക്കേണ്ടത്. ബ്ലോഗില്‍ മദര്‍ തെരസയെ പറ്റി വാചകമടിച്ചപ്പോഴെങ്കിലും അവര്‍ നെഞ്ചോട് ചേര്‍ത്തിരുന്ന ഈ തത്വം ഒന്ന് ഓര്‍ത്തിരുന്നുവെങ്കില്‍! അത് മറന്നതാണ് സിന്ധുവിന് പറ്റിയ ഏറ്റവും വലിയ ബ്ലണ്ടര്‍ എന്ന് ഇനിയെങ്കിലും തിരിച്ചറിയുക...

ലതിക സുബാഷിനോട് നീതി കാട്ടാമായിരുന്നു!

2011-03-23T08:14:00.000-04:00

പണ്ട് ഉമ്മന്‍ ചാണ്ടിക്കെതിരെ സിന്ധു ജോയിയെ മത്സരിക്കാനിറക്കിയപ്പോള്‍ കേരളം മാത്രമല്ല ഇന്ത്യയും ആ മത്സരം ഉറ്റ് നോക്കി...

ഈ തെരഞ്ഞെടുപ്പില്‍ അത് പോലെയുള്ള ഒരു മണ്ഡലമാണ് വി.എസ്സ്. മത്സരിക്കുന്ന മലമ്പുഴ.

കോട്ടയത്ത് ലതിക സുബാഷ് ആയിരിക്കും സ്ഥാനാര്‍ത്ഥി എന്ന ഒരു ഘട്ടത്തിലാണ് വയലാര്‍ രവിയുടെ മകളുടെ പ്രശ്നം വരുന്നത്. അതോടെ മൂന്നാമന്‍ ആ സീറ്റ് ഉറപ്പാക്കി.

കോണ്‍ഗ്രസ്സ് അദ്ധ്യക്ഷ സോണിയ രാജീവുമായി നല്ല ബന്ധം ഉണ്ടെന്നത് കൊണ്ടാവാം സ്ഥാനാര്‍ത്ഥി നിര്‍ണ്ണയ വേളയില്‍ ലതിക സുബാഷ് ഡെല്‍ഹിയില്‍ തമ്പടിച്ചത്. കോട്ടയം അല്ലെങ്കില്‍ വൈപ്പിന്‍ ലഭിക്കുമെന്ന പ്രതീക്ഷ നിലനിന്നിരുന്നുവെങ്കിലും സോണിയ കനിഞ്ഞ് നല്‍കിയത് മലമ്പുഴയാണ്.

മുന്‍പ് ഞാന്‍ ഒരു പോസ്റ്റ് കോട്ടയം പ്രശ്നത്തെ പറ്റി ഇട്ടിരുന്നതിനാല്‍ കോണ്‍ഗ്രസ്സ് പട്ടിക പുറത്ത് എന്ന് വാര്‍ത്ത വന്നപ്പോള്‍ ആദ്യം തെരഞ്ഞെത് ലതിക സുബാഷിനെയായിരുന്നു. മാധ്യമങ്ങള്‍ ആഘോഷിച്ചത് 4 പേരുകളാണ്. അതില്‍ ആദ്യത്തേത് വി.എസ്സ്.നെതിരെ ലതിക സുബാഷ് എന്നാണ്.

എങ്കിലും കേരളം മാത്രമല്ല ഇന്ത്യ തന്നെ ഉറ്റ് നോക്കുന്ന മലമ്പുഴ മണ്ഡലത്തില്‍ ഒരു നേര്‍ച്ച കോഴിയായി ലതിക സുബാഷിനെ ഇറക്കി വിട്ട കോണ്‍ഗ്രസ്സിന് അവരോട് കുറച്ച് കൂടി നീതി കാട്ടാമായിരുന്നു. ഒന്നുമില്ലേല്‍ സ്ഥാനാര്‍ത്ഥി കുപ്പായത്തിനായി ഡെല്‍ഹിയില്‍ തമ്പടിച്ച അപൂര്‍വ്വം ചിലരില്‍ ഒരാളായിരുന്നില്ലേ!

കാ. പുരോഹിതര്‍ ജനവിധി തേടുമോ?

2011-03-21T23:47:00.000-04:00

സ്ഥാനാര്‍ത്ഥി പ്രഖ്യാപനം ബാലി കേറാമലയായി കോണ്‍ഗ്രസ്സിന് മുന്നിലുള്ളപ്പോഴാണ് തൃശൂര്‍ അതിരൂപതാ പാസ്റ്ററല്‍ കൌണ്‍സില്‍ പുതിയ കുരിശുമായി വരുന്നത്. തങ്ങള്‍ക്ക് “അര്‍ഹമായ” സീറ്റുകള്‍ നല്‍കിയില്ലെങ്കില്‍ തങ്ങളുടെ സ്ഥാനാര്‍ത്ഥികളെ നിര്‍ത്തും എന്ന് ഭീഷണിയും മുഴക്കി കഴിഞ്ഞു! ആലപ്പുഴയില്‍ തങ്ങളുടെ “ആളിനെ” നിര്‍ത്തിയില്ലേല്‍ വിവരം അറിയുമെന്ന് ആലപ്പുഴ രൂപത!

തുടര്‍ നടപടിക്ക് ജാഗ്രതാ സമിതിയെ ചുമതലപ്പെടുത്തിയിരിക്കുന്നു പോലും!

പാവം പാസ്റ്ററല്‍ സെക്രട്ടറി. പ്രസ്താവന നടത്തിയതിന്റെ പേരില്‍ പുള്ളിയെ നാട്ടിക യു.ഡി.എഫ്. നിയോജക മണ്ഡലം ചെയര്‍മാന്‍ സ്ഥാനത്ത് നിന്ന് നീക്കം ചെയ്യണമെന്ന് ആവശ്യപ്പെട്ട് ഫാക്സ് സന്തേശം കെ.പി.സി.സി. പ്രസിഡന്റിന് കിട്ടി കഴിഞ്ഞു പോലും.

അപ്പോള്‍ രാഹുല്‍-സോണിയ ടീം “കണ്ണടച്ചാല്‍‍” വരുന്ന നിയമസഭ തെരഞ്ഞെടുപ്പില്‍ ഒരു പുരോഹിതനെങ്കിലും മത്സര രംഗത്തുണ്ടാകുവാന്‍ സാധ്യതയുണ്ട്! അതിനുള്ള “ഭാഗ്യം” കേരളീയര്‍ക്കുണ്ടോ? ഒരു പുരോഹിതന്‍ നിയമസഭയില്‍!!!! സ്വാമിമാര്‍ക്കും സ്വാമിനിമാര്‍ക്കും ഇന്ത്യന്‍ പാര്‍ലമെന്റില്‍ വരാമെങ്കില്‍ എന്ത് കൊണ്ട് ഒരു കാ. പുരോഹിതനും ആയി കൂട....

വെറുതയല്ല ഈ ഒരു “സുദിനം” മനസ്സില്‍ കണ്ടാണ് കുറച്ച് നാളായി സഭ ജനാധിപത്യത്തില്‍ ഇടപെടുമെന്ന് ഇവര്‍ പറഞ്ഞ് കൊണ്ടിരുന്നത്!! പക്ഷേ കാ. പുരോഹിതര്‍ ഇങ്ങനെ ഭീഷണി മുഴക്കി വേണോ മത്സര രംഗത്തേക്ക് പ്രവേശനം ചെയ്യാന്‍!!!

ഇന്ത്യക്കാരന് തിന്നാന്‍ ആയുധങ്ങള്‍!

2011-03-19T11:33:00.000-04:00

Stockholm International Peace Research Institute പുറത്ത് വിട്ട റിപ്പോര്‍ട്ട് അനുസരിച്ച് 2006-2010 കാലഘട്ടത്തില്‍ ലോകത്ത് ഏറ്റവും കൂടുതല്‍ ആയുധം ഇറക്കുമതി ചെയ്തത് ഇന്ത്യയാണത്രേ! ഇതിനായി ഇന്ത്യ ചെലവാക്കിയത് വെറും $11,139 മില്ല്യണ്‍! രണ്ടാം സ്ഥാനത്തുള്ള ചൈന ചെലവാക്കിയത് വെറും $7,724 മാത്രം!

2010ല്‍ മാത്രം $3,337 മില്ല്യണാണ് ഇന്ത്യന്‍ സര്‍ക്കാര്‍ ചെലവാക്കിയത്.... 2011ല്‍ $3,823 മില്ല്യണാണ് ഇതുവരെ ബഡ്ജറ്റില്‍ നീക്കി വെച്ചിരിക്കുന്നത്. കഴിഞ്ഞ തവണത്തെ പോലെ റിവൈസ് ചെയ്താല്‍ ഇതിലും കൂട്ടാം...

2011-2012ലെ ബഡറ്റില്‍ രാജ്യത്തിന്റെ മൊത്തം ചെലവിന്റെ 16% ഡിഫെന്‍സിനായി മാറ്റി വെച്ചിരിക്കുന്നു! കാര്‍ഷിക-ആരോഗ്യ-വിദ്യാഭ്യാസ-ഗവേഷണ മേഖലയ്ക്ക് ലഭിക്കേണ്ട നീക്കിയിരുപ്പാണ് ഇങ്ങനെ ആയുധങ്ങള്‍ക്കായി ചെലവഴിക്കുന്നത് എന്ന് കാണാം. ഈ ബഡ്ജറ്റില്‍ വിദ്യാര്‍ത്ഥികള്‍ക്ക് ആവശ്യമായ അടിസ്ഥാന പഠന വസ്തുക്കള്‍ക്ക് വരെ നികുതി കൂട്ടിയത് നാം കണ്ടതാണ്. ആരോഗ്യ മേഖലയില്‍ ഏര്‍പ്പെടുത്തുന്ന സേവന നികുതി സാധാരണ ജനങ്ങള്‍ക്ക് വിദഗ്ദ്ധ ചികിത്സ കയ്യെത്താത്ത ദൂരത്താകുമെന്ന് ഉറപ്പാണ്. അങ്ങിനെ ഞെക്കി പിഴിഞ്ഞ് കിട്ടുന്ന തുട്ടുകള്‍ ആയുധങ്ങള്‍ വാങ്ങുവാന്‍ ചെലവാക്കി ഇന്ത്യയെ മറ്റ് രാജ്യങ്ങള്‍ക്ക് മുന്നില്‍ “തലയെടുപ്പിച്ച്” നിര്‍ത്തുവാന്‍ നമ്മുടെ കേന്ദ്ര സര്‍ക്കാര്‍ അരയും തലയും “മുറുക്കി” സദാ ജാഗരൂകരായിരിക്കുന്നു. സാധാരണക്കാരന് ഒരു നേരത്തെ ഭക്ഷണമോ, നല്ല ചികിത്സയോ, വിദ്യാഭ്യാസമോ കിട്ടിയില്ലെങ്കിലെന്ത് ആയുധം വാങ്ങി കൂട്ടി സ്വന്തം രാജ്യം “രക്ഷി”ക്കുവാന്‍ കഴിയുന്നുണ്ടല്ലോ! ഉടുത്തില്ലേലും കോണകം പുരപ്പുറത്ത് ഇടുവാന്‍ നമ്മള്‍ കഴിഞ്ഞേ ഉള്ളൂ! പക്ഷേ അതും സാധാരണക്കാരന്‍ മാത്രം ചെയ്യണം.

ഭക്ഷണ സാധനങ്ങളുടെ വില കുത്തനെ കയറുമ്പോഴും വിപണിയില്‍ ഇടപെടാന്‍ കൂട്ടാക്കാത്ത കേന്ദ്ര സര്‍ക്കാര്‍ ഡിഫെന്‍സിനായി 16% ചെലവാക്കുവാന്‍ വ്യഗ്രഥ കാട്ടുമ്പോള്‍ പൊതുമേഖലയില്‍ ഭക്ഷണ വിതരണത്തിനായി വെറും 4% മാത്രമാണ് നീക്കി വെയ്ക്കുന്നത്! കാര്‍ഷിക മേഖലയ്ക്കുള്ള മൊത്തമായ നീക്കിയിരുപ്പ് ആകട്ടെ വെറും 1.2% മാത്രം. സാക്ഷരത-സ്കൂള്‍-ഉന്നത വിദ്യാഭ്യാസം എന്നിവയ്ക്ക് മൊത്തമായി 5% മാത്രം! ഹെല്‍ത്ത്-ഫാമലി വെല്‍ഫയറിനായി വെറും 2%! റൂറല്‍ ഡെവലപ്പെമെന്റിന് 6%, അര്‍ബന്‍ ഡെവലപ്പ്മെന്റിനാകട്ടെ 0.7%വും! ശാസ്ത്ര-ഗവേഷണ മേഖലയ്ക്ക് 0.6%! (ബഡ്ജറ്റിന്റെ പി.ഡി.എഫ്. രൂപം)

കര്‍ഷകരെ രക്ഷിക്കുവാനുള്ള പദ്ധതി, കാര്‍ഷിക ഗവേഷണം വിദ്യാഭ്യാസം, രാസവളങ്ങള്‍ക്കുള്ള സബ്സിഡി എന്നിവ കഴിഞ്ഞ തവണത്തേതില്‍ നിന്നും ഗണ്യമായി വെട്ടി കുറച്ചിരിക്കുന്നു . പെട്രോളിന്റെ നീക്കിയിരുപ്പില്‍ കഴിഞ്ഞ തവണത്തേതിലും 15000 കോടിയോളം രൂപയാണ് വെട്ടി കുറച്ചിരിക്കുന്നത്!!!

ചുരുക്കത്തില്‍ ഇന്ത്യക്കാരന് തങ്ങളുടെ തലയ്ക്ക് മുകളിലൂടെ പറക്കുന്ന പുത്തന്‍ (മിക്കതും പുത്തന്‍ പെയ്ന്റടിച്ച് ഇന്ത്യക്ക് നല്‍കുന്നത്) യുദ്ധ വിമാനങ്ങള്‍ കണ്ട് ആനന്ദത്തില്‍ ആറാടാം! തകര്‍ന്ന് വീഴുന്ന വിമാന ഭാഗങ്ങള്‍ തിന്ന് വിശപ്പും അടയ്ക്കാം!

ഇക്ബാലിനെ അറിയാത്തവര്‍ പേകൂത്ത് നടത്തുമ്പോള്‍

2011-03-16T23:00:00.002-04:00

ചങ്ങനാശ്ശേരിയില്‍ ഡോ. ഇക്ബാല്‍ ഇടത് സ്ഥാനാര്‍ത്ഥിയാണെന്ന് വാര്‍ത്ത വന്നപ്പോഴേയ്ക്കും ആ ഡോകിറ്ററല്ലേ അപ്പോള്‍ ആരോഗ്യമന്ത്രിയെ പുകഴ്ത്തി നേടിയത് തന്നെ എന്ന് പറയുന്നവരെ കൊണ്ട് മുട്ടിയിട്ട് ബ്ലോഗിലും ബസ്സിലും നടക്കുവാന്‍ വയ്യ!

കേരളത്തിലെ മെഡിക്കല്‍ കോളേജുകളില്‍, പ്രത്യേകിച്ച് കോട്ടയത്ത്, ദീര്‍ഘകാലം സേവനം അനുഷ്ടിച്ചിട്ടുള്ള (ന്യൂറോ സര്‍ജറി വിഭാഗത്തില്‍), കേരള യൂണിവേഴ്സിറ്റി വൈസ് ചാന്‍സലര്‍, കേരള ശാസ്ത്ര സാഹിത്യ പരിക്ഷത്ത് പ്രസിഡ്ന്റ് തുടങ്ങിയ നിലകളില്‍ പ്രവര്‍ത്തിച്ചിട്ടുള്ള അദ്ദേഹത്തെ പണ്ട് വിദേശ ഫണ്ട് സ്വീകരിക്കുന്നതുമായി ബന്ധപ്പെട്ട സംഭവത്തില്‍ പുറത്താക്കിയിട്ടും (അന്ന് ഇതുമായി ബന്ധപ്പെട്ട് സജീവ ചര്‍ച്ചകള്‍ നടന്നിരുന്നു‍) ഇപ്പോള്‍ ചങ്ങനാശ്ശേരിയില്‍ സ്ഥാനാര്‍ത്ഥിയാക്കുന്നു എന്നത് തന്നെ സാമൂഹിക മേഖലയില്‍ അദ്ദേഹം നടത്തിയ ഇടപെടലുകളുടെ അംഗീകാരമാണ്.

ആരോഗ്യമന്ത്രിണി ചൂണ്ടി കാട്ടുന്നവരെ പാര്‍ട്ടി ഉടനെ സ്ഥാനാര്‍ത്ഥിയായി നിര്‍ത്തുമെന്ന് പറയുന്ന വില്ലാധി വീരന്മാര്‍/വീരിമാര്‍ക്ക് ഇടത് രാഷ്ട്രീയമെന്നാല്‍ ജിഞ്ചര്‍ പോലെയിരിക്കും എന്നാണ് ബ്ലോഗിലും ബസ്സിലും നോക്കിയാല്‍ മനസ്സിലാക്കാവുന്നത്... കോണ്‍ഗ്രസ്സിലെ പോലെ ഡെല്‍ഹിയിലെ “അമ്മച്ചിയുടെ” വീട്ടിലെ അടുക്കളയില്‍ ചെന്ന് നിരങ്ങിയാല്‍ ഇങ്ങ് കേരളത്തില്‍ സ്ഥാനാര്‍ത്ഥിയാകുമെന്ന് കരുതുന്ന ഈ “രാഷ്ട്രീയ വിമര്‍ശകരെ” എന്ത് പേരിട്ടാണ് വിളിക്കേണ്ടത്?

ഡോ. ഇക്ബാലിന്റെ ഗുഗിള്‍ പ്രൊഫൈല്‍ ഇവിടെ.

ഇന്ത്യന്‍ ജനാധിപത്യത്തെ വ്യഭിചരിക്കുന്നവര്‍!

2011-03-15T21:58:00.001-04:00

വിക്കിലീക്സില്‍ നിന്ന് ഇന്ത്യയുമായി ബന്ധപ്പെട്ട ഡോക്യുമെന്റ്സ് പുറത്ത് വന്ന് തുടങ്ങി. “ദി ഹിന്ദു”വില്‍ വന്ന് കൊണ്ടിരിക്കുന്നത് ഇവിടെ...

പുറത്ത് വന്നതില്‍ മിക്കതും എല്ലാവര്‍ക്കും അറിയാവുന്ന വിവരങ്ങള്‍ തന്നെയാണ്... “മദാമ്മയുടെ” കളിപ്പാവയ്ക്കുള്ള അമേരിക്കന്‍ വിധേയത്വത്തിന് കൂടുതല്‍ തെളിവ്.. പക്ഷേ അതിലുപരി ഇന്ന് കേന്ദ്ര ഗവണ്മെന്റിനെ വേട്ടയാടുന്ന ഭരണ അഴിമതി എന്ത് കൊണ്ട് എന്ന് ചൂണ്ടി കാണിക്കുന്ന ചില രേഖകള്‍ അതിനോടൊപ്പം പുറത്ത് വന്നിരിക്കുന്നു.

അതിലൊന്ന് തമിഴ്നാട്ടില്‍ നിന്ന് വിജയിച്ച പ്രമുഖരില്‍ ചിലര്‍ വോട്ടര്‍മാര്‍ക്ക് പണം കൊടുത്തു എന്നതാണ്. അന്നേ അറിവുള്ളതെങ്കിലും വിക്കിലീക്സ് രേഖകളിലൂടെ അത് അരക്കെട്ടുറപ്പിക്കുന്നു... വിശദമായത് ഇവിടെ വായിക്കാം....

ഒരു വോട്ടര്‍ക്ക് 5000 രൂപ നല്‍കി ഇലക്ഷന് ജയിച്ചവര്‍ പിന്നെ എങ്ങിനെ അഴിമതി നടത്താതിരിക്കും!

ഒരോ ഡീലിനും ഉയര്‍ന്ന കമ്മീഷന്‍ ചോദിച്ച് വാങ്ങി ഓരോ ഇന്ത്യക്കാരനെയും വഞ്ചിക്കുമ്പോള്‍ കണ്ണടക്കാതെ മദാമ്മയുടെ കളിപ്പാവയ്ക്ക് എന്ത് ചെയ്യാനാകും! തങ്ങളെ രക്ഷിക്കുവാന്‍ പണം വാരിയെറിഞ്ഞവര്‍ക്ക് അനുകൂലമായി തീരുമാനങ്ങള്‍ എടുക്കാനല്ലാതെ മറ്റെന്തിനാണ് അവര്‍ക്ക് കഴിയുക? പക്ഷേ ഇവരേക്കാളൊക്കെ കടത്തിവെട്ടുന്നത് മറ്റ് രാജ്യങ്ങള്‍ക്ക് വേണ്ടി മാത്രം ഇന്ത്യക്കാരെ മൊത്തമായി അടിയറവ് വെയ്ക്കുന്ന നട്ടെല്ലില്ലാത്തവരാണ്.

ഇന്ത്യക്കാരുടെ കഷ്ട കാലത്തിന് ജനങ്ങള്‍ തെരഞ്ഞെടുക്കാതെ അവരെ അടക്കി ഭരിക്കുന്ന ആ കളിപ്പാവയും ശിങ്കടികളും ഇന്ത്യയുടെ ചരിത്രത്തിന്റെ കറുത്ത ഏടുകളില്‍ എന്നും നിറഞ്ഞ് നില്‍പ്പുണ്ടാകും..

അമേരിക്കയിലും “സില്‍‌സില”!

2011-03-14T20:55:00.000-04:00

കേരളത്തില്‍ മാത്രമല്ല അമേരിക്കയിലും “സില്‍‌സില” പോലെയുള്ള ഒരു “ഗാനം‍” യൂ ട്യൂബില്‍ ഹിറ്റായിരിക്കുന്നു.... റെബാക്ക ബ്ലാക്കിന്റെ “ഫ്രൈഡേ” എന്ന “ആല്‍ബം” ആണ് അവിടത്തെ “സില്‍‌സില”.. യാഹൂ ന്യൂസിലെ റിവ്യൂ കണ്ട് എത്തി നോക്കിയതാണ്!!

കാണുവാന്‍ “ആഗ്രഹ”മുള്ളവര്‍ക്ക് യൂ ട്യൂബ് ലിങ്ക്... വെറും ഒരു മാസം കൊണ്ട് 25,36,836 ആളുകളാണ് “സംഗതി” കണ്ടത്...

ടൈം മാഗസിന്‍ ചൂണ്ടി കാട്ടിയത് പോലെ അതിലെ വരികളാണ് ശ്രദ്ധിക്കേണ്ടത്!
“yesterday was thursday, today is friday, tomorrow is saturday and sunday comes afterwards....”

സില്‍‌സിലയ്ക്ക് പോലെ ഇതിനും “പാരഡികളും” ഇറങ്ങി കഴിഞ്ഞു (യൂ ട്യൂബ് സെര്‍ച്ച്)...

നമ്മുടെ മാധ്യമങ്ങള്‍ക്ക് ആവശ്യമില്ലാത്തവ

2011-03-12T23:42:00.000-05:00

കേരളത്തിലെ വിദ്യാലയങ്ങളില്‍ നടക്കുന്ന വിപ്ലവകരങ്ങളായ മാറ്റങ്ങള്‍ നമ്മുടെ മാധ്യമങ്ങള്‍ ഗൌരവത്തോടെ പ്രചരിപ്പിക്കുന്നില്ല എന്നത് ദു:ഖകരം തന്നെ. സെന്‍സേഷണലുകള്‍ക്ക് പുറകേ ഓടുന്ന അവര്‍ സര്‍ക്കാരുകള്‍ നടത്തുന്ന നല്ല കാര്യങ്ങള്‍ റിപ്പോര്‍ട്ട് ചെയ്യുന്നില്ല പിന്ന അല്ലേ വിദ്യാലങ്ങളില്‍ നടക്കുന്നവ റിപ്പോര്‍ട്ട് ചെയ്യുന്നത്... "മതമില്ലാത്ത" സംഭവങ്ങളെങ്കില്‍ അവര്‍ തലക്കെട്ടോടെ ദിവസങ്ങളോളം ആഘോഷിക്കും...

ബ്ലോഗ് എന്ന മാധ്യമത്തിലൂടെ കേരളത്തിലെ മാധ്യമങ്ങളെ മറി കടക്കുവാന്‍ പലരും തയ്യാറാകുന്നു എന്നത് സന്തോഷകരമായ കാര്യമാണ്. അതിലൊന്നാണ് കലാധരന്‍ മാഷിന്റെ ചൂണ്ടുവിരല്‍ എന്ന ബ്ലോഗ്.

കേരളത്തിലെ സ്കൂളുകളില്‍ നടക്കുന്ന വിപ്ലവകരങ്ങളായ മാറ്റങ്ങള്‍ ബ്ലോഗില്‍ എത്തിക്കുന്ന കലാധരന്‍ മാഷിനെ പോലെയുള്ളവര്‍ ശ്രദ്ധിക്കപ്പെടേണ്ടത് തന്നെ....

കോട്ടയത്ത് ലതിക സുബാഷ് അതോ കുടുംബ വാഴ്ചയോ !

2011-03-11T08:38:00.002-05:00

കോട്ടയത്ത് തിരുവഞ്ചൂര്‍ രാധാകൃഷ്ണന്റെ പേരിനൊപ്പം ലതിക സുബാഷിന്റെ പേര് സജീവ ചര്‍ച്ചയില്‍. എന്നാല്‍ സംസ്ഥാന രാഷ്ട്രീയത്തില്‍ പിടി മുറുക്കുവാന്‍ രാഷ്ട്രീയ പ്രവര്‍ത്തന പരിചയമില്ലാത്ത സ്വന്തം മകളെയാണ് വയലാര്‍ രവി രംഗത്തിറക്കുവാന്‍ ശ്രമിക്കുന്നത്.

കേരളത്തിലെ മുഖ്യമന്ത്രി കസേര കാട്ടി ബ്ലാക്ക് മെയില്‍ നടത്തി കേന്ദ്രത്തില്‍ കൂടുതല്‍ പവര്‍ ക്രിയേറ്റ് ചെയ്തെടുക്കുന്നതില്‍ വിജയിച്ച വയലാര്‍ രവി എന്ന രാഷ്ട്രീയക്കാരന്‍ ഇതാ ഇപ്പോള്‍ കോണ്‍ഗ്രസ്സിലെ സാധാരണ പ്രവര്‍ത്തകരെ കൊഞ്ഞഞ്ഞനം കുത്തി കൊണ്ട് രാഷ്ട്രീയ പ്രവര്‍ത്തന പരിചയമില്ലാത്ത സ്വന്തം മകളെ കോട്ടയത്ത് ഇറക്കുന്നു. അതും മരിച്ച് പോയ ഭാര്യയുടെ സെന്റിമെന്റിനെ മുതലെടുത്ത്!!! കോട്ടയം തന്റെ കുടുംബ സ്വത്താണെന്ന് പറയാതെ പറഞ്ഞ് വെയ്ക്കുന്ന വയലാര്‍ രവിയെ പോലെയുള്ള രാഷ്ട്രീയക്കാര്‍ ഇന്ത്യന്‍ രാഷ്ട്രീയത്തെ തകര്‍ക്കുകയാണെന്ന് തിരിച്ചറിയുന്നത് എപ്പോഴാണാവോ?

ചോരയും നീരും രാഷ്ട്രീയത്തിന് വേണ്ടി നല്‍കുന്ന സാധാരണ രാഷ്ട്രീയ പ്രവര്‍ത്തകരെ കളിയാക്കി മുകളില്‍ നിന്ന് സ്വന്തം മക്കളെ ഇറക്കുന്ന മക്കള്‍ രാഷ്ട്രീയത്തിനെതിരെ ശബ്ദമുയരേണ്ട സമയം അതിക്രമിച്ചിരിക്കുന്നു..... അച്ഛനോ അമ്മയോ രാഷ്ട്രീയക്കാരായിരുന്നു എന്ന പേരില്‍ ഒരു സുപ്രഭാതത്തില്‍ സ്ഥാനമാനങ്ങള്‍ക്ക് വേണ്ടി മത്സരിക്കുവാനിറങ്ങുന്നവര്‍ എപ്പോഴാണാവോ യഥാര്‍ത്ഥ രാഷ്ട്രീയ പ്രവര്‍ത്തകരെ അംഗീകരിക്കുക?

ടീ പാര്‍ട്ടിക്കാര്‍ തനി നിറം കാട്ടി! സമരം ഫോളോ അപ്പ്

2011-03-10T08:16:00.001-05:00

അങ്ങിനെ ഒടുവില്‍ വിസ്കോന്‍സിനില്‍ റിപ്പബ്ലിക്കന്‍ ഗവര്‍ണര്‍ "വിജയിച്ചു". അതും ആരും പ്രതീക്ഷിക്കാതിരുന്ന നിയമത്തിന്റെ പഴുതിലൂടെ!

യൂണിയന്റെ അവകാശങ്ങള്‍ തട്ടിപറിച്ചെടുക്കുന്നത് ഉള്‍പ്പെടുത്തിയ ബഡ്ജറ്റ് ബില്ല് പാസ്സാക്കുവാന്‍ ഡെമോക്രാറ്റുകളുടെ പിന്തുണ കൂടി വേണമെന്നുണ്ടായിരുന്നുവെങ്കിലും ഡെമോക്രാറ്റ് സെനറ്റുകള്‍ സംസ്ഥാനം വിട്ടതിനാല്‍ കഴിഞ്ഞ 3 ആഴ്ചയായിട്ട് ബില്ല് പാസ്സാക്കുവാന്‍ റിപ്പബ്ലിക്കനായ ഗവര്‍ണര്‍ക്ക് കഴിഞ്ഞിരുന്നില്ല. എന്നാല്‍ ബുധനാഴ്ച പഴയ ബില്ലില്‍ നിന്ന് സാമ്പത്തിക കാര്യങ്ങള്‍ മാറ്റി യൂണിയന്‍ അധികാരം എടുത്ത് കളയുന്നത് മാത്രം ഉള്‍പ്പെടുത്തി പുതിയ ബില്ല് അവതരിപ്പിക്കുക വഴി ഡെമോക്രാറ്റുകളുടെ പിന്തുണ ആവശ്യമില്ല എന്ന നിയമത്തിന്റെ പഴുതിലൂടെ റിപ്പബ്ലിക്കന്മാര്‍ അവരുടെ അജണ്ട പാസ്സാക്കിയെടുത്തു.

യൂണിയന് നിയന്ത്രണം ഏര്‍പ്പെടുത്തുന്നത് ടാക്സ് കൊടുക്കുന്നവരെ രക്ഷിക്കുവാനുള്ളതാണെന്ന റിപ്പബ്ലിക്കന്‍ ഗവര്‍ണറുടെ വാക്കുകളില്‍ ആത്മാര്‍ത്ഥതയില്ലായിരുന്നുവെന്നും തെരഞ്ഞെടുപ്പുകളില്‍ ഡെമോക്രാറ്റുകളെ സഹായിക്കുന്ന യൂണിയനുകളെ ഇല്ലാതാക്കുക എന്ന രാഷ്ട്രീയ അജണ്ടയാണ് തങ്ങള്‍ക്കുണ്ടായിരുന്നതെന്നും ഇത് വഴി റിപ്പബ്ലിക്കന്‍ ടീ പാര്‍ട്ടിക്കാര്‍ തെളിയിച്ചിരിക്കുന്നു!!!!

സമരം നടക്കുന്നതിനിടയില്‍ വമ്പന്‍ ബിസിനസ്സ്കാരനും യൂണിയനുകള്‍ക്കെതിരെ രംഗത്തുള്ള കോച്ച് സഹോദരന്മാരില്‍ ഒരാളെന്ന വ്യാജേന ബഫല്ലോബീസ്റ്റ് ലേഖകന്‍ വിസ്കോന്‍സിന്‍ ഗവര്‍ണറെ വിളിച്ചപ്പോള്‍ പാവം ഗവര്‍ണര്‍ താന്‍ സംസാരിക്കുന്നത് തന്നെ സ്പോണ്‍സര്‍ ചെയ്യുന്നവരില്‍ ഒരാളുമായെണെന്ന് ധാരണയില്‍(!) ഈ സമരത്തെ തകര്‍ക്കാന്‍ താന്‍ ആലോചിച്ച വഴികളും സംസ്ഥാനം വിട്ട് നില്‍ക്കുന്ന ഡെമോക്രാറ്റുകളെ കളവ് പറഞ്ഞ് വരുത്തി ബില്ല് പാസ്സാക്കി എടുക്കുവാന്‍ പോകുന്നത് എങ്ങിനെയെന്നും വിളിച്ച് പറഞ്ഞത് കഴിഞ്ഞ ദിവസം പുറത്തായി (യൂ ട്യൂബില്‍). പഴയ പ്രസിഡന്റ് റെയ്ഗന്റെ പാതയാണ് താന്‍ പിന്തുടരുക എന്ന് പറഞ്ഞ് “കോച്ചിനെ” കയ്യിലെടുക്കുവാനും വാക്കര്‍ ശ്രമിക്കുന്നുണ്ട്.

ആ ഫോണ്‍ സംഭാഷണം കേള്‍ക്കുന്ന ആര്‍ക്കും ഗവര്‍ണര്‍ ലക്ഷ്യമിടുന്നത് ടാക്സ് കൊടുക്കുന്നവരെ സഹായിക്കാനല്ല എന്നും മറിച്ച് ഒബാമ ഉള്‍പ്പെടെയുള്ള ഡെമോക്രാറ്റുകളെ പിന്താങ്ങുന്ന യൂണിയനുകളെ ഇല്ലാതാക്കി 2012ലെ പ്രസിഡന്റ് ഇലക്ഷനില്‍ ടീ പാര്‍ട്ടിയെ അനുകൂലിക്കുന്ന ആളെ വിജയിപ്പിച്ചെടുക്കുക എന്ന ലക്ഷ്യമാണെന്നും മനസ്സിലാക്കാം. അത് കൊണ്ട് തന്നെയാണ് പാലിനും, ജിണ്ടാലും മറ്റും വിസ്കോന്‍സിന്‍ ഗവര്‍ണര്‍ക്ക് ശക്തമായ പിന്തുണ നല്‍കുന്നതും. വിസ്കോന്‍സിനില്‍ ബില്ല് വിജയിച്ചാല്‍ മറ്റ് റിപ്പബ്ലിക്കന്‍ സംസ്ഥാനങ്ങളിലും ഇതേ നിയമം കൊണ്ട് വന്ന് യൂണിയനുകളെ തളര്‍ത്താം എന്ന് റിപ്പബ്ലിക്കന്മാര്‍ വെച്ച് പുലര്‍ത്തുന്നു എന്നത് ഈ അടുത്ത ദിവസങ്ങളില്‍ കണ്ടതാണ്.

അമേരിക്കയിലും ഇന്ത്യയിലെ പോലെ മിഡില്‍ ക്ലാസ്സ് എന്ന വര്‍ഗ്ഗം ഇല്ലാതാകുന്നതായി കണക്കുകള്‍ ചൂണ്ടി കാട്ടുന്നു. പണക്കാരനും സാധാരണക്കാരനും തമ്മിലുള്ള വിടവ് വര്‍ദ്ധിച്ചു വന്നിരിക്കുന്നു. മിഡില്‍ ക്ലാസ്സിലുണ്ടായിരുന്നവര്‍ ഭൂരിപക്ഷവും താഴെയ്ക്കാണ് വന്നിരിക്കുന്നത്. കണക്കുകള്‍ പ്രകാരം 0.01% ആളുകളുടെ ശരാശരി വാര്‍ഷിക വരുമാനം ഏകദേശം 2.4 കോടി ഡോളറിനടുത്തും, 1%ത്തിനടുത്ത് അത് 12 ലക്ഷം ഡോളറിനടുത്തും 10% പേരുടേത് 2 ലക്ഷത്തിനടുത്തും ആണ്. എന്നാല്‍ 90% അമേരിക്കക്കാരുടെ ശരാശരി വാര്‍ഷിക വരുമാനം വെറും 32,000 ഡോളറിനടുത്താണ്.

കഴിഞ്ഞ മൂന്ന് പതിറ്റാണ്ടായിട്ട് അമേരിക്ക നേടിയ സമ്പത്തിന്റെ ഭീമവും വമ്പന്മാര്‍ മാത്രമാണ് അനുഭവിക്കുന്നത് എന്നാണ് കണക്കുകള്‍ കാട്ടുന്നത്. എന്നാല്‍ ഫെഡറല്‍ ടാക്സിന്റെ കാര്യം വരുമ്പോള്‍ ഈ കാലയളവില്‍ ഭീമന്മാരുടെ പങ്ക് താഴേയ്ക്കാണ് പോയത് എന്ന് കാണാം! കൂടാതെ ഈ സാമ്പത്തിക മാന്ദ്യം വന്നപ്പോഴും പണം നഷ്ടപ്പെട്ടത് മിഡില്‍ ക്ലാസ്സുകാര്‍ക്കാണ്. സാധാരണക്കാരുടെ പെന്‍ഷന്‍ ഉള്‍പ്പെടെയുള്ള പദ്ധതികളില്‍ നിക്ഷേപിച്ച പണം സ്റ്റോക്കില്‍ ആവിയായി പോയപ്പോഴും അതിന് കാരണക്കാരായവരെ സംരക്ഷിച്ച് അവരുടെ നഷ്ടം നികത്തി കൊടുക്കുവാനാണ് ബുഷ് ഉള്‍പ്പെട്ട റിപ്പബ്ലിക്കന്മാര്‍ മത്സരിച്ചത്. ഒബാമ അതിന് അറുതി വരുത്തുവാന്‍ ശ്രമിച്ചുവെങ്കിലും കഴിഞ്ഞ ഡിസമ്പറില്‍ റിപ്പബ്ലിക്കന്മാര്‍ക്ക് ഭൂരിപക്ഷം കിട്ടിയതോടെ വമ്പന്മാര്‍ വീണ്ടും സുരക്ഷിതരാകുന്നതാണ് കാണുന്നത്.

ഇങ്ങനെയുള്ള വമ്പന്മാരെ സഹായിക്കുവാനാണ് റിപ്പബ്ലിക്കന്മാരും അവരില്‍ തന്നെയുള്ള തീവ്ര പക്ഷക്കാരായ ടീ പാര്‍ട്ടിക്കാരും ഉത്സാഹിക്കുന്നത് എന്ന് വിലയിരുത്തുന്നു. ന്യൂനപക്ഷം വരുന്ന സര്‍ക്കാര്‍ ജീവനക്കാരാണ് ടാക്സിന്റെ ഭൂരിഭാഗവും കൊണ്ടു പോകുന്നതെന്ന പ്രചരണം ശക്തമാക്കുവാന്‍ അവര്‍ ശ്രമിക്കുന്നു....

വിസ്കോന്‍സിനിലെ യൂണിയങ്കാര്‍ക്ക് പിന്തുണ നല്‍കി കഴിഞ്ഞ ശനിയാഴ്ച ഉച്ചയ്ക്ക് അതാത് സംസ്ഥാനങ്ങളില്‍ ജാഥ സംഘടിപ്പിക്കുവാന്‍ കഴിഞ്ഞു എന്നത് യൂണിയനുകള്‍ റിപ്പബ്ലിക്കന്മാര്‍ക്ക് നല്‍കുന്ന ശക്തമായ സന്തേശമാണ്. എന്നിരുന്നാലും സ്പോര്‍ട്ട്സ്മാന്‍ സ്പിരിറ്റില്ലാതെ തങ്ങള്‍ എന്തും ചെയ്യുമെന്ന് വിസ്കോന്‍സിന്‍ ഗവര്‍ണറിലൂടെ ടീ പാര്‍ട്ടിയും യൂണിയനുകള്‍ക്ക് സന്തേശം നല്‍കി കഴിഞ്ഞു....

വ്യാജ ഫോണ്‍ കോളിലൂടെ ഗവര്‍ണര്‍ വാക്കറെ വീഴ്ത്തിയ ബഫല്ലോ ബീസ്റ്റിന്റെ ചീഫ് പറഞ്ഞത് പോലെ (വീഡിയോ) സ്വന്തം കാര്യസാധ്യത്തിന് വേണ്ടി മാത്രമാണ് വാക്കര്‍ ഈ പിടിവാശിയുമായി മുന്നോട്ട് പോകുന്നത്. 2012ല്‍ ഒബാമയ്ക്കെതിരെ പ്രസിഡന്റ് സ്ഥാനാര്‍ത്ഥിയാകാന്‍ താനാണ് യോഗ്യനെന്ന് തെളിയിക്കുക എന്നത് കൂടി ഇതിന് പിന്നിലുണ്ടായിരിക്കാം. അത് കൊണ്ടായിരിക്കാം ഒരു പക്ഷേ 2012ല്‍ താന്‍ മത്സരിക്കാനുണ്ടാകുമെന്ന് പറഞ്ഞിരുന്ന സാറാ പാലിന്‍ ഇന്ത്യ സന്തര്‍ശിക്കുവാന്‍ ഇറങ്ങി പുറപ്പെട്ടിരിക്കുന്നത്! പ്രൈമറി തുടങ്ങാനിരിക്കുന്ന ഈ അവസരത്തില്‍ ഇന്ത്യ സന്തര്‍ശിക്കുക എന്നത് താന്‍ മത്സരിക്കുവാനില്ല എന്ന സന്തേശമാണ് പാലിന്‍ നല്‍കുന്നതെന്നാണ് രാഷ്ട്രീയ ബുദ്ധിരാക്ഷസന്മാര്‍ വിലയിരുത്തുന്നത്...

വ്യവസായ ഭീമന്‍ കോച്ചാണെന്ന ധാരണയില്‍ വിസ്കോന്‍സിന്‍ ഗവര്‍ണര്‍ നടത്തിയ വെളിപ്പെടുത്തലുകള്‍ യാതാര്‍ത്ഥ്യങ്ങള്‍ വെളിച്ചെത്ത് കൊണ്ടു വന്നിരുന്നു. അത് സത്യമെന്ന തെളിയിക്കുന്നതാണ് ബുധനാഴ്ച വിസ്കോന്‍സിനില്‍ നടന്ന നാടകം. ജനാധിപത്യ രീതിയിലുള്ള ചര്‍ച്ചകള്‍ക്ക് മുതിരാതെ തന്റെ പിടി വാശി നടത്തിയെടുത്ത റിപ്പബ്ലിക്കന്‍ ഗവര്‍ണര്‍ വാക്കര്‍ അമേരിക്കയുടെ ജനാധിപത്യ ചരിത്രം പഠിക്കുന്ന വിദ്യാര്‍ത്ഥികള്‍ക്ക് നല്ല ഒരു സ്പെസിമനാകുമെന്ന് തീര്‍ച്ച....

ഭൂമിയില്‍ ജീവന്‍ പുറത്ത് നിന്ന്!

2011-03-06T13:49:00.000-05:00

ജേര്‍ണല്‍ ഓഫ് കോസ്മറ്റോളജി എന്ന ജേര്‍ണലില്‍ വളരെ രസകരമായ ഒരു പഠനം കഴിഞ്ഞ ദിവസം റിപ്പോര്‍ട്ട് ചെയ്തിരിക്കുന്നു. ഭൂമിയില്‍ പതിച്ച CI1 carbonaceous chondrites മെറ്റീരിയോരേറ്റില്‍ നടത്തിയ പുതിയ പഠനം ഭൂമിയില്‍ മാത്രമല്ല ഭൂമിക്ക് പുറത്തും ജീവനുണ്ട് എന്ന് തെളിയിക്കുന്നതാണ്.

ജേര്‍ണല്‍ നടത്തിപ്പുകാര്‍ പറയുന്നതനുസരിച്ച് ഈ പ്രബന്ധം പ്രസിദ്ധീകരിക്കുന്നതിന് മുന്‍പ് ഏകദേശം 5000 ശാസ്തജ്ഞര്‍ റിവ്യൂ ചെയ്തു. പലപ്പോഴും 3-4ഓ പേര്‍ മാത്രമേ ഒരു പ്രബന്ധം റിവ്യൂ ചെയ്യൂകയുള്ളൂ എന്നിരിക്കേ പ്രസിദ്ധീകരണ ചരിത്രത്തില്‍ ഒരു പക്ഷേ ഇത്രയും പേര്‍ റിവ്യൂ ചെയ്യുന്നത് ചരിത്ര സംഭവം തന്നെയായിരിക്കും. ഇത് കൂടാതെ ഈ പ്രബന്ധത്തെ പറ്റി അഭിപ്രായം രേഖപ്പെടുത്തുവാന്‍ മാര്‍ച്ച് 7 മുതല്‍ 10 വരെ വായനക്കാര്‍ക്ക് അവസരവും നല്‍കിയിട്ടുണ്ട്‍.

ഈ പ്രബന്ധില്‍ പറയുന്ന വിഭാഗത്തില്‍ പെട്ട മീറ്റീരിയോരേറ്റില്‍ അമിനോ ആസിഡുകളും, പ്യൂരിന്‍, പിരമിഡിന്‍ തുടങ്ങിയ ഓര്‍ഗാനിക്ക് വസ്തുക്കളും അടങ്ങിയിട്ടുണ്ടെന്ന് (ജീവന്റെ സൂചന) പണ്ടേ കണ്ട് പിടിച്ചിരുന്നു. ഇപ്പോള്‍ ഹൂവര്‍ എന്ന ശാസ്ത്രജ്ഞന്‍ ഇവയെ സ്കാനിങ്ങ ഇലക്ട്രോണ്‍ മൈക്രോസ്കോപ്പിന്റെ (എസ്സ്.ഇ.എം.) സഹായത്താല്‍ പരിശോധിച്ചപ്പോള്‍ ഇവയില്‍ സയനോ-ബാക്റ്റീരിയകളുടെ ഫോസിലുകള്‍ ഉണ്ടെന്ന് തെളിഞ്ഞിരിക്കുന്നു!

ചുരുക്കത്തില്‍ ഉല്‍ക്കകകളും, വാല്‍നക്ഷത്രങ്ങളും മറ്റും വഴി ജീവന്‍ ഈ പ്രപഞ്ചത്തില്‍ കറങ്ങി നടക്കുകയും അങ്ങിനെ ജീവന്‍ “എല്ലായിടത്തും” വ്യാപിക്കുകയും ചെയുന്നു എന്നും ഒരു പക്ഷേ ഭൂമിയില്‍ ജീവന്‍ ഉല്‍ഭവിച്ചത് ഇതു പോലെയുള്ള ഉല്‍ക്കകകളും, വാല്‍ നക്ഷത്രവും വഴിയാകാം എന്നും ഈ പ്രബന്ധം പറയുവാന്‍ ശ്രമിക്കുന്നത്.

ശാസ്ത്രജ്ഞര്‍ ഇപ്പോള്‍ ഭൂമിയുടെ അടുത്ത് വഴി പോകുന്ന ഉല്‍ക്കകളുടെയും മറ്റും സാമ്പിള്‍ ശേഖരിക്കുന്നത് ഈ വാദം ശരിയാണോ എന്ന് അറിയുവാനാണ്.

ഈ ആശയം പണ്ടേ ഉള്ളതാണ്. കേരളത്തിലെ ശാസ്ത്രജ്ഞരും ഇക്കൂട്ടത്തിലുണ്ട്. ഫോസില്‍ ജീവികള്‍ക്ക് പകരം “ജീവനുള്ള” ജീവികളാണ് കേരളത്തില്‍ ലഭിച്ചതെന്ന് മാത്രം! 2001ല്‍ കേരളത്തില്‍ കാസര്‍ഗോഡ് മുതല്‍ താഴേയ്ക്ക് ചുവന്ന മഴ പെയ്തതുമായി നടന്ന പഠനങ്ങളിലൊന്നില്‍ എം.ജി.സര്‍വകലാശാലയിലെ ഫിസിക്സ് ഡിപ്പാര്‍റ്റ്മെന്റിലെ അന്നത്തെ റിസര്‍ച്ച് സ്കോളറായിരുന്ന സന്തോഷ് (ഇപ്പോള്‍ കുസാറ്റില്‍) ഈ ചുവന്ന മഴയ്ക്ക് കാരണം ഭൂമിക്ക് പുറത്ത് നിന്ന് വന്ന “ജീവികളാണെന്ന്” വാദിച്ചത് വിവാദം സൃഷ്ടിച്ചിരുന്നു (2008ലെ മഞ്ഞ മഴയ്ക്കും കാരണം ഇവയാണെന്ന് ഇവര്‍ പറയുന്നു). ആ സമയത്ത് ഭൂമിയുടെ അന്തരീക്ഷത്തില്‍ ഒരു ഉല്‍ക്ക പ്രവേശിച്ചിരുന്നു. അത് ഈ ചുവന്ന മഴ പെയ്ത പ്രദേശങ്ങളിലൂടെ കടന്ന് പോയിരുന്നു. ആ ഉലക്കയില്‍ നിന്ന് വന്ന “ജീവികളാണ്” ചുവന്ന മഴയുണ്ടാക്കിയത്. ഇപ്പോഴും ആ “ജീവികളെ” കുറിച്ച് പഠനം നടന്ന് കൊണ്ടിരിക്കുന്നു.

ബ്ലോഗില്‍ ക്രിയേഷനിസ്റ്റുകളും, എവലൂഷണിസ്റ്റുകളും പൊരിഞ്ഞ ചര്‍ച്ചയാണ്. എങ്കില്‍ പിന്നെ മൂന്നാമതൊന്ന് കൂടി ഇരിക്കട്ടെ.....

നമ്മുടെ നാട്ടിലായിരുന്നുവെങ്കില്‍!!

2011-03-04T19:35:00.000-05:00

അമേരിക്കയിലെ വിസ്കോന്‍സിനില്‍ റിപ്പബ്ലിക്കന്‍ ഗവര്‍ണര്‍ അവിടത്തെ യൂണിയനുകളുടെ അധികാരം എടുത്ത് കളയാന്‍ കിണഞ്ഞ് ശ്രമിക്കുന്നതിനെതിരെ ജനങ്ങള്‍ സമരം തുടങ്ങിയിട്ട് രണ്ടാഴ്ച പിന്നിട്ടിരുന്നു. സമരക്കാര്‍ 24 മണിക്കൂറും ക്യാപിറ്റലില്‍ തന്നെയായിരുന്നു. ഒടുവില്‍ ഒരു ജഡ്ജി ഇനിമുതല്‍ രാത്രി ആരെയും ക്യാപിറ്റലില്‍ കയറ്റരുതെന്ന് വ്യാഴാഴ്ച രാത്രി ഉത്തരവിട്ടു. ഇതിനെ തുടര്‍ന്ന് സമരക്കാര്‍ സമാധനപരമായി അന്ന് രാത്രി തന്നെ പിരിഞ്ഞ് പോയി. എന്നാല്‍ രാവിലെ പ്രവേശനം തടയരുതെന്നും ഉത്തരവിലുണ്ട്.

ഇതിനിടയില്‍ നിക്ക് മില്‍റോയ് എന്ന ഡെമോക്രാറ്റ് ജനപ്രതിനിധി (ഡെമോക്രാറ്റ് സെനറ്റ് പ്രതിനിധികള്‍ ക്വാറം തികയാതിരിക്കുവാന്‍ ഇപ്പോഴും ഒളിവില്‍ താമസിക്കുകയാണ്, ഇത് അസംബ്ലി പ്രതിനിധിയാണ്) തന്റെ സാധനങ്ങള്‍ എടുക്കുവാന്‍ വ്യാഴാഴ്ച രാത്രി ക്യാപിറ്റലില്‍ കയറുവാന്‍ മുതിര്‍ന്നപ്പോള്‍ വാതിലില്‍ നിന്നിരുന്ന പോലീസുകാരന്‍ പുള്ളിയെ കുത്തിന് പിടിച്ച് താഴെ ഇട്ടു!!! താന്‍ ജനപ്രതിനിധിയാണെന്ന് തെളിയിക്കുന്ന ബാഡ്ജ് കാണിക്കുവാനുള്ള സമയം പോലും ആ പോലീസുകാരന്‍ പുള്ളിക്ക് കൊടുത്തില്ല (വീഡിയോ ഇവിടെ).

നമ്മുടെ നാട്ടിലെങ്ങാനുമായിരുന്നുവെങ്കില്‍.. പാര്‍ലമെന്റിലേയ്ക്ക് കയറുവാന്‍ തുനിയുന്ന ജനപ്രതിനിധിയെ ഇത് പോലെ കുത്തിന് പിടിച്ച് വലിച്ചിടുന്ന ഒരു പോലീസുകാരന്റെ ഗതി ഒന്ന് ആലോചിച്ച് നോക്കിയേ!!

നമ്മുടെ നാട്ടിലും കോടതികള്‍ വിധി പുറപ്പെടൂവിക്കും... എന്നാല്‍ അത് ലംഘിച്ച് തുക്കടാ നേതാക്കള്‍ പോലും നിയമം നടപ്പിലാക്കേണ്ട പോലീസിനെ വിറപ്പിച്ച് അഴിഞ്ഞാടും....

തങ്ങളെ അനുകൂലിക്കുന്ന ഡെമോക്രാറ്റ് പ്രതിനിധിക്ക് ഇങ്ങനെയൊന്ന് സംഭവിച്ചെങ്കിലും സമരം പഴയ പോലെ സമാധനപരം ആയി വെള്ളിയാഴ്ചയും നടന്നു!! നമ്മുടെ നാട്ടിലായിരുന്നുവെങ്കില്‍ ഹര്‍ത്താല്‍, അടിച്ച് പൊളി, പോലീസിന്റെ ദേഹത്ത് “ചെണ്ടയടി” തുടങ്ങിയ “കലാപ” പരിപാടികള്‍ കാണാമായിരുന്നു...

സാധാരണക്കാരന്റെ പള്ളയ്ക്കടിക്കുന്ന കേന്ദ്ര ബഡ്ജറ്റ്

2011-02-28T22:23:00.001-05:00

പഠനം സാധാരണക്കാര്‍ക്ക് ബാലി കേറാമലയാക്കുവാന്‍ അരകെട്ട് ഉറപ്പിച്ച് ഇറങ്ങുകയാണെന്ന് മന്മോഹന്‍ സര്‍ക്കാര്‍ ബഡ്ജറ്റിലൂടെ വിളിച്ച് പറയുന്നു....

നോട്ട് ബുക്കുകള്‍ക്കും, എക്സര്‍സൈസ് ബുക്കുകള്‍ക്കും മാത്രമല്ല പെന്‍സില്‍ ഷാര്‍പ്പനെറിന് വരെ നികുതി ഏര്‍പ്പെടുത്തി ആത്മനിര്‍വൃതി കൊള്ളുന്ന രാഷ്ട്രീയ കോമരങ്ങളെയാണ് ബഡ്ജറ്റ് തുറന്ന് കാട്ടുന്നത്.

ജ്യൊമെട്രി ബോക്സ്, കളര്‍ ബോക്സ്, ബോള്‍ പെന്‍, മഷി, തുടങ്ങിവയ്ക്ക് പുറമേ പ്രിന്റ് ചെയ്യാനുള്ള പേപ്പറിന് വില കൂടുന്നതോടെ ടെക്സ്റ്റ് ബുക്കുകള്‍ക്കും വില വര്‍ദ്ധിക്കും.

വിദ്യാഭ്യാസ മേഖലയില്‍ മാത്രമല്ല ആരോഗ്യ മേഖലയിലും സാധാരണക്കാരനെ ഉപദ്രവിക്കുവാന്‍ മന്മോഹന്റെ ഗവണ്മെന്റ് മറക്കുന്നില്ല.... സെണ്ട്രലൈസ്ഡ് എ.സി.യുള്ള ആശുപത്രികളില്‍ സര്‍വീസ് ചാര്‍ജ്! ഐ.സി.യു.വില്‍/ഓപ്പറേഷന് കാശ് കൂടുതല്‍ കണ്ടെത്തണമെന്ന് സാരം.

മെഡിക്കല്‍ ചെക്കപ്പിന് ഇന്‍ഷ്വറന്‍സ് കമ്പനിയെ സഹായിക്കുവാന്‍ 10% സര്‍വീസ് ടാക്സ് 5% ആയി കുറച്ചു. അടി കിട്ടിയത് ഇന്‍ഷ്വറന്‍സില്ലാത്ത ചികിത്സ ചെലവ് പോക്കറ്റില്‍ നിന്ന് കൊടുക്കുന്ന സാധാരണക്കാരന്. അവര്‍ ഇനി 5% സര്‍വീസ് ടാക്സ് നല്‍കണം! മെഡിക്കല്‍ ഡയഗനോസിസിനും സര്‍വീസ് ടാക്സ് ഏര്‍പ്പെടുത്തിയതിന് പുറമേ വാക്സിനുകള്‍ക്കും നികുതി ഏര്‍പ്പെടുത്തിയിട്ടുണ്ട്.

റെഡി-ടു-ഈറ്റ് വസ്തുക്കള്‍ക്ക് നികുതി കൂട്ടിയതോടെ ബാച്ചികളുടെയും പള്ളയ്ക്കടിച്ചു.

ജനങ്ങളെ സഹായിക്കാനെന്ന പേരില്‍ ബില്‍ഡേര്‍ഴ്സിന് 100% റിബേറ്റ് കൊടുത്തും, ടാക്സ് പരിധി (അതും ആണുങ്ങളുടെ മാത്രം!) ഉയര്‍ത്തിയും മറ്റും മേമ്പൊടി കാട്ടി ജനകീയ ബഡ്ജറ്റ് എന്ന് വരുത്തി തീര്‍ക്കുവാന്‍ ശ്രമിക്കുമ്പോള്‍ ആരോഗ്യം-വിദ്യാഭ്യാസ മേഖലകള്‍ സാധാരണക്കാര്‍ക്ക് വീണ്ടും അപ്രാപ്യമാക്കുമെന്ന സത്യം മറച്ച് വെയ്ക്കുന്ന നെറികെട്ട രാഷ്ട്രീയ നേതൃത്വത്തെ ഇനിയും നാം ചുമക്കണമല്ലോ!!!

കൂടുതല്‍ വായനയ്ക്ക്:
http://m.timesofindia.com/PDATOI/articleshow/7597501.cms
http://www.expressindia.com/latest-news/Union-Budget-Whats-up-whats-down/755932/

അമേരിക്കയില്‍ യൂണിയന്‍ സമരം പടരുന്നു: ഫോളോ അപ്പ്

2011-02-22T22:36:00.000-05:00

അമേരിക്കന്‍ സംസ്ഥാനമായ വിസ്കോന്‍സിനില്‍ നടക്കുന്ന യൂണിയന്‍ സമരം തുടരുന്നു. സമരത്തെ തുടര്‍ന്ന് ഡെമോക്രാറ്റുകള്‍ വിട്ട് നിന്നതിന്റെ ഫലമായി വെള്ളിയാഴ്ച പരാജയപ്പെട്ട ബില്ല് അവതരണം 22ആം തിയതി ചൊവ്വാഴ്ച വീണ്ടും കൊണ്ടു വരുവാന്‍ വിസ്കോന്‍സിന്‍ ഗവര്‍ണറും റിപ്പബ്ലിക്കന്മാരും കിണഞ്ഞ് ശ്രമിക്കുകയായിരുന്നു. ഇപ്പോഴും 14 ഡെമോക്രാറ്റുകള്‍ സംസ്ഥാനത്ത് നിന്ന് വിട്ട് നില്‍ക്കുകയാണ്. ഡെമോക്രാറ്റുകളുടെ അസാന്നിദ്ധ്യത്തില്‍ ബില്ല് ചര്‍ച്ച ചെയ്യുവാന്‍ എടുത്തിരിക്കുന്നു എന്നാണ് പുതിയ റിപ്പോര്‍ട്ടുകള്‍. മണിക്കൂറുകള്‍ക്ക് മുന്‍പ് ഗവര്‍ണര്‍ ടി.വി.യില്‍ പ്രത്യക്ഷപ്പെട്ട് പ്രസംഗം നടത്തി (യൂട്യൂബ്).

തന്റെ മുയലിന് തന്നെ മൂന്ന് കൊമ്പ് എന്നിടത്ത് നിന്ന് ഒരു തരി പോലും അനങ്ങില്ല എന്ന സന്തേശം ആണ് ഗവര്‍ണര്‍ നല്‍കിയിരിക്കുന്നത്.

പണക്കാര്‍ക്ക് വന്‍ ആനുക്കുല്യങ്ങള്‍ നല്‍കിയതിന് ശേഷമാണ് പണമില്ല എന്നും രക്ഷപ്പെടണമെങ്കില്‍ സര്‍ക്കാര്‍ ജീവനക്കാര്‍ 19%ത്തോളം തുക സര്‍ക്കാരിന് കൂടുതല്‍ നല്‍കുന്നതിനോടൊപ്പം ഇവര്‍ക്ക് വേണ്ടി വാദിക്കുവാനുള്ള യൂണിയനുകളെ ദുര്‍ബലപ്പെടുത്തി ഇല്ലാതാക്കുവാനും ഗവര്‍ണര്‍ ലക്ഷ്യമിടുന്നു എന്ന് വിലയിരുത്തപ്പെടുന്നു. ഒരു വെടിക്ക് രണ്ട് പക്ഷി എന്ന പോലെ സര്‍ക്കാര്‍ ജീവനക്കാരുടെ കൂട്ടായ്മ ഇല്ലാതാക്കുന്നതിനോടൊപ്പം ഡെമോക്രാറ്റുകള്‍ക്ക് യൂണിയനുകള്‍ വഴി ലഭിക്കുന്ന വലിയ പിന്തുണയും തകര്‍ക്കാം എന്ന് ഈ നിയമത്തിന് പിന്നില്‍ കളിക്കുന്ന അര്‍ജുനന്മാര്‍ വിലയിരുത്തുന്നു.... മറ്റ് റിപ്പബ്ലിക്കന്‍ സംസ്ഥാനങ്ങളും യൂണിയനുകള്‍ക്കെതിരെ തിരിയാന്‍ തയ്യാറെടുത്ത് കഴിഞ്ഞു.

അതിനിടയില്‍ ഇന്തിയാനയിലെ ഡെമോക്രാട്ടുകളും സ്ഥലം വിട്ടിരിക്കുന്നു. ഇന്തിയാനയിലും യൂണിയന്‍ നിരോധനത്തിനുള്ള ബില്ല് പാര്‍ലമെന്റില്‍ അവതരിപ്പിക്കുമെന്ന് അറിഞ്ഞതോടെ അവിടത്തെ ഡെമോക്രാറ്റ് സെനറ്റര്‍മാര്‍ മുങ്ങി.

യൂണിയനുകളുടെ അവകാശം എടുത്ത് കളയുന്നതിനെതിരെയാണ് ഇപ്പോള്‍ സമരം ശക്തമായിരിക്കുന്നത്. വിസ്കോന്‍സിനില്‍ ബഡ്ജറ്റിന്റെ കാര്യം പറഞ്ഞ് തുടങ്ങിയ ഗവര്‍ണര്‍ ഇപ്പോള്‍ യൂണിയന്റെ അവകാശം കളയുന്നതിനെ എതിര്‍ക്കുന്നതില്‍ മുന്തൂക്കം കാണിക്കുന്നു എന്ന സ്ഥിതി വന്നത് റിപ്പബ്ലിക്കന്മാരുടെ യഥാര്‍ത്ഥ ലക്ഷ്യം തുറന്ന് കാണിക്കപ്പെട്ടിരിക്കുന്നു. ഡെമോക്രാറ്റുകളെ അനുകൂലിക്കുന്ന യൂണിയന്‍ സംവിധാനം തകര്‍ക്കുക എന്ന ഒറ്റ ലക്ഷ്യമേ അവര്‍ക്കുള്ളൂ.

ഇന്നത്തെ മാന്ദ്യത്തില്‍ നിന്ന് കരകയറാന്‍ സാധാരണ ജനങ്ങള്‍ കഷ്ടം സഹിക്കണമെന്ന് റിപ്പബ്ലിക്കന്മാര്‍ പറയുമ്പോഴും മാന്ദ്യത്തിന് യഥാര്‍ത്ഥ കാരണക്കാരായ വമ്പന്മാര്‍ക്ക് ടാക്സ് കണ്‍സെക്ഷനും, മറ്റ് ആനുകൂല്യവും നല്‍കുവാന്‍ അവര്‍ ഉത്സാഹിക്കുന്നു എന്നത് അവരുടെ കപട വാദം പുറത്ത് കാണിക്കുന്നു.

അത് കൊണ്ട് തന്നെയാണ് ഒബാമയും ഡെമോക്രാട്ടുകളും വിസ്കോന്‍സിനില്‍ ഉയര്‍ന്ന് വന്ന ഈ സമരത്തെ അനുകൂലിക്കുന്നതും. വിസ്കോന്‍സിനില്‍ യൂണിയനുകളുടെ സമരം പരാജയപ്പെട്ടാല്‍ അമേരിക്കയിലെ റിപ്പബ്ലിക്കന്മാര്‍ ഭരിക്കുന്ന സംസ്ഥാനങ്ങളില്‍ മുഴുവന്‍ ഇതേ നിയമം കൊണ്ടു വന്ന് യൂണിയനുകളെ ഇല്ലാതാക്കുകയും അത് വഴി പൊതുമേഖലയിലെ ജനങ്ങളുടെ കൂട്ടായ്മ നശിക്കുകയും ചെയ്യും. അത് ഡെമോക്രാട്ടുകളെ ദുര്‍ബലപ്പെടുത്തും എന്നതാണ് റിപ്പബ്ലിക്കന്മാര്‍ക്ക് ഇത്ര ആവേശം.

അമേരിക്കയിലെ യൂണിയനുകളെ ഇല്ലാതാക്കുക എന്ന ലക്ഷ്യമാണ് വിസ്കോന്‍സിനിലെ പ്രമുഖ വ്യവസായ പ്രമുഖര്‍ക്കുള്ളത് എന്നാണ് പത്രങ്ങള്‍ റിപ്പോര്‍ട്ട് ചെയ്യുന്നത്. വിസ്കോന്‍സിനിലെ ഗവര്‍ണറുടെ തെരഞ്ഞെടുപ്പ് പ്രചരണത്തിന്റെ ചെലവിന്റെ നല്ല പങ്ക് വഹിച്ചത് ഇവരാണത്രേ. അതിനാലാണ് ഗവര്‍ണര്‍ ഇത്ര വാശി പിടിക്കുന്നതെന്നും യൂണിയനെ അനുകൂലിക്കുന്നവര്‍ പറയുന്നു.

ഒഹായോയിലും ആളുകള്‍ ചൊവ്വാഴ്ച പ്രതിഷേധവുമായി കൊളമ്പസിലെ ക്യാപിറ്റലില്‍ കയറി. എന്നാല്‍ ഇവിടെ റിപ്പബ്ലിക്കന്മാര്‍ കൂടുതല്‍ ജയിച്ചിരിക്കുന്നതിനാല്‍ വിസ്കോന്‍സിനിലെയും ഇന്തിയാനയിലെയും പോലെ ഡെമോക്രാറ്റുകള്‍ വിട്ട് നിന്നാലും ബില്ല് പാസ്സാക്കുവാന്‍ ഒഹായോ റിപ്പബ്ലിക്കന്മാര്‍ക്ക് കഴിയും. എങ്കിലും പ്രതിഷേധവുമായി ആയിരങ്ങള്‍ രംഗത്തുണ്ട്.

അടുത്തത് ന്യൂജേര്‍ഴ്സിയാണ്. വരുന്ന വെള്ളിയാഴ്ച ന്യൂജേര്‍ഴ്സിയില്‍ വിസ്കോന്‍സിനിലെ സമരക്കാര്‍ക്ക് ഐക്യദാര്‍ഢ്യം പ്രഖ്യാപിച്ച് റാലി നടത്തുവാന്‍ തീരുമാനമായി. ഇതിലൂടെ ന്യൂജേര്‍ഴ്സി റിപ്പബ്ലിക്കന്‍ ഗവര്‍ണര്‍ക്ക് ശക്തമായ സന്തേശവും നല്‍കുവാന്‍ കഴിയുമെന്ന് ഇവര്‍ കരുതുന്നു.

ഈ ആഴ്ച ബില്ല് പാസ്സായില്ലെങ്കില്‍ 1500ഓളം സര്‍ക്കാര്‍ ജീവനക്കാരെ പിരിച്ച് വിടുമെന്ന് വിസ്കോന്‍സിന്‍ ഗവര്‍ണര്‍ ഭീഷണി മുഴക്കി കഴിഞ്ഞു. ഇനിയുള്ള ദിവസങ്ങളില്‍ എന്ത് സംഭവിക്കുമെന്ന് കാത്തിരിക്കാം. വ്യവസായികള്‍ പിന്തുണയ്ക്കുന്ന റിപ്പബ്ലിക്കന്മാരും ഡെമോക്രാറ്റുകള്‍ പിന്താങ്ങുന്ന യൂണിയനുകളും തമ്മിലുള്ള യുദ്ധത്തില്‍ ആര്‍ക്കായിരിക്കും വിജയം എന്ന് മറ്റ് റിപ്പബ്ലിക്കന്‍ സംസ്ഥാനങ്ങള്‍ ഉറ്റ് നോക്കുന്നു....